މާލީ ދަތިތަކާ ހުރެ ސާފް 17 އަހަރުން ދަށުގެ މުބާރާތްތައް ކެންސަލްކޮށްފި
29 އޯގަސްޓު 2026 | ހޮނިހިރު 05:36މާލީ ދަތިތަކާއި މާކެޓިން ޕާޓްނަރަށް އައި ބަދަލާ ގުޅިގެން މިއަހަރުގެ ސާފް 17 އަހަރުން ދަށުގެ މުބާރާތްތައް ނުބޭއްވުމަށް ސާފްއިން ވަނީ ނިންމާފައި. މި ނިންމުމުގެ ސަބަބުން އޭއެފްސީ ކޮލިފައިންގެ ކުރިން ޒުވާން ޓީމުތަކަށް ލިބެން އޮތް ފުރުސަތު ގެއްލިފައިވާއިރު، މާލީ ހާލަތު ރަނގަޅު ކުރުމަށް ބަންގްލަދޭޝްގެ ކުންފުންޏަކާ އެކު ސާފްއިން މިހާރު ވަނީ އެއްބަސްވުމެއް ގާއިމުކޮށްފައި
ސްރީ ލަންކާގައި 2025 ވަނަ އަހަރު އޮތް ސާފް 17 އަހަރުން ދަށުގެ ޗެމްޕިއަންޝިޕް ގައި ރާއްޖޭގެ ޓީމު ކުޅެނީ | އެފްއޭއެމް
މާލީ ދަތިތަކާ ގުޅިގެން، މިއަހަރު ބޭއްވުމަށް ހަމަޖެހިފައިވާ ސާފް 17 އަހަރުން ދަށުގެ ފިރިހެން އަދި އަންހެން މުބާރާތް ނުބޭއްވުމަށް ސައުތު އޭޝިއަން ފުޓްބޯލް ފެޑެރޭޝަން (ސާފް) އިން ހުކުރު ދުވަހު ނިންމައިފި އެވެ. މިއީ އޭޝިއަން ފުޓްބޯލް ކޮންފެޑެރޭޝަން (އޭއެފްސީ) ކޮލިފައިންގެ ކުރިން ސަރަހައްދުގެ ޒުވާން ޓީމުތަކަށް ތައްޔާރުވުމަށް ލިބެން އޮތް މުހިންމު ފުރުސަތެއް ގެއްލިގެން ދިއުމެވެ.
ސާފްގެ ޖެނެރަލް ސެކްރެޓަރީ ޕުރުޝޮއްތަމް ކަޓޭލް ވިދާޅުވީ، މި ނިންމުން ނިންމަން ޖެހުނީ މާލީ ދަތިތަކުގެ އިތުރުން ފެޑެރޭޝަންގެ މާކެޓިން ޕާޓްނަރަށް އައި ބަދަލަކާ ގުޅިގެން ކަމަށެވެ. "މާލީ ސަބަބުތަކާ ހުރެ މިފަހަރު މި މުބާރާތް އިންތިޒާމު ކުރެވޭ ގޮތެއް ނުވި. އަދި އަޅުގަނޑުމެންގެ މާކެޓިން ޕާޓްނަރު ބަދަލުވުމަކީ ވެސް ދިމާވި މައްސަލައެއް. މިއީ ފުޓްބޯޅަ ކުރިއެރުވުމަށް ކޮންމެހެން މުހިންމު މުބާރާތެއް ނަމަވެސް، ކުރިއަށް އޮތް ތަނުގައި އަލުން މި މުބާރާތް ބޭއްވުމަށް މަސައްކަތް ކުރަމުންދަނީ،" ކަޓޭލް ވިދާޅުވި އެވެ.
ވޯލްޑް ކަޕަށް ފަހު ބޭއްވި ރަސްމިއްޔާތެއްގައި މި މުބާރާތުގެ ލޯގޯ ދައްކާލާފައިވަނީ "ޓެކްނޯ" ގެ ނަމުގައެވެ. ކަޓޭލް ވިދާޅުވި ގޮތުގައި ބަންގްލަދޭޝްގެ ކުންފުންޏެއް ކަމަށްވާ ޓީއެސްއޭ އިން ވަނީ ބަންގްލަދޭޝްގައި ސާފްގެ ރައިޓްސް ހޯދާފަ އެވެ. އަދި އެ ކުންފުނިން މާކެޓިން ޕާޓްނަރެއްގެ ގޮތުގައި ހަރަކާތްތެރިވާނެ ކަމަށް އޭނާ ވިދާޅުވި އެވެ.
"ބަންގްލަދޭޝްގައި ސާފްގެ ރައިޓްސް ނަގާފައިވަނީ ޓީއެސްއޭ އިން. އެއީ މި މުބާރާތުގެ މާކެޓިން ޕާޓްނަރު. މުބާރާތުގެ ސްޕޮންސަރުންނާއި އެހެނިހެން ކަންކަން ބަލަހައްޓާނީ އެ ކުންފުނިން. އަދި އެމީހުންގެ ފަރާތުން އަޅުގަނޑުމެންނަށް މާލީ އެހީތެރިކަން ލިބޭނެ،" ކަޓޭލް ވިދާޅުވި އެވެ.
2021 ވަނަ އަހަރު ދިވެހިރާއްޖޭގައި ބޭއްވި ސާފް ޗެމްޕިއަންޝިޕަށް ފަހު، އެ މުބާރާތުން ލިބެންޖެހޭ ފައިސާ ހޯދުމުގައި ސާފް އަށް ބޮޑެތި ގޮންޖެހުންތަކަކާ ކުރިމަތިލާން ޖެހުނު ކަމަށް ރިޕޯޓުތައް ބުނެ އެވެ. އެހެންކަމުން، ޓީއެސްއޭ އާއެކު ވެފައިވާ އެއްބަސްވުމުގެ ސަބަބުން މާލީ ގޮތުން ކުރާނެ ފައިދާއެއް އަދި އޮތީ ބަލަން ޖެހޭ ކަމެއްގެ ގޮތުގަ އެވެ. ޓީއެސްއޭ އިން މީގެ ކުރިން ބަންގްލަދޭޝްގެ އަންހެން ފުޓްބޯޅަ ލީގު މެނޭޖްކޮށްފައިވާއިރު، އެ މުބާރާތުގެ ބްރޭންޑިންގް އާއި އިތުރު ޚަރަދުތަކާ ގުޅޭގޮތުން ބަންގްލަދޭޝް ފުޓްބޯޅަ ފެޑެރޭޝަން (ބީއެފްއެފް) ގެ ތެރޭގައި ސުވާލުތަކެއް އުފެދުނެވެ.
އޭއެފްސީ 17 އަހަރުން ދަށުގެ ފިރިހެން ކޮލިފައިން މުބާރާތުގެ ގުރުއަތުލުން ބުރާސްފަތި ދުވަހު ބާއްވާފައިވާއިރު، މި މުބާރާތުގެ ކޮލިފައިން މެޗުތައް އަންނަ ނޮވެމްބަރު މަހު އޭޝިއާގެ ހަތް ގައުމެއްގައި ބޭއްވުމަށް ވަނީ ތާވަލުކޮށްފަ އެވެ. މީގެ އިތުރުން، ވޭތުވެދިޔަ އަހަރުގެ ތެރޭގައި އަސާސީ ގަވާއިދަށް އިސްލާހު ގެނައުމާއި، އަހަރީ އާންމު ޖަލްސާ (އޭޖީއެމް) އަދި އެގްޒެކެޓިވް ކޮމިޓީގެ ބައްދަލުވުންތަކަށް ސާފް އިން ބޮޑެތި ޚަރަދުތަކެއް ކޮށްފައިވާކަން ފާހަގަކުރެވެ އެވެ.
