އާންމުކޮށް ފިލްމު ދެއްކުން ގާތްގަނޑަކަށް 35 ވަރަކަށް އަހަރަށް ވުރެ ދިގު މުއްދަތަކަށް މަނާވެފައި އޮތް އޮތުން ނިމުމަކަށް ގެނެސް ސައުދީ އަރަބިއްޔާގައި ފުރަތަމަ ފަހަރަށް އާއްމު ސިނަމާއެއް ހުޅުވައިފިއެވެ.

ސައުދީގެ ޕަބްލިކް އިންވެސްޓްމެންޓުގެ ސަބްސިޑިއަރީ ކުންފުންޏެއްކަމަށްވާ ދި ޑިވެލޮޕްމެންޓް އެންޑް އިންވެސްޓްމެންޓް އެންޓަރޓެއިން ކޮމްޕެނީއާއި އޭއެމްސީ އެންޓަރޓެއިންމެންޓް ގުޅިގެން ހުޅުވި މި ސިނަމާ ހުޅުވާފައިވަނީ ރިޔާދްގައި ހުންނަ ކިންގް އަބްދުﷲ ފައިނޭންޝަލް ޑިސްޓްރިކްޓްގައެވެ.

ސައުދީއާއި އެ ގައުމުން ބޭރުގެ އެތައް މެހެމާނުންނެއް ހާޒިރުވި މި ރަސްމިއްޔާތުގައި ސިނަމާގައި ފުރަތަމަ އަޅުވާފައިވަނީ މާވެލްގެ ސުޕަހީރޯ ފިލްމު ބްލެކް ޕެންތާއެވެ.

އޭއެމްސީ އެންޓަރޓެއިންމެންޓްގެ ސީއީއޯ އަޑަމް އޭރޮން ވިދާޅުވީ އޭއެމްސީއިން ދުނިޔޭގެ އެކި ކަންކޮޅުތަކުގައި 1،000 ތިއޭޓަރާއި 11،000 އަށްވުރެ ގިނަ ސްކްރީން އޮޕަރޭޓް ކުރާ ކަމަށާއި ނަަމަވެސް ސައުދީގައި ހުޅުވުމުން ލިބުނު ފަދަ ސަމާލު ކަމެއް ލިބިފައި ނުވާ ކަމަށެވެ. އެހެންކަމުން އެއީ ހަގީގަތުގައިވެސް ތާރީޚީ ހަރަކާތެއް ކަމަށް އޭނާ ވިދާޅުވިއެވެ.

އިގްތިސާދީ އިޖުތިމާއީ ބަދަލުތަކާއިއެކު އެކުލަވާލާފައިވާ ވިޝަން 2030 ދަށުން ސައުދީ އަރަބިއްޔާގައި އެތައް ސަތޭކަ ސިނަމާ ބިނާކުރަން ވަނީ ނިންމާ ފައެވެ.

ރޮއިޓާސް އިން ބުނެފައިވާ ގޮތުގައި 2030 އާ ހަމައަށް ދެ ހާސް ސްކްރީން އާއެކު ތިން ސަތޭކަ ސިނަމާ ބިނާ ކުރަން ސައުދީ ސަރުކާރުން ވަނީ ނިންމާފައެވެ.

ސައުދީ ސަރުކާރުން އުއްމީދު ކުރަނީ ސިނަމާގެ ޚިދުމަތުގެ ތެރެއިން ސައުދީ އިގްތިސާދަށް 24 ބިލިއަން ޑޮލަރު ލިބޭނެ ކަމަށެވެ. އަދި ތިރީސް ހާސް ވަޒީފާ އުފެދިގެން ދާނެ ކަމަށެވެ.