ޓީވީ ޗެނަލްތަކާ މެދު ފިޔަވަޅު އަޅާފައި ވަނީ ގަވާއިދު ނެތި ކަމަށް ޝަހީބް އިއުތިރާފް ވެވަޑައިގެންފި

އަބުރުރައްކާތެރި ކުރުމާއި ހިޔާލްފާޅު ކުރުމުގެ މިނިވަން ކަމުގެ ގާނޫނުގެ ދަށުން ޓީވީ ޗެނަލްތަކާ މެދު ފިޔަވަޅު އަޅައި، ބޮޑެތި އަދަދުތަކުން ޗެނަލްތައް ޖޫރިމަނާ ކޮށްފައި ވަނީ އަބުރުގެ ގާނޫނުގެ ދަށުން ކޮމިޝަނުން ހަދަން ޖެހޭ ގަވާއިދު ހަދާ ނުނިމެނީސް ކަމަށް ބްރޯޑްކާސްޓިން ކޮމިޝަންގެ ރައީސް މުހައްމަދު ޝަހީބް އިއުތިރާފް ވެވެވަޑައިގެންފިއެވެ.

ބްރޯޑްކާސްޓް ކުރުމުގެ ދުވަހުގެ މުނާސަބަތުގައި ޝަހީބް ނެރުއްވި ހިތޯބުގައި ވިދާޅުވެފައިވާ ގޮތުގައި އަބުރު ރައްކާތެރި ކުރުމާއި ހިޔާލްފާޅު ކުރުމުގެ މިނިވަން ކަމުގެ ގާނޫނު އުފަންވުމާ ގުޅިގެން އެ ގާނޫނުގެ ދަށުން ބްރޯޑްކާސްޓިން ކޮމިޝަނުން ހަދަން ޖެހޭ ގަވާއިދުތަކާއި އުސޫލްތައް ހެދުމުގެ މަސައްކަތް ކޮމިޝަނުން ދަނީ ކުރަމުންނެވެ. އަދި މީގެ ހަ އަހަރު ކުރިން ބްރޯޑްކާސްޓިން ކޮމިޝަނުން ހަދާފައިވާ ބްރޯޑްކާސްޓް ކުުރމުގެ ގަވާއިދާއި ރީބްރޯޑްކާސްޓް ކުރުމުގެ ގަވާއިދު ވެސް މުރާޖާ ކުރަމުންދާ ކަމަށް ޝަހީބުގެ ހިތޯބުގައި ވަނީ ވިދާޅުވެފައެވެ.

ގަވައިދު ނެތި ބްރޯޑްކާސްޓަރުން ޖޫރިމަނާކޮށްފައިވާ ކަމަށް ޝަހީބު އެއްބަސްވެވަޑައިގެންނެވި އިރު ދެ މައްސަލައަކާ ގުޅިގެން ރާއްޖެޓީވީ 1.2 މިލިއަން ރުފިޔާ އިން ޖޫރިމަނާކޮށްފައި ވެއެވެ. ގަވައިދެއް ނެތި އެ ގާނޫނުގެ ދަށުން އަދިވެސް އިތުރު ފަރާތްތަކާ މެދު ފިޔަވަޅު އަޅާފައި ވެއެވެ.

ޝަހީބުގެ ހިތޯބުގައި ވިދާޅުވެފައިވާ ގޮތުގައި އަބުރު ރައްކާތެރިކޮށްދިނުމާއި ހިޔާލުފާޅުކުރުމުގެ މިނިވަންކަމުގެ ގާނޫނަށް އޮގަސްޓު 11، 2016 ގައި އަމަލުކުރަން ފެށިފަހުން އަބުރާ ގުޅުންހުރި 22 ޝަކުވާއެއް މޯލްޑިވްސް ބްރޯޑްކާސްޓިން ކޮމިޝަނަށް ވަނީ ހުށަހެޅިފައެވެ.

ޝަހީބު ދެއްވި ހިތާބުގައި ވިދާޅުވި ގޮތުގައި މިހާތަނަށް ކޮމިޝަނަށް ހުށަހެޅިފައިވާ ޝަކުވާތަކުގެ ތެރެއިން، 17 ޝަކުވާ އަދި ބަލައި ނުނިމެއެވެ. މީގެ ތެރޭގައި ހިމެނެނީ ލައިސަންސްގެ މައްސަލަތަކާ ގުޅޭ 11 ޝަކުވާ އާއި އަބުރާ ގުޅުންހުރި ހަތަރު މައްސަލަ ކަމަށް ޝަހީބް ވިދާޅުވެފައި ވެއެވެ. އޭގެ އިތުރުން ބްރޯޑްކާސްޓިން ކޮމިޝަން އުފެދުނީއްސުރެ މިހާތަނަށް ބްރޯޑްކާސްޓް ދާއިރާއާ ގުޅޭ 521 ޝަކުވާ، ހުށަހެޅިފައިވާ ކަމަށާއި އޭގެ ތެރޭގައި 219 ޝަކުވާއަކީ ބްރޯޑްކާސްޓްކުރެވޭ ކޮންޓެންޓާ ގުޅުންހުރި ޝަކުވާ ކަމަށާއި 240 ޝަކުވާއަކީ ލައިސަންސްގެ މައްސަލަތަކާ ގުޅުންހުރި ޝަކުވާ ކަމަށް ޝަހީބު ވިދާޅުވިއެވެ.

އެކި އެކި ހާލަތްތަކާ ގުޅިގެން، ޒިންމާދާރުކަމާ އެކު ތެދު މައުލޫމާތާއި، ގައުމީ ސަލާމަތަށް އިސްކަންދީގެން ޚަބަރު ފެތުރުމަށް އަބަދުވެސް ކޮމިޝަނުން ބްރޯޑްކާސްޓަރުންނަށް އިލްތިމާސް ކުރަމުންދާ ކަމަށާއި ބްރޯޑްކާސްޓަރުން ފޮނުވާ ކޮންޓެންޓުގެ ޒިންމާދާރުކަމާއި ފެންވަރު ބެލުމުގެ މަސައްކަތް ކެނޑިނޭޅި ކުރަމުންދާ ކަމަށް ޝަހީބު ވިދާޅުވިއެވެ. ޝަހީބު ވިދާޅުވި ގޮތުގައި، ރާއްޖޭގައި ބްރޯޑްކާސްޓްކުރުމަށް މިހާތަނަށް 43 ލައިސަންސް ދޫކޮށްފައިވެއެވެ. އޭގެ ތެރޭގައި 31 ޓީވީ ޗެނަލާއި 12 ރޭޑިއޯ ޗެނަލް ހިމެނޭ ކަމަށް ޝަހީބު ވިދާޅުވިއެވެ. އަދި ރީބްރޯޑްކާސްޓްކުރުމަށް 122 ލައިސަންސް ދޫކޮށްފައިވާ ކަމަށާއި އޭގެ ތެރޭގައި މުޅި ރާއްޖެއަށް ހިދުމަތް ހިދުމަށް ފަސް ފަރާތަކަށް ލައިސަންސް ދޫކޮށްފައިވާ ކަމަށް ޝަހީބް ވިދާޅުވިއެވެ.