ސްރީލަންކާގައި މަސްތުވާތަކެތީގެ ސަބަބުން ދުވާލަކު 80-100 މީހުން މަރުވޭ
29 އޯގަސްޓު 2026 | ހޮނިހިރު 09:08ސްރީލަންކާގައި މަސްތުވާތަކެތި ބޭނުންކުރުން އިތުރުވެފައިވަނީ ގާނޫނީގޮތުން ހުއްދަ ދީފައިވާ ބާވަތްތަކުގެ ސަބަބުން ކަމަށް އެ ގައުމުގެ މާހިރަކު ބުނެފި. ހެރޮއިން އާއި ކެނެބިސް ފަދަ ތަކެތި ބޭނުންކުރާ ގިނަ މީހުންނަކީ އޭގެ ކުރިން ދުންފަތުގެ އިސްތިއުމާލުކުރި މީހުންކަން ފާހަގަކުރަމުން، އެކި ބާވަތްތަކުގެ މަސްތުވާތަކެތި ބޭނުންކުރުމުގެ މެދުގައި ވަރުގަދަ ގުޅުމެއް އޮންނަ ކަމަށްވެސް ވަނީ ފާހަގަކޮށްފައި
މަސްތުވާތަކެތީގެ ބާވަތެއް ކަމަށްވާ ކޮކެއިން އަޅާފައިވާ ޕެކެޓެއް | އެލަމީ
ސްރީލަންކާގައި މަސްތުވާތަކެއްޗާއި ބަނގުރަލުގެ ސަބަބުން ކޮންމެ ދުވަހަކު 80 އާއި 100 އާ ދެމެދުގެ އަދަދަކަށް މީހުން މަރުވަމުންދާ ކަމަށް ރަޖަރަޓާ ޔުނިވާސިޓީގެ ފެކަލްޓީ އޮފް އެޕްލައިޑް ސައިންސަސްގެ ޑީން ޑރ. މަނޯޖް ފެނާންޑޯ ވިދާޅުވެއްޖެ އެވެ.
ޑރ. މަނޯޖް ފެނާންޑޯ މިހެން ވިދާޅުވީ "ރަޓަ މާ އެކަޓަ" (ގައުމު އެކަތިގަނޑަކަށް) މި ނަމުގައި ކުރިއަށްގެންދާ ގައުމީ އޮޕަރޭޝަންގެ ދަށުން، މަސްތުވާތަކެތިން ރައްކާތެރިވުމާއި ހޭލުންތެރިކަން އިތުރުކުރުމުގެ ޕްރޮގްރާމްތަކާ ގުޅޭގޮތުން ހޯމަ ދުވަހު ބޭއްވި މީޑިއާ ބްރީފިންއެއްގަ އެވެ.
ސްރީލަންކާގައި ކޮންމެ ދުވަހަކު މިހާ ގިނަ އަދަދެއްގެ މީހުން މަރުވާން މެދުވެރިވާ އެހެން އެއްވެސް ވަކި ސަބަބެއް ނެތް ކަމަށް ޑރ. ފެނާންޑޯ ފާހަގަކުރެއްވި އެވެ.
ހަމައެކަނި ބަނގުރަލުގެ ސަބަބުން ދުވާލަކު 10 އާއި 15 އާ ދެމެދުގެ އަދަދަކަށް މީހުން މަރުވާ ކަމަށް އަންދާޒާކުރެވޭ ކަމަށްވެސް އޭނާ ވިދާޅުވި ކަމަށް އެ ގައުމުގެ މީޑިއާތަކުން ރިޕޯޓުކޮށްފައިވެ އެވެ.
މީގެ އިތުރުން، މަނާކޮށްފައިވާ މަސްތުވާތަކެތި ބޭނުންކުރާ މިންވަރު ވަރަށް ބޮޑަށް އިތުރުވެފައިވާ ކަމުގެ އިންޒާރު ދެއްވަމުން، އޭނާ ވިދާޅުވީ ގަވާއިދާ ހިލާފު މަސްތުވާތަކެތި ބޭނުންކުރުމަށް ގިނަ ފަހަރަށް މަގުފަހިވަނީ ގާނޫނީގޮތުން ހުއްދަ ދީފައިވާ ބާވަތްތައް ބޭނުންކުރުމުގެ ސަބަބުން ކަމަށެވެ.
"ހެރޮއިން ބޭނުންކުރާ ގިނަ މީހުންނަކީ، އެ ބޭނުންކުރަން ފެށުމުގެ ކުރިން ދުންފަތުގެ އިސްތިއުމާލުކުރި މީހުންކަން ހާމަވާ ފުދޭވަރަކަށް ހެކި އެބަހުރި،" ޑރ. ފެނާންޑޯ ވިދާޅުވި އެވެ.
ކެނެބިސް ބޭނުންކުރާ ގިނަ މީހުންނަކީ މީގެ ކުރިން ބަނގުރާ ނުވަތަ ދުންފަތުގެ އިސްތިއުމާލުކުރި މީހުންކަން ފާހަގަކުރައްވަމުން، އޭނާ ވިދާޅުވީ އެކި ބާވަތްތަކުގެ މަސްތުވާތަކެތި ބޭނުންކުރުމުގެ މެދުގައި ވަރުގަދަ ގުޅުމެއް އޮންނަ ކަމަށެވެ.
"ސްރީލަންކާގައި މިފަދަ ތަކެތި ބޭނުންކުރުމަށް ދޮރު ހުޅުވައިދޭ މައިގަނޑު ވަސީލަތަކީ ދުންފަތުގެ އިސްތިއުމާލުކުރުން. ހެރޮއިން ބޭނުންކުރާ ގިނަ މީހުންނަކީ ހެރޮއިންގެ ކުރިން ސިނގިރޭޓް ބޭނުންކުރި މީހުންކަން ހާމަވާން އެކަށީގެންވާ ހެކި އެބަހުރި. ހަމައެފަދައިން، ކެނެބިސް ބޭނުންކުރާ ގިނަ މީހުންނަކީ މީގެ ކުރިން ބަނގުރާ ނުވަތަ ސިނގިރޭޓް ބޭނުންކުރި މީހުން،" އޭނާ ވިދާޅުވި އެވެ.
