‎‏ނައިޖަރުގެ ޖަންތާ އިން އެމެރިކާއާއެކު އޮންނަ އަސްކަރީ ގުޅުން ކަނޑާލައިފި‏‎

ނައިޖަރުގެ ޖަންތާއިން އެމެރިކާއާއެކު ހަދާފައިވާ އަސްކަރީ ގުޅުން ކަނޑާލައިފި‎އެވެ.

‎ނައިޖަރުގެ ޖަންތާ އިން ހޮނިހިރު ދުވަހު ކުރި އިއުލާނެއްގައި ބުނެފައި ވަނީ 2012 ވަނަ އަހަރު އެމެރިކާއާއެކު ހެދި ދިފާއީ އެއްބާރުލުން ‎‎ދިނުމުގެ އެއްބަސްވުން ބާތިލްކޮށްފައިވާ ކަމަށެވެ.‎

‎ނައިޖަރުގެ ސަރުކާރުގެ ތަރުޖަމާނު އަމާޑޫ އަބުދުރަމާނޭ ގައުމީ ޓީވީގައި ދެއްވި ބަޔާނެއްގައި ވިދާޅުވެފައިވަނީ، ނައިޖަރުގެ ރައްޔިތުންގެ ‎‎އުއްމީދުތަކާއި މަސްލަހަތަށް ރިއާޔަތްކޮށް، އެމެރިކާގެ އަސްކަރީ ސިފައިންނާއި އެމެރިކާގެ ޑިފެންސް ޑިޕާޓްމަންޓުގެ މަދަނީ ‎‎މުވައްޒަފުންނަށް ނައިޖަރުގެ ސަރަހައްދުގައި ހުއްދަ ދިން އެއްބަސްވުން ވަގުތުން ވަގުތަށް އުވާލަން ނައިޖަރުގެ ސަރުކާރުން ‎‎ޒިންމާދާރުކަމާއެކު ނިންމާފައިވާ ކަމަށެވެ.‎

‎މިފިޔަވަޅު އެޅީ އެފްރިކަން އެފެއާޒްގެ އަންޑަރ ސެކްރެޓަރީ އޮފް ސްޓޭޓް މޯލީ ފީ އިސްވެ ހުންނަވައިގެން އެމެރިކާގެ އަސްކަރިއްޔާގެ އިސް ‎‎އޮފިޝަލުންގެ ވަފުދެއް މިހަފްތާގެ ކުރީކޮޅު ނިއަމޭއަށް ކުރެއްވި ޒިޔާރަތަކާ ގުޅިގެންނެވެ.‎

‎އަބުދުރަމާނޭ ތުހުމަތު ކުރެއްވި ގޮތުގައި އެމެރިކާގެ އޮފިޝަލުން ޑިޕްލޮމެޓިކް ޕްރޮޓޮކޯލަށް އަމަލު ނުކުރާ ކަމަށާއި ވަފުދުއެކުލެވިގެންވާ ‎‎ގޮތުގެ މައުލޫމާތު ނައިޖަރަށް އަންގާފައި ނުވާ ކަމަށެވެ.‎

‎އަދި ޓެރަރިޒަމާ ދެކޮޅަށް ހަގީގަތުގައި ވެސް އެހީތެރިކަން ފޯރުކޮށްދިނުމުގެ ގާބިލުކަން ލިބިފައިވާ ބައިވެރިންނާއި ޕާޓްނާޝިޕްތައް ‎‎ކަނޑައެޅުމުގެ ހައްގު އެމެރިކާގެ ވަފުދުން ނިގުޅައިގަތުން އެމެރިކާގެ ވަފުދުގެ ވިސްނުމާ މެދު ނައިޖަރު ހިތާމަކުރާ ކަމަށް އޭނާ ވިދާޅުވި ‎‎އެވެ.‎

‎މިދިޔަ ޖުލައި މަހު ރައީސް މުހައްމަދު ބަޒޫމް މަގާމުން ދުރުކުރުމާ ގުޅިގެން ޖުންޓާއިން ވަނީ ފަރަންސޭސި ސިފައިން އަނބުރާ ‎‎ގެންދިއުމަށް ގޮވާލައިފައެވެ.‎

‎ނަމަވެސް އެމެރިކާއިން ވަނީ އުތުރުގެ އަގަޑޭޒްގައި 1،000 ސިފައިންނާއެކު ޑްރޯން ބޭސްއެއް ގާއިމް ކޮށްފައެވެ.‎

‎އަބުދުރަމާނޭ ވިދާޅުވީ ނައިޖަރުގެ ސަރަހައްދުގައި އެމެރިކާ ސިފައިން ތިބުމަކީ ގާނޫނާ ހިލާފު ކަމެއް ކަމަށް ސަރުކާރުން ދެކެނީ ‎‎"ޑިމޮކްރެޓިކް ގޮތުން ހުއްދަ ދީފައި ނުވާތީ އާއި ނައިޖަރުގެ މައްޗަށް ނުރަނގަޅު ޝަރުތުތަކެއް އެޅިފައި އޮތުމުން، ހާއްސަކޮށް އަސްކަރީ ‎‎ހަރަކާތްތަކުގައި ދެފުށް ފެންނަ ގޮތެއް ނެތުމުން" ކަމަށެވެ.‎

‎ނައިޖަރުގެ އަސްކަރިއްޔާއިން ވަނީ މިދިޔަ އަހަރު އީޔޫއާއެކު ހަދާފައިވާ ސަލާމަތީ އަދި ދިފާއީ ދެ ޕާޓްނަޝިޕް ވެސް ކެންސަލްކޮށްފަ އެވެ.‎

‎މިދިޔަ ޑިސެމްބަރު މަހު ހުޅަނގު އެފްރިކާގެ ނައިޖަރުއާއި ރަޝިއާއިން ވަނީ ދިފާއީ ގުޅުން ބަދަހިކުރުމުގެ އެއްބަސްވުމެއްގައި ސޮއިކޮށްފައެވެ.‎

‎ނައިޖަރުގެ ކުރީގެ ސަރުކާރުތަކުގައި އެމެރިކާ ސިފައިން ވަނީ ޓެރަރިޒަމާ ދެކޮޅަށް ނައިޖަރުގެ ސިފައިން ތަމްރީނުކޮށްފައެވެ.‎