ފެންބޮޑުވި ސަރަހައްދުތަކުން ފެން ހިނދުނު ނަމަވެސް އަދިވެސް ސަމާލުވާން ޖެހޭ: ލަންކާ ޑިޒާސްޓަރ އޮފީސް

ނިމިދިޔަ ހަފްތާއިން ފެށިގެން އަވަށްޓެރި ސްރީ ލަންކާއަށް ކުރަމުންދާ ވިއްސާރައިގައި ފެންބޮޑުވި ސަރަހައްދުތަކުން ފެން ހިނދެމުން ދިޔަނަމަވެސް، ވިއްސާރައިގެ ސަބަބުން ކުރިމަތިވާނެ ކަމަށް ބެލެވުނު ނުރައްކާތަކަށް އަދިވެސް ސަމާލުވާން ޖެހޭނެ ކަމަށް ލަންކާގެ ކާރިސާތަކާއި ބެހޭ އިދާރާއިން ބުނެފިއެވެ.

ލަންކާ ޑިޒާސްޓަރ މެނޭޖްމަންޓް ސެންޓަރުން ބުނީ ވިއްސާރައިގެ އަސަރުކުރި އުސް ހިސާބުތަކުގައި ބިންގަނޑު ކަނޑައިގެން ދިޔުމުގެ ބިރު އަދިވެސް އެބައޮތް ކަމަށެވެ. މޫސުން ގޯސްވުމުގެ ސަބަބުން ރެޑް އެލަރޓް ނެރުނު ކަލުތާރަ، ގޯލް، ރަތުނަޕޫރާ، ކެގޯލް އަދި ނުވަރައެލިޔާގައި އަދިވެސް ރެޑް އެލަރޓް ކެންސަލްކޮށްފައެވެ. ބިންގަނޑު ކަނޑައިގެން ގޮސްދާނެކަމުގެ ބިރު އޮތުމުން މި ޑިސްޓްރިކްޓްތަކުގެ ބައެއް ގެތަކުން މީހުން ރައްކާތެރި ހިސާބުތަކަށް ގެންގޮސްފައިވާއިރު، އެގޭގެއަށް އަނބުރާ ދިޔުން އަދި ރައްކާތެރި ނޫންކަމަށް އޮފިޝަލުން ބުނެއެވެ.

ބޮޑެތި ކޯރުތަކުގެ ތެރެއިން ކެލަނި ގަންގާ، ގިންގު ގަންގާ، ނިލްވަލަ ގަންގާ، މަހާވެލި ގަންގާ، މަލްވައްތު އޮޔާ އަދި މަހާ އޮޔާގައި ވިއްސާރައިގެ ތެރޭގައި އާދަޔާ ޚިލާފަށް ފެންގަނޑު އުފުލުނު ނަމަވެސް، މިހާރު އާއްމު ވަރަކަށް ފެންގަނޑު ތިރިވެފައިވާކަމަށް ރިޕޯޓްތައް ބުނެއެވެ. އެހެން ނަމަވެސް ކަލުތާރަ ޑިސްޓްރިކްޓާއި، ދުނަމަލީ، ޖާއެލާ އަދި ޕުއްތަލަމް ގައި ހުރި ބައެއް ކޯރުތަކުގެ ފެންގަނޑު އުފުލުނު ގޮތަށް އަދި ހިނދެން ފަށާފައެއް ނުވެއެވެ.

ލަންކާއަށް މޫސުންް ގޯސްވެ، މިހާތަނަށް 23 މީހަކު މަރުވެފައިވެއެވެ. މި މީހުން މަރުވެފައިވަނީ ހޮނު އެޅުމުގެ ސަބަބުންނާއި، ވައި ގަދަވުމުގެ ސަބަބުން ގަސްތައް ވެއްޓި، ގަސްތަކުގެ ދަށުވެެގެންނެވެ. މީގެ އިތުރުން ގެނބިގެންވެސް ބައެއް މީހުން ވަނީ މަރުވެފައެވެ. ބޯކޮށް ވާރޭ ވެހި، މޫސުން ގޯސްވެ، ބިންގަނޑު ކަނޑައިގެން ދިޔުމާއި ކިސަޑު ފޭބުމުގެ ޙާދިސާތަކުން ސަލާމަތްކުރުމަށް 55،000 މީހުން މިހާރުވަނީ ވަގުތީ ކޭމްޕްތަކަށް ގެންދެވިފައެވެ. ޖުމްލަ 150،000 އަށް ވުރެ ގިނަ މީހުންނަށް މި ވިއްސާރައިގެ ސަބަބުން ގެއްލުން ލިބިފައިވެއެވެ.

ލަންކާގެ މޫސުމާއި ބެހޭ އިދާރާއިން ބުނީ ލަންކާގެ ހުޅަނގާއި ދެކުނުގެ ހިސާބުތަކަށް ކުރިއަށް އޮތް ދުވަސްތަކުގައިވެސް ވިއްސާރަވެ، އާދަޔާ ޚިލާފަށް ވައިގަދަވާނެކަމަށެވެ. އަދި އައްސޭރިފަށުގެ ހިސާބުތަކަށާއި، އައްސޭރިފަށާއި ކައިރި ހިސާބުތަކުގެ ކަނޑުގެ ސަރަހައްދުތަކަށް ގަޑިއަކު 60 ކިލޯމީޓަރާއި 70 ކިލޯމިޓަރާއި ދެމެދުގެ ބާރުމިނެއްގައި ވައިޖެހޭނެކަމަށް ލަފާކުރެވޭކަމަށް ލަންކާ މެޓް އޮފީހުން ބުނެއެވެ.

ކޮންމެ އަހަރަކުވެސް މެއި އަދި އެޕްރީލްގައި ހޫނު ގަދަވުމަށްފަހު، މިދުވަސްވަރަކީ ލަންކާއަށް ވިއްސާރަ ދުވަސްވަރެކެވެ. މޫސުން ގޯސްވެ، ބައެއް މީހުން މަރުވި ނަމަވެސް، ލަންކާގައި ދިރިއުޅޭ އެއްވެސް ދިވެއްސަކަށް މޫސުން ގޯސްވުމުގެ ސަބަބުން އެއްވެސް ގެއްލުވުމެއް އަދި ލިބިފައެއް ނުވެއެވެ. ވެރިރަށް ކޮޅުނބާއި ކޮޅުނބުގެ ވަށައިގެންވާ ހިސާބުތަކުގައި ދިރުއުޅޭ ބައެއް ދިވެހިން ބުނީ ދޭތެރެދޭތެރެއިން ވިއްސާރައިގެ ސަބަބުން ކަރަންޓު ކަނޑައިގެންދާކަަމަށެވެ.