ހޮޅިލައިނަށް ޑްރޯން ހަމަލާދިނީ އިރާގުގައި ތިބި ހަނގުރާމަވެރިން: ސައުދީ އަރަބިއްޔާ
12 ސެޕްޓެމްބަރު 2026 | ހޮނިހިރު 07:30ސައުދީ އަރަބިއްޔާގެ ތެޔޮ ހޮޅިލައިނަށް ދިން ހަމަލާގެ ބަދަލު ނުހިފުމަށް އެ ގައުމުން ނިންމުމުން އިރާގު ސަރުކާރުން އެކަމަށް މަރުހަބާ ކިޔައިފި. މި ހަމަލާއާ ގުޅިގެން އިރާގުގެ ބައެއް އަސްކަރީ ކޮމާންޑަރުން މަގާމުން ދުރުކޮށްފައިވާއިރު، ސައުދީގެ ސަލާމަތާއި އިސްތިގުލާލު ރައްކާތެރިކުރުމަށް އަޅާ ކޮންމެ ފިޔަވަޅަކަށް ތާއީދުކުރާނެ ކަމަށް ޖީސީސީން ވަނީ ބުނެފައި
ސައުދީ އަރަބިއްޔާގެ 'އީސްޓް-ވެސްޓް' ހޮޅިލައިނަށް ދިން ހަމަލާތަކާ ގުޅިގެން ލިބިފައިވާ ގެއްލުންތައް ފެންނަ ސެޓެލައިޓް ފޮޓޯއެއް | އޭއެފްޕީ
ސައުދީ އަރަބިއްޔާގެ އިރުމަތިން ހުޅަނގަށް ތެޔޮ އުފުލާ މައި 'އީސްޓް-ވެސްޓް' ހޮޅިލައިނަށް ހަމަލާދިނީ އިރާގުގައި ހަރަކާތްތެރިވާ ހަތިޔާރުއެޅި ޖަމާއަތަކުން ކަމަށް ސައުދީ އަރަބިއްޔާއިން ބުނެފި އެވެ. އެ ހަމަލާތަކާ ގުޅިގެން ހޮޅިލައިން މިހާރު ވަނީ ބަންދުކޮށްފަ އެވެ. ސައުދީ އަރަބިއްޔާގެ ޚާރިޖީ ވުޒާރާއިން ނެރުނު ބަޔާނެއްގައި ބުނީ، ރިޔާޟް އަދި މަދީނާ ސަރަހައްދުގައިވާ މި ހޮޅިލައިނަށް ހަމަލާދީފައި ވަނީ "އިރާގުން ފޮނުވާލި ޑްރޯންތަކެއް" ބޭނުންކޮށްގެން ކަމަށެވެ. އަދި، މި ހަމަލާތަކުގެ ސަބަބުން ބައެއް މީހުންނަށް އަނިޔާވެ، މާއްދީ ބޮޑެތި ގެއްލުންތަކެއް ލިބިފައިވާ ކަމަށް ވެސް އެ ވުޒާރާއިން ބުނެ އެވެ.
ސައޫދީ އަރަބިއްޔާއިން ވަނީ މި ހަމަލާތައް އެންމެ ހަރުކަށި އިބާރާތުން ކުށްވެރިކޮށްފަ އެވެ. އަދި، އިރާގުގެ ސަރުކާރުގެ އެދުމުގެ މަތިން، ހަމަލާގައި ޒިންމާވާ ފަރާތްތަކަށް ރައްދު ހަމަލާ ނުދިނުމަށް ނިންމާފައިވާ ކަން ވެސް ސައުދީ އަރަބިއްޔާގެ ޚާރިޖީ ވުޒާރާއިން ހާމަކުރި އެވެ. މީގެ އިތުރުން، އިރާގުގައި ހަރަކާތްތެރިވާ ހަތިޔާރުއެޅި ޖަމާއަތްތަކުން ސައުދީ އަރަބިއްޔާއަށާއި އަވައްޓެރި އެހެން ގައުމުތަކަށް ދެމުންދާ ހަމަލާތައް ހުއްޓުވުމަށް ޓަކައި އަޅަންޖެހޭ ފިޔަަވަޅުތައް އެޅުމުގެ ފުރުސަތު އިރާގު ސަރުކާރަށް ދިނުމަށް އެ ގައުމުގެ ބޮޑުވަޒީރު އެދިފައިވާ ކަމަށް ވެސް ސައުދީ އަރަބިއްޔާގެ ޚާރިޖީ ވުޒާރާއިން ބުންޏެވެ.
މި ދަނޑިވަޅުގައި ހަމަލާއަށް ރައްދު ނުދީ، އިރާގު ސަރުކާރުގެ މަސައްކަތްތަކަށް އެއްބާރުލުން ދިނުމަށް ސައުދީ އަރަބިއްޔާއިން ނިންމި ނަމަވެސް، އެ ގައުމުގެ އިސްތިގުލާލާއި، ސަލާމަތާއި، އަދި މުހިންމު ވަސީލަތްތައް ރައްކާތެރިކުރުމަށް ޓަކައި އަޅަންޖެހުނު ކޮންމެ ފިޔަވަޅެއް އެޅުމުގެ ހައްގު ސައުދީ އަރަބިއްޔާއަށް ލިބިގެންވާ ކަމަށް ވެސް އެ ގައުމުގެ ޚާރިޖީ ވުޒާރާގެ ބަޔާނުގައި ބުނެފައިވެ އެވެ.
ސައުދީ އަރަބިއްޔާގެ ދައުލަތުގެ މީޑިއާ އެސްޕީއޭއަށް މައުލޫމާތު ދެއްވަމުން އެ ގައުމުގެ ހަކަތައާ ބެހޭ ވުޒާރާގެ އޮފިޝަލަކު ވަނީ 'އީސްޓް-ވެސްޓް' ހޮޅިލައިން ވަގުތީ ގޮތުން ބަންދުކޮށްފައިވާ ކަން ކަށަވަރު ކޮށްދެއްވާފަ އެވެ. ހޮޅިލައިން ބަންދުކުރީ ރައްކާތެރިކަމުގެ ފިޔަވަޅެއްގެ ގޮތުން ކަމަށާއި، ހަމަލާތަކުގައި ބައެއް މީހުންނަށް އަނިޔާވިކަން ވެސް އެ އޮފިޝަލު ކަށަވަރުކޮށްދެއްވި އެވެ.
ބަދަލުނުހިފަން ނިންމުމުން އިރާގުގެ މަރުހަބާ
ހަމަލާގެ ބަދަލު ނުހިފުމަށް ސައުދީ އަރަބިއްޔާއިން ނިންމި ނިންމުމަށް އިރާގު ސަރުކާރުން ވަނީ މަރުހަބާ ކިޔާފަ އެވެ. އަދި، މަސްލަހަތު ހަމައަކަށް އެޅުވުމަށް އިރާގުން ކުރަމުންދާ މަސައްކަތްތަކަށް ރިޔާޟުން ދިން އިޖާބައަށް ޝުކުރު އަދާކުރާ ކަމަށް ވެސް އެ ގައުމުން ބުނެފައިވެ އެވެ. އިރާގުގެ ހަތިޔާރު އެޅި ބާރުތަކުގެ ކޮމާންޑަރ-އިން-ޗީފްގެ ތަރުޖަމާނު ސަބާހް އަލް-ނޫމާން ވަނީ ސައުދީ އަރަބިއްޔާއަށް ދީފައިވާ ހަމަލާތައް ކުށްވެރި ކުރައްވާފަ އެވެ. އަދި، ސައުދީ އަރަބިއްޔާގެ ސަލާމަތާއި ހަމަޖެހުމަށް ނުރައްކާވާ، ނުވަތަ ދެ ގައުމުގެ ދެމެދުގައި އޮތް ގާތް އަޚުވަންތަ ގުޅުމަށް ބުރޫއަރާ ފަދަ އެއްވެސް އުދުވާނެއް ގަބޫލުނުކުރާނެ ކަމަށް އޭނާ ވިދާޅުވި އެވެ.
އިރާގުގެ ބޮޑުވަޒީރުގެ އޮފީހުން ހޮނިހިރު ދުވަހު ބުނީ، ސައުދީ އަރަބިއްޔާއަށް އަމާޒުކޮށް ދިން ޑްރޯން ހަމަލާތައް ފޮނުވާލާފައި ވަނީ އިރާގުގެ ދެކުނުގެ މައިސާން ޕްރޮވިންސްގެ ތެރެއިންކަން ތަހުގީގުތަކުން ކަށަވަރުވެފައިވާ ކަމަށެވެ. އެހެންކަމުން، އެ ސަރަހައްދުގެ އަސްކަރީ އޮޕަރޭޝަންތަކާ ހަވާލުވެ ހުންނެވި ކޮމާންޑަރު މިހާރު މަގާމުން ދުރުކޮށްފައިވާ ކަން ވެސް އެ އޮފީހުން ބުންޏެވެ. މީގެ އިތުރުން، މައިސާން އޮޕަރޭޝަންސް ކޮމާންޑްގެ މައްސަލަ ބެލުމަށް ޓަކައި ހާއްސަ ތަހުގީގީ އިދާރާއެއް އެކުލަވާލުމަށް ބޮޑުވަޒީރު ޢަލީ އަލް-ޒައިދީ އަމުރުކުރައްވާފައިވާ ކަމަށް ވެސް އެ އޮފީހުން ހާމަކުރި އެވެ.
ގަލްފް ކޯޕަރޭޝަން ކައުންސިލްގެ (ޖީސީސީ) ސެކްރެޓަރީ ޖެނެރަލް ޖާސިމް މުޙައްމަދު އަލްބުދަޔިވީ ވިދާޅުވީ، މިއީ ނުރައްކާތެރި ފިޔަވަޅެއް ކަމަށާއި، ސައުދީ އަރަބިއްޔާގެ ސަލާމަތާއި، އިސްތިގުލާލާއި، އަދި މުހިންމު ވަސީލަތްތަކަށް ދިން ހަމަލާތައް ބަލައިނުގަނެވޭނެ ކަމަށެވެ. އަދި، މިއީ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފު އަމަލެއް ކަމަށް ސިފަކުރައްވަމުން އޭނާ ވިދާޅުވީ، ސައުދީ އަރަބިއްޔާގެ ސަލާމަތާއި، ހަމަޖެހުމާއި، އަދި ގައުމީ މުދަލަށް އަމާޒުކޮށް ހިންގާ އެންމެހާ އަމަލުތަކާ ޖީސީސީއިން ދެކޮޅުހަދާ ކަމަށެވެ.
އިރާގުގެ ބިން ބޭނުންކޮށްގެން މި ފަދަ ހަމަލާތައް ދިނުން ހުއްޓުވުމަށް ޓަކައި އެ ގައުމުން ކުރާ މަސައްކަތްތައް ވަރުގަދަކޮށް، ހަރުދަނާ ފިޔަވަޅުތަކެއް އެޅުމުގެ މުހިންމުކަން ފާހަގަކުރައްވައި، ސަރަހައްދީ ސަލާމަތާއި ހަމަޖެހުން ގާއިމުކުރުމަށް ޓަކައި މި ފަދަ ކަންކަން ތަކުރާރުވިޔަނުދީ ހުއްޓުވުމަށް އަލްބުދަޔިވީ ވަނީ ބަޣުދާދަށް ގޮވާލައްވާފަ އެވެ. މީގެ އިތުރުން، ސައުދީ އަރަބިއްޔާގެ ސަލާމަތާއި، ހަމަޖެހުމާއި، އިސްތިގުލާލާއި، ވަސީލަތްތަކާއި، އަދި އެ ގައުމުގެ ރައްޔިތުންނާއި ރެސިޑެންޓުން ރައްކާތެރިކުރުމަށް ޓަކައި އެ ގައުމުން އަޅާ ކޮންމެ ފިޔަވަޅަކަށް ޖީސީސީގެ ފުރިހަމަ އެއްބާރުލުމާއި ތާއީދު އޮތްކަން ވެސް އޭނާ ވަނީ ކަށަވަރުކޮށްދެއްވާފަ އެވެ.
ސައުދީ އަރަބިއްޔާގެ އިސްތިރާޖީ ގޮތުން މުހިންމު ހޮޅިލައިނަކަށް ޑްރޯން ހަމަލާތަކެއް ދީފައި މި ވަނީ، ޔަމަނުގެ ހަތިޔާރުއެޅި ހޫޘީ ޖަމާއަތާއި، ޔަމަނުގެ ސަރުކާރު ފައުޖުތަކާ ދެމެދު ހަމަލާ ބަދަލުކުރުން އިތުރުވެފައިވާ ދަނޑިވަޅެއްގަ އެވެ. ހޫޘީން ވަނީ ހަމަލާތައް ފުޅާކޮށް، ރަތް ކަނޑުގެ އައްސޭރިފަށުގައި އޮތް ބައެއް ރަށްތަކަށް އެ ޖަމާއަތުގެ ބާރުގެ ދަށަށް ގެންގޮސްފަ އެވެ. ސައުދީ އަރަބިއްޔާއިން 'އީސްޓް-ވެސްޓް' ހޮޅިލައިން ބޭނުންކުރަން ފަށާފައި ވަނީ، އީރާނާ ދެކޮޅަށް އެމެރިކާއިން ފެށި ޣައިރުގާނޫނީ ހަނގުރާމައާ ގުޅިގެން އީރާނުން ހުރްމުޒް ކަނޑުއޮޅި ބަންދު ކުރުމުންނެވެ. އެމެރިކާގެ ރައީސް ޑޮނަލްޑް ޓްރަމްޕް އަޑީގައި ހުންނަވައިގެން ފެށްޓެވި މި ހަނގުރާމައާ ގުޅިގެން ދުނިޔޭގެ ހަކަތައިގެ ބާޒާރަށް ލޮޅުންއަރައި، ތެލާއި ގޭހުގެ އަގު ދަނީ އުފުލެމުންނެވެ.
މަސްދަރު: އަލް ޖަޒީރާ
