އީސްޓަރ ސަންޑޭގެ ބޮމުގެ ހާދިސާގައި، ސްްރީލަންކާގެ އިސް ދެ އޮފިޝަލަކަށް މަރުގެ އަދަބު ދިނުމަށް ހުކުމްކޮށްފި

2019 ވަނަ އަހަރުގެ އީސްޓަރ ސަންޑޭގައި ދިން ބޮމުގެ ހަމަލާތަކުގައި 260 މީހުން މަރުވި ހާދިސާގައި، ޖިނާއީ އިހުމާލުވިކަން ސާބިތުވެ ސްްރީލަންކާގެ ކުރީގެ ފުލުސް ވެރިޔަކާއި ދިފާއީ ވުޒާރާގެ ކުރީގެ އިސް އޮފިޝަލަކަށް މަރުގެ އަދަބު ދިނުމަށް އެ ގައުމުގެ ކޯޓަކުން ހުކުމްކޮށްފި އެވެ.

ސްރީލަންކާގެ ހައިކޯޓުގެ ތިން ފަނޑިޔާރުންގެ ބެންޗުން ހުކުމް ކުރީ ކުރީގެ ފުލުސް ވެރިޔާ ޕުޖިތު ޖަޔަސުންދަރަ އާއި ދިފާއީ ވުޒާރާގެ ކުރީގެ ސެކްރެޓަރީ ހޭމަސިރި ފެނާންޑޯގެ މައްޗަށެވެ. ހުކުރު ދުވަހު އިއްވި މި ހުކުމަކީ ބެންޗުގެ ދެ ފަނޑިޔާރުންގެ އަޣުލަބިއްޔަތުން ނިންމި ނިންމުމެކެވެ. މި ދެ ފަރާތުގެ މައްޗަށް މީގެ ކުރިން 2022 ވަނަ އަހަރު ކުށް ސާބިތުނުވާ ކަމަށް ނިންމި ނިންމުން ދައުލަތުން އިސްތިއުނާފު ކުރުމާ ގުޅިގެން، މައްސަލަ ބަލާފައިވަނީ އަވަސް ނިޔާ ކަނޑައަޅާ ހާއްސަ ކޯޓެއްގަ އެވެ.

2019 ވަނަ އަހަރު ދިން މި ނުރައްކާތެރި ބޮމުގެ ހަމަލާތައް އަމާޒުކޮށްފައިވަނީ ފަތުރުވެރިން ތިބޭ ތިން ހޮޓަލަކަށާއި ތިން ފައްޅިއަކަށެވެ. މި ހަމަލާތަކާ ގުޅިގެން އެކުލަވާލި ޕާލަމެންޓް ކޮމިޓީން ހާމަކޮށްފައިވާ ގޮތުގައި، ހަމަލާ ދީފާނެ ކަމުގެ އިންޒާރު ތަކުރާރުކޮށް އިންޓެލިޖެންސް އިދާރާތަކުން ދީފައިވީ ނަމަވެސް، ފުލުހުންނާއި އިންޓެލިޖެންސް އޮފިޝަލުން އެކަމަށް ފިޔަވަޅު އަޅާފައެއް ނުވެ އެވެ.

މި މައްސަލައިގައި ކުށްވެރިވި ދެ އޮފިޝަލުންގެ ވަކީލު ޗަމިންދަ އަތުކޮރަލަ ހޮނިހިރު ދުވަހު ވިދާޅުވީ، ކުރިއަށް އޮތް ދެ ހަފުތާގެ ތެރޭގައި މި ހުކުމް އިސްތިއުނާފު ކުރާނެ ކަމަށެވެ.

އޭއެފްޕީ ނިއުސް އެޖެންސީއަށް މައުލޫމާތު ދެމުން އަތުކޮރަލަ ވިދާޅުވީ، ބެންޗުގެ އެއް ފަނޑިޔާރަކު މި ހުކުމާ ދެކޮޅަށް ރައުޔު ނެރުއްވި ސަބަބަކީ، މި ދެ ބޭފުޅުން މީހުން މަރަންވީ އެއްވެސް މަގުސަދެއް ނެތުމާއި، ބޮން ގޮއްވި މީހުންނާ އެއްވެސް ގުޅުމެއް އޮތްކަން ސާބިތުނުވާތީ ކަމަށެވެ.

ޝަރީއަތުގެ މަޖިލީހުގައި ހާމަވި ގޮތުގައި، އިންޑިއާގެ އިންޓެލިޖެންސް އެޖެންސީއަކުން 2019 އޭޕްރީލް 4 ވަނަ ދުވަހު، ސްރީލަންކާގައި އަމިއްލައަށް މަރުވެގެން ބޮމުގެ ހަމަލާއެއް ދީފާނެ ކަމުގެ އިންޒާރު ދީފައިވެ އެވެ. ނަމަވެސް ކަމާބެހޭ ފަރާތްތަކުން އެކަމަށް އެއްވެސް ފިޔަވަޅެއް އަޅާފައެއް ނުވެ އެވެ.

މީގެ ކުރިން ހިންގި މަދަނީ ދައުވާއެއްގައި، ހަމަލާގައި ސަލާމަތްވި މީހުންނަށް ބަދަލުގެ ގޮތުގައި 125 މިލިއަން ރުޕީސް (372,464 އެމެރިކާ ޑޮލަރު) ދެއްކުމަށް ފެނާންޑޯ އާއި ޖަޔަސުންދަރަގެ މައްޗަށް އަމުރުކޮށްފައިވެ އެވެ.

ސްރީލަންކާގައި އީސްޓަރ ސަންޑޭގައި ދިން ބޮމުގެ ހަމަލާތަކުގެ ޒިންމާ އުފުލާފައިވަނީ އައިއެސް ޖަމާއަތުގެ ފިކުރަށް ތާއީދުކުރާ ލަންކާގެ ދެ ގްރޫޕަކުންނެވެ. މި ހަމަލާތަކުގައި އަމަލީގޮތުން ބައިވެރިވި އެއްވެސް މީހަކު މިހާރު ދުނިޔޭގައި ނެތް ނަމަވެސް، އެމީހުންނާ ގުޅުން ހުރި ކަމަށް ތުހުމަތު ކުރެވޭ އެހެން މީހުންގެ ޝަރީއަތްތައް ދަނީ ވަކިން ހިންގަމުންނެވެ.

މި ހަމަލާތަކުގައި ޖުމްލަ 279 މީހުން މަރުވިއިރު، އޭގެ ތެރޭގައި ބޭރު ގައުމުތަކަށް ނިސްބަތްވާ 45 މީހުން ހިމެނެ އެވެ. އަދި 500 އަށްވުރެ ގިނަ މީހުން ޒަހަމްވި އެވެ. ސްރީލަންކާގެ ކެތޮލިކް ޗާޗުން ތުހުމަތު ކުރާ ގޮތުގައި މިހާތަނަށް ފާހަގަކުރެވިފައިވާ މީހުންނަކީ ހަމަލާގެ އަސްލު މާސްޓަރމައިންޑުންނެއް ނޫނެވެ. އަދި މި ހަމަލާތަކުގެ ފަހަތުގައި މިއަށްވުރެ ބޮޑު ރޭވުމެއް އޮތް ކަމަށް އެ ފަރާތުން ގަބޫލުކުރެ އެވެ.

ސްރީލަންކާގައި މަރުގެ ހުކުމް އިއްވި ނަމަވެސް، އާންމުކޮށް އެ ހުކުމް ބަދަލުވަނީ އުމުރު ދުވަހުގެ ޖަލު ހުކުމަކަށެވެ. އެއީ 1976 ވަނަ އަހަރުން ފެށިގެން އެ ގައުމުގައި މަރުގެ އަދަބު ތަންފީޒުކުރުން މެދުކަނޑާލާފައިވާތީ އެވެ.

މިހާރުގެ ރައީސް އަނޫރާ ކުމާރާ ޑިސަނަޔަކެ ވެސް ތާއީދު ކުރައްވަނީ މަރުގެ އަދަބު ތަންފީޒު ނުކޮށް އޮތް އޮތުން ދެމެހެއްޓުމަށެވެ.

މިދިޔަ ފެބްރުއަރީ މަހު ޕާލަމެންޓާ ހިއްސާކުރި ސަރުކާރުގެ ތަފާސްހިސާބުތަކުން ދައްކާ ގޮތުގައި، ސްރީލަންކާގައި މަރުގެ ހުކުމް އިއްވާފައިވާ މަދުވެގެން 800 މީހުން އެބަތިއްބެވެ. ނަމަވެސް މި ހުކުމްތައް އާންމުކޮށް ބަދަލުކުރެވެނީ އުމުރު ދުވަހުގެ ޖަލު ހުކުމަށެވެ.