ނައިޖަރުގެ ވެރިރަށް ނިއާމޭގެ އެކި ސަރަހައްދުތަކުން ބަޑީގެ އަޑާއި ބާރުގަދަ ގޮވުންތަކެއްގެ އަޑު ރިޕޯޓުކޮށްފި

ނައިޖަރުގެ ވެރިރަށް ނިއާމޭގެ އެކި ސަރަހައްދުތަކުން ބަޑީގެ އަޑާއި ބާރުގަދަ ގޮވުންތަކެއްގެ އަޑު އިވިފައިވާ ކަމަށް ރޮއިޓާސްގެ ދެ މަންޒަރުދުރުން ރިޕޯޓުކޮށްފި އެވެ. ނަމަވެސް މި ހާދިސާ ހިނގަން މެދުވެރިވި ސަބަބެއް އަދި ސާފެއް ނުވެ އެވެ.

ހޮނިހިރު ދުވަހުގެ ފަތިހުގެ ވަގުތެއްގައި ހިނގި މި ހާދިސާއަކީ، މިއަހަރުގެ ތެރޭގައި ނިއާމޭ ސިޓީއަށާއި، ހާއްސަކޮށް ބައިނަލްއަގުވާމީ އެއާޕޯޓާއި އަސްކަރީ ވައިގެ މަރުކަޒު ހިމެނޭ ސަރަހައްދަށް ކުރިމަތިވި މިފަދަ ތިންވަނަ ހަމަލާ އެވެ. މިއީ 2023 ވަނަ އަހަރު ބަޣާވާތަކުން ވެރިކަމަށް އައި އަސްކަރީ ސަރުކާރުން ގައުމުގެ އަމާންކަން ގާއިމުކުރާނެ ކަމަށް ބުނި ނަމަވެސް، އެ ގައުމުގެ ސަލާމަތީ ނާމާންކަން އޮތް މިންވަރު ހާމަކޮށްދޭ ކަމެކެވެ.

ސަލާމަތީ ބާރުތަކުގެ މަސްދަރަކުން ރޮއިޓާސްއަށް މައުލޫމާތު ދިން ގޮތުގައި، "ޓެރަރިސްޓުން" ވަނީ އެ ސިޓީގެ ދިއޯރީ ހަމާނީ ބައިނަލްއަގުވާމީ އެއާޕޯޓަށް ހަމަލާދީ، ރިޔާސީ ގަނޑުވަރުގެ ވަށައިގެންވާ ސަލާމަތީ ފަށަލަ ފޫއަޅުވާލަން މަސައްކަތް ކޮށްފަ އެވެ.

"ނިއާމޭގައި ހުންނަ ބޭސް 101 ސަރަހައްދުން ބާރުގަދަ ބަޑީގެ އަޑާއި ގޮވުންތަކުގެ އަޑު އިވެމުންދޭ،" އެ ސަރަހައްދުގައި ދިރިއުޅޭ މީހަކު އޭއެފްޕީ ނިއުސް އެޖެންސީއަށް ކިޔައިދީފައިވެ އެވެ. ނިއާމޭގެ މުހިންމު އަސްކަރީ މަރުކަޒެއް ކަމަށްވާ ބޭސް 101 އަށް ހަމަލާދިންކަން އެހެން ބައެއް މަންޒަރުދުރުންވެސް ވަނީ ކަށަވަރުކޮށްދީފަ އެވެ.

ނައިޖަރުގެ ކޮންސަލްޓޭޓިވް ކައުންސިލްގެ މެންބަރު އަދި އެލަޔަންސް އޮފް ސަހޭލް ސްޓޭޓްސް (އޭއީއެސް) ޕާލަމެންޓުގެ މެންބަރު ބާނާ ވަގާނާ އިބްރާހީމް ފޭސްބުކްގައި ވިދާޅުވީ، ހަމަލާދިން މީހުން އަމާޒުކުރީ ބޭސް 101 އަށް ކަމަށާއި، ނަމަވެސް ސަލާމަތީ ބާރުތަކުން މިހާރު އެތަނުގެ ކޮންޓްރޯލް ހޯދާފައިވާ ކަމަށެވެ.

"ބޭސް 101 އަށް ދިން ފިނޑި ހަމަލާއެއް މިއީ. އަނެއްކާވެސް އަޅުގަނޑުމެންގެ ދިފާއީ އަދި ސަލާމަތީ ބާރުތަކުން ވަނީ އެކަން ހުއްޓުވާފައި. މިހާރު ހާލަތު އޮތީ ކޮންޓްރޯލްގެ ދަށުގައި،" އިބްރާހީމް ލިޔުއްވާފައިވެ އެވެ.

ނަމަވެސް، ސަލާމަތީ މަސްދަރުތަކުންނާއި އިބްރާހީމް ދެއްވި މި މައުލޫމާތުތަކުގެ ސައްހަކަން މިހާތަނަށް މިނިވަންކަމާއެކު ކަށަވަރު ކުރެވިފައި ނުވާ ކަމަށް ރޮއިޓާސްއިން ބުނެ އެވެ.

ސަލާމަތީ ބާރުތަކުގެ ދެވަނަ މަސްދަރަކުން ރޮއިޓާސްއަށް ބުނީ، ސަލާމަތީ ބާރުތަކުން މިހާރު ފާސްކުރުމުގެ އޮޕަރޭޝަނެއް ފަށާފައިވާ ކަމަށާއި، ހަމަލާދިން ބައެއް މީހުން "ނައްތާލާފައިވާ" އިރު، އަނެއް ބަޔަކު ފިލާފައިވާ ކަމަށެވެ.

މަންޒަރު ދުށް އިތުރު މީހަކު ބުނި ގޮތުގައި، ރިޔާސީ ގަނޑުވަރު ހިމެނޭ ސަރަހައްދުގައި ވަރަށް ގިނަ އިރުވަންދެން ބާރުގަދަ ބަޑީގެ ހަމަލާތަކެއް ބަދަލުކޮށްފައިވެ އެވެ.

އިންޓަނެޓުގައި ދައުރުވަމުންދާ ވީޑިއޯތަކުން ފެންނަ ގޮތުގައި، އެއާޕޯޓު ކައިރީގައިވާ އަވަށްތަކުގެ ސަލާމަތީ ކަންކަން ވަރުގަދަކުރުމަށްޓަކައި އަސްކަރީ ލޮރީތަކާއި އާމަޑް ވެހިކަލްތައް ވަނީ އެ ސަރަހައްދަށް ނެރެފަ އެވެ.

ރޭގަނޑުގެ ވަގުތުގައި ނިއާމޭގައި ހިނގި ބަޑިޖެހުމުގެ ހާދިސާތަކާ ގުޅިގެން، ނައިޖަރުގެ ގައުމީ ޓީވީ ސްޓޭޝަނުގެ މެދުކަނޑާލާފައިވާ ކަމަށް އެ ސިޓީގެ ރައްޔިތުން އޭއެފްޕީއަށް މައުލޫމާތު ދީފައިވެ އެވެ.

ޖީއެމްޓީން ހެނދުނު 08:00 ހާއިރު، ސެޓެލައިޓް އަދި އޮންލައިންކޮށް ދައްކަމުންދިޔަ "ޓެލެ ސަހޭލް" ގެ ޕްރޮގްރާމްތައް މެދުކެނޑި، ސްކްރީން ވަނީ ކަޅުވެފަ އެވެ. މީގެ އިތުރުން، ސިފައިން ވަނީ ރިޔާސީ ގަނޑުވަރާއި ގައުމީ ޓީވީގެ މައި މަރުކަޒަށް ވަދެނިކުމެވާ މަގުތައް ބަންދުކޮށްފައި ކަމަށްވެސް ރިޕޯޓުތައް ބުނެ އެވެ.

ނައިޖަރުގެ އަސްކަރިއްޔާއިން ވަނީ ރައްޔިތުން ކެތްތެރިކަން އިސްކުރުމަށާއި، ކަށަވަރުނުވާ މައުލޫމާތު ނުފެތުރުމަށް އިލްތިމާސްކޮށްފަ އެވެ. އަދި ގައުމުގެ ދިފާއީ އަދި ސަލާމަތީ ބާރުތައް މިހާރު ހަރަކާތްތެރިވަމުންދާ ކަމަށްވެސް ބުނެފައިވެ އެވެ.

ނިއާމޭ އެއާޕޯޓަށް މިއަހަރުގެ ތެރޭގައި މީގެ ކުރިން ދެ ފަހަރަކު ހަތިޔާރު އެޅި ގްރޫޕްތަކުން ހަމަލާދީފައިވެ އެވެ. އެއީ ޖެނުއަރީ މަހު އައިއެސްއައިއެލްއާ ގުޅުން އޮންނަ "އިސްލާމިކް ސްޓޭޓް އިން ދަ ސަހޭލް" އިން ދިން ހަމަލާއަކާއި، ޖޫން މަހު އަލްގައިދާއާ ގުޅުން އޮންނަ "ޖޭއެންއައިއެމް" އިން ދިން ހަމަލާއެކެވެ.

ނައިޖަރަކީ ޔުރޭނިއަމް، ތެޔޮ އަދި ރަނުގެ މުއްސަނދިކަން ލިބިފައިވާ ހުޅަނގު އެފްރިކާގެ ގައުމެކެވެ. އެ ގައުމުގައި އަސްކަރީ ވެރިކަމެއް ކުރަން ފެށީ 2023 ވަނަ އަހަރުގެ ޖުލައި މަހު ގެނައި ބަޣާވާތެއްގައި އޭރުގެ ރައީސް މުހައްމަދު ބަޒޫމް މަގާމުން ދުރުކުރުމަށްފަހު އެވެ.

ޖެނެރަލް އަބްދުއްރަހްމާން ޗިއާނީގެ އަސްކަރީ ސަރުކާރުން ވެރިކަމާ ހަވާލުވި ފަހުން، ހުޅަނގުގެ ގައުމުތަކާ އޮތް ގުޅުން ކަނޑާލައި، ރަޝިޔާއާއެކު އޮންނަ ގުޅުން ވަނީ ވަރުގަދަކޮށްފަ އެވެ. އަދި ސަރަހައްދީ ޖަމިއްޔާ "އިކޯވާސް" އިން ވަކިވެ، މާލީ އަދި ބުރުކީނާ ފާސޯއާއެކު އޭއީއެސް އިއްތިހާދުގައި ވަނީ ބައިވެރިވެފަ އެވެ.