މިިހާރު ހުރްމުޒް ކަނޑުއޮޅިން ދަތުރުކުރެވެނީ ދުވާލަކު ހަތް ވަރަކަށް އުޅަނދަށް

ކުރިއާ އަޅާބަލާއިރު ހުރްމުޒް ކަނޑުއޮޅިން ދަތުރުކުރި އުޅަނދުފަހަރުގެ އަދަދު ބުރާސްފަތި ދުވަހު  ހަތަކަށް ދަށްވެފައިވާ ކަން، ކަނޑު ދަތުރުފަތުރުގެ ތަފާސްހިސާބުތައް ބަލަހައްޓާ ކުންފުނި، ކެޕްލާއިން ހާމަކޮށްފި އެވެ. އެ ކުންފުނިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި، ބުދަ ދުވަހު 11 އުޅަނދެއް އެ ސަރަހައްދުން ދަތުރުކޮށްފައިވާއިރު، މިއީ ފާއިތުވި 10 ދުވަހުގެ އެވްރެޖް އަދަދު ކަމަށްވާ 15 އަށްވުރެ ދަށް އަދަދެކެވެ.

ޖީއެމްޓީ ގަޑިން ފަތިހު 03:06 އާ ހަމައަށް ލިބިފައިވާ މައުލޫމާތަށް ބަލާއިރު، ބުރާސްފަތި ދުވަހު އެ ކަނޑުއޮޅިން ބޭރަށް ދަތުރުކޮށްފައިވާ ހަތް އުޅަނދުގެ ތެރޭގައި ހިމެނެނީ 'ޕެނަމެކްސް' ސައިޒުގެ ދެ އުޅަނދެވެ. މީގެ ތެރޭގައި އެއް އުޅަނދަކީ ގަސްކާނާ އުފުލާ އުޅަނދެއް ކަމަށާއި، އަނެއް އުޅަނދަކީ އެއްވެސް މުދަލެއް ނެތި ދަތުރުކުރި އުޅަނދެއް ކަމަށް ކެޕްލާގެ ތަފާސްހިސާބުތަކުން ދައްކަ އެވެ.

ބުރާސްފަތި ދުވަހު އެ ކަނޑުއޮޅިއަށް ވަތް ފަސް އުޅަނދުގެ ތެރޭގައި ހިމެނެނީ "ޑްރައި ބަލްކް" އުފުލާ ޕެނަމެކްސް ސައިޒުގެ އުޅަނދަކާއި، ދަގަނޑު ބަރުކޮށްފައިވާ "ހޭންޑީސައިޒް" އުޅަނދަކާއި، ގޮދަން ފަދަ ގޮވާން އުފުލާ ހޭންޑީސައިޒް އުޅަނދެއްގެ އިތުރުން، ސާފުނުކުރާ ތެޔޮ އުފުލާ މީޑިއަމް ރޭންޖްގެ ޓޭންކަރަކާއި ޑްރައި ގުޑްސް އުފުލާ "ސުޕްރަމެކްސް" ސައިޒުގެ އުޅަނދެކެވެ. މި ތަފާސްހިސާބުތަކުގައި، ދަތުރުކުރާ މަގު އޮޅުވާލުމަށް ޓަކައި 'އޮޓޮމެޓިކް އައިޑެންޓިފިކޭޝަން ސިސްޓަމް' (އޭއައިއެސް) ނިއްވާލައިގެން އެ ކަނޑުއޮޅި ހުރަސްކޮށްފައިވާ އުޅަނދުފަހަރުގެ މައުލޫމާތެއް ނުހިމެނޭ ކަމަށް ކެޕްލާއިން ބުންޏެވެ.

ފެބުރުވަރީ މަހުގެ 28 ވަނަ ދުވަހު އީރާން ހަނގުރާމަ ފެށުމުގެ ކުރިން، ހުރްމުޒް ކަނޑުއޮޅިން ދުވާލަކު އެވްރެޖްކޮށް ވިޔަފާރިކުރާ 125 ބޮޑެތި އުޅަނދު ދަތުރުކުރެ އެވެ. މީގެ ތެރޭގައި ތެޔޮ ޓޭންކަރުތަކާއި، ގޭސް އުފުލާ އުޅަނދުތަކާއި، މުދާ އުފުލާ ބޯޓުފަހަރުގެ އިތުރުން ކޮންޓޭނަރު އުފުލާ އުޅަނދުތައް ހިމެނޭއިރު، މިއީ ދުނިޔޭގައި ދުވާލަކު ބޭނުންކުރާ ސާފުނުކުރާ ތެލާއި އެލްއެންޖީގެ ގާތްގަނޑަކަށް 20 އިންސައްތަ އެވެ. ޖުލައި މަހުގެ މެދުތެރޭގައި އެމެރިކާއިން އީރާނާ ގުޅުންހުރި އުޅަނދުފަހަރަށް އަލުން ދަތިކުރުމުގެ ފިޔަވަޅުތައް އަޅައި، ކަނޑުގެ މަގުން ހުރަސްތައް ކުރިމަތިކުރުމާ ގުޅިގެން، އީރާނުން ބޭރުކުރާ ސާފުނުކުރާ ތެލުގެ ވިޔަފާރި ވަނީ މެދުކެނޑިފައި އެވެ.

ރަތް ކަނޑުގެ ސަރަހައްދުގައި، އީރާނަށް ތާއީދުކުރާ ހޫޘީ ހަނގުރާމަވެރިން ބުރާސްފަތި ދުވަހު ޔަމަނުގެ ބަނދަރު ރަށެއް ކަމަށްވާ މައްޚާގެ ކޮންޓްރޯލް ނަގާފައިވާ ކަމަށާއި، ރަތް ކަނޑުގެ އައްސޭރިފަށުން ކުރިއަށް ގޮސް އިސްތިރާތީޖީ ގޮތުން މުހިންމު ރަށްތަކަކަށް އެ ޖަމާއަތުގެ ހަނގުރާމަވެރިން އަރާފައިވާ ކަމަށް އަސްކަރީ މަސްދަރުތަކުން ބުނެ އެވެ. ކަނޑު ދަތުރުފަތުރުގެ ތަފާސްހިސާބުތަކުން ދައްކާ ގޮތުގައި، ބުރާސްފަތި ދުވަހު ބާބުލް މަންދަބު ކަނޑުއޮޅިން މުދާ އުފުލާ 26 އުޅަނދެއް ދަތުރުކޮށްފައިވެ އެވެ. މީގެ ތެރޭގައި 10 އުޅަނދެއް އެ ސަރަހައްދަށް ވަދެފައިވާއިރު، 16 އުޅަނދެއް ވަނީ އެ ސަރަހައްދުން ބޭރުވެފަ އެވެ.