އެކި ބޭނުންތަކަށް ފަޅުރަށްރަށާއި ފަޅު ކުއްޔަށްދިނުމުގެ އުސޫލުތައް ބަޔާންކުރާ ބިލު ތަޞްދީޤުކުރެއްވުމާއެކު، ފަޅުރަށްރަށުގެ ކުލި ބޮޑުކޮށް ރައީސުލްޖުމްހޫރިއްޔާއަށް ބޮޑެތި ބާރުތަކެއް ލިބިއްޖެ
31 އޯގަސްޓު 2026 | ހޯމަ 12:01މި ބިލުގެ ދަށުން އިޤްތިޞާދީ އަދި އިޖްތިމާޢީ އެކި ބޭނުންތަކަށް ރަށްތައް ކަނޑައެޅުމުގެ އިޖުރާއަތްތައް ބަޔާންކޮށްފައިވާއިރު، މީގެ ކުރިން އަމަލުކުރަމުން އައި ފަޅުރަށްރަށާބެހޭ ޤާނޫނު މިހާރު ވަނީ އުވިފައި
ރައީސުލްޖުމްހޫރިއްޔާ، ފަޅުރަށާއި ފަޅު ކުއްޔަށްދިނުމާބެހޭ ބިލު ތަސްދީޤުކުރައްވަނީ | ރައީސް އޮފީސް
އެކި ބޭނުންތަކަށް ފަޅުރަށްރަށާއި ފަޅު އެކަށައެޅުމުގެ ބާރު ރައީސް އަށް ލިބޭ ގޮތަށް ދިވެހިރާއްޖޭގެ ފަޅުރަށްރަށާއި ވަކި ރަށަކާ ގުޅިފައިނުވާ ފަޅުގެ ސަރަޙައްދުތައް އެކިއެކި ބޭނުންތަކަށް އެކަށައެޅުމާއި، ކުއްޔަށްދިނުމާއި، ވަރުވާއަށް ލިޔެދިނުމާގުޅޭ އުސޫލުތައް ބަޔާންކުރާ "ފަޅުރަށާއި ފަޅު ކުއްޔަށްދިނުމާބެހޭ ބިލު" ރައީސް ޑރ. މުޙައްމަދު މުޢިއްޒު މިއަދު ތަސްދީޤުކުރައްވައިފި އެވެ. ރައީސުލްޖުމްހޫރިއްޔާ މި ބިލު ތަޞްދީޤުކުރައްވާފައިވަނީ، މިކަމަށްޓަކައި މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި ޚާއްޞަ ރަސްމިއްޔާތެއްގަ އެވެ.
މިއީ 2026 އޯގަސްޓް 26 ވީ ބުދަދުވަހު އޮތް، ރައްޔިތުންގެ މަޖިލީހުގެ، 2026 ވަނަ އަހަރުގެ ދެވަނަ ދައުރުގެ 28 ވަނަ ޖަލްސާއިން ފާސްކުރެއްވި ބިލެކެވެ.
މި ބިލުގައި، ޓޫރިޒަމް ނޫން އެހެނިހެން އެކި ބޭނުންތަކަށް ދޫކުރެވޭ ފަޅުރަށްރަށް ކުއްޔަށް ދޫކުރުމުގެ އުސޫލުތަކާއި، އެ ތަންތަން ކުއްޔަށްދިނުމުގައި ޢަމަލުކުރާނެ ޝަރުޠުތަކާއި އިޖުރާތުތައް ބަޔާންކުރައްވާފައިވެ އެވެ. އެގޮތުން، އިޤްތިޞާދީ، ސިނާއީ އަދި އިޖްތިމާޢީ ކަންކަން ފަދަ އެކި ބޭނުންތަކަށް ފަޅުރަށްރަށާއި ފަޅު ކަނޑައެޅުމާއި، ވަކި ޚާއްޞަ ބޭނުމަކަށް ކަނޑައެޅިފައިނުވާ ފަޅުރަށްރަށް، ބެލެހެއްޓުމަށްޓަކައި ވަރުވާއަށް ލިޔެދިނުމުގެ އުސޫލުތަކާއި އިޖުރާތުތައް ބަޔާންކޮށްފައިވެ އެވެ.
ފަޅުރަށްރަށަށް މިހާރު ކުލި ނަގަމުން އަންނަނީ އަކަމީޓަރަކަށް 10 ލާރީގެ މަގުންނެވެ. ނަމަވެސް ސިނާއީ ބޭނުމަށާއި އިޤްތިޞާދީ ބޭނުމަށް އަކަމީޓަރަކަށް 3 ރުފިޔާ، މަސްވެރިކަމާއި ދަނޑުވެރިކަމުގެ ބޭނުމަށް އަކަމީޓަރަކަށް 2 ރުފިޔާ 50 ލާރި، އަދި އިޖްތިމާއީ ބޭނުމަށް އަކަމީޓަރަކަށް 2 ރުފިޔާގެ ރޭޓުން ކުލިނެގުމަށް ވަނީ ބިލުގައި ކަނޑައަޅައިފަ އެވެ. މީގެ އިތުރުން، ވަރުވާއަށް ދޫކުރުމަށް ކަނޑައަޅައިފައިވަނީ އަކަމީޓަރަކަށް އަހަރަކަށް 2 ރުފިޔާގެ ރޭޓުން ކުލިނަގާ ގޮތަށެވެ.
ބިލުގައި ކަނޑައަޅައިފައިވާ ނިޒާމުގެ ދަށުން އެކި ބޭނުންތަކަށް ދޫކުރެވޭ ފަޅުރަށްރަށާއި ފަޅު އެކަށައަޅުއްވާނީ ރައީސުލްޖުމްހޫރިއްޔާ އެވެ. ފަތުރުވެރިކަމާއި، ސިނާއީ ބޭނުމަށާއި ދައުލަތުގެ ބޭނުމަށް ފިޔަވައި ކައުންސިލުތަކުގެ އިޚްތިޞާޞްގައި ހިމެނޭ ފަޅުރަށްރަށް އެކި ބޭނުންތަކަށް އެކަށައަޅާނީ ކައުންސިލު ތަކުންނެވެ.
މި ބިލުގައި ބަޔާންކުރާ ކަންކަމަށް ޢަމަލުކުރަން ފަށާނީ މި ބިލު ތަޞްދީޤުކުރައްވައި ދިވެހިސަރުކާރުގެ ގެޒެޓުގައި ޝާއިޢުކުރާތާ 30 ދުވަސް ހަމަވާ ތާރީޚުން ފެށިގެންނެވެ. މިއާއެކު، ކުރިން ޢަމަލުކުރަމުން އައި ޤާނޫނު ނަންބަރު 98/20 (ދިވެހިރާއްޖޭގެ ފަޅުރަށްރަށާބެހޭ ޤާނޫނު) އުވުނީ އެވެ.
