ނައިޖަރުގެ ވެރިރަށް ނިއާމޭގެ އެއާޕޯޓަށް ބަޑީގެ ވަރުގަދަ ހަމަލާތަކެއް ދީފި

ނައިޖަރުގެ ވެރިރަށް ނިއާމޭގައި ހުންނަ އެއާޕޯޓް ސަރަހައްދުން ބަޑީގެ ހަމަލާތަކެއްގެ އަޑު އިވިފައިވާ ކަމަށް އެ ސިޓީގެ ރައްޔިތުންނާ ހަވާލާދީ ރިޕޯޓްކޮށްފިއެވެ.

އެ ގައުމުގެ ގަޑިން ހެނދުނު 06:00 (ޖީއެމްޓީން 05:00) ހާއިރު ފެށުނު މި ހަމަލާތައް ގަޑިއިރަކަށް ދެމިގެންދިޔަ ކަމަށް ރޮއިޓާސް ނިއުސް އެޖެންސީން ބުނެފައިވެއެވެ. އަދި ބަޑީގެ އަޑުގެ އިތުރުން ގޮވުންތަކެއްގެ އަޑުވެސް އިވިފައިވާ ކަމަށް އެ އެޖެންސީން ރިޕޯޓްކޮށްފައިވެއެވެ.

އޭއެފްޕީ ނިއުސް އެޖެންސީއަށް މައުލޫމާތު ދިން ދެ މީހަކު ބުނި ގޮތުގައި، ބަޑީގެ ހަމަލާތައް އަމާޒުވެފައިވަނީ ނިއާމޭ އެއާޕޯޓަށް ވަންނަ ދޮރާށި ހުންނަ ސަރަހައްދަށެވެ.

ނައިޖަރު ގެ ހަރުކަށި ފިކުރުގެ އިސްލާމީ ހަނގުރާމަވެރިންނާ ދެކޮޅަށް ހަނގުރާމަކުރާތާ މިހާރު ދިހަ އަހަރު ވެފައިވާއިރު، މިއަހަރުގެ ޖެނުއަރީ މަހުވެސް ޖިހާދީން ކަމަށް ބެލެވޭ ބަޔަކު ވަނީ މި އެއާޕޯޓަށް ހަމަލާދީފައެވެ. ނައިޖަރުގެ އަވަށްޓެރި ބުރުކީނާ ފާސޯ އަދި މާލީއެކޭ އެއްފަދައިން، އެ ގައުމުގައިވެސް މިހާރު ވެރިކަން ކުރަމުންދަނީ އަސްކަރީ ސަރުކާރަކުންނެވެ. މި ސަރުކާރު ވެރިކަމަށް އައުމުގެ މައިގަނޑު އެއް ސަބަބަކީ ކުރީގެ ސަރުކާރުތަކަށް މިފަދަ ހަމަނުޖެހުންތައް ހުއްޓުވުމުގައި ނާކާމިޔާބުވުމެވެ.

ބުރާސްފަތި ދުވަހު ދިން މި ހަމަލާގެ ޒިންމާ އަދި އެއްވެސް ޖަމާއަތަކުން އުފުލާފައެއް ނުވެއެވެ. އަދި މިކަމާ ގުޅޭގޮތުން އެ ގައުމުގެ ސަރުކާރުންވެސް އަދި ރަސްމީ ބަހެއް ބުނެފައެއް ނުވެއެވެ. ނަމަވެސް، ޖެނުއަރީ މަހު އެއާޕޯޓަށް ދިން ހަމަލާގެ ޒިންމާ އުފުލާފައިވަނީ އިސްލާމިކް ސްޓޭޓް (އައިއެސް) އާ ގުޅުން އޮންނަ ގްރޫޕަކުންނެވެ.