އޭޝިއަން ނެޓުބޯޅަ ޗެމްޕިއަންޝިޕް ސިންގަޕޫރުން ދިފާއުކޮށްފި

ހޮންކޮންގުގައި މިދިޔަ ހޮނިހިރު ދުވަހު ނިމުނު 14 ވަނަ އޭޝިއަން ސީނިއާ ނެޓުބޯޅަ ޗެމްޕިއަންޝިޕްގެ ތިން ވަނަ ސްރީލަންކާ އަށް ލިބުމާއެކު، އެ ގައުމުގެ ނެޓުބޯޅަ ކުރިއެރުވުމަށް ކުރާ މަސައްކަތްތަކަށް ބޮޑު ގޮންޖެހުމަކާ ކުރިމަތިވެއްޖެ އެވެ.

މީގެ ކުރިން ހަ ފަހަރު މި މުބާރާތުގެ ތަށި އުފުލާލާފައިވާ ސްރީލަންކާ އަށް ތިން ވަނަ މަގާމު ލިބުނީ، ތިން ވަނަ ހޮވި މެޗުގައި މެލޭޝިއާއާ ވާދަކޮށް 60-65 ގެ ނަތީޖާ އަކުން މޮޅުވުމުންނެވެ. މިއީ އޭޝިއަން ޗެމްޕިއަންޝިޕްގެ ތާރީޚުގައި ސްރީލަންކާ ތިން ވަނައިގައި ނިންމާލި ތިން ވަނަ ފަހަރެވެ. މީގެ ކުރިން އެ ގައުމު ތިން ވަނަ އަށް ގޮސްފައިވަނީ 1993 އަދި 2005 ވަނަ އަހަރު އެވެ.

މުބާރާތުގެ ފައިނަލްގައި މުބާރާތް ބޭއްވި ހޮންކޮންގްއާ ވާދަކޮށް 33-57 އިން މޮޅުވެ، ސިންގަޕޫރުން ވަނީ އޭޝިއާގެ ޗެމްޕިއަންކަން ދިފާއުކޮށްފައި އެވެ. މިއީ ސިންގަޕޫރުން މި ތަށި ކާމިޔާބުކުރި ފަސް ވަނަ ފަހަރެވެ. މީގެ ކުރިން 1993 ވަނަ އަހަރު އެންމެ ފަހަރަކު ތަށި ހޯދާފައިވާ ހޮންކޮންގް އިން މިފަހަރުގެ ފައިނަލަށް ދަތުރު ކުރުމަކީ ގިނަ ބަޔަކު ހައިރާންކޮށްލި ކަމެކެވެ. މި ކާމިޔާބީއާއެކު، ރަނަރަޕްގެ ގޮތުގައި ހޮންކޮންގް ވަނީ ޗެމްޕިއަން ސިންގަޕޫރާ އެކު 2027 ވަނަ އަހަރު ސިޑްނީގައި ބާއްވާ ނެޓުބޯޅަ ވޯލްޑް ކަޕަށް ފުރަތަމަ ފަހަރަށް ކޮލިފައިވެފަ އެވެ.

ސްރީލަންކާ އިން މި މުބާރާތް ވަރުގަދަކޮށް ފެށިއިރު، ފުރަތަމަ ބުރުގައި އެ ގައުމުން ވަނީ މެލޭޝިއާ (52-66)، އިންޑިއާ (34-100) އަދި ދިވެހިރާއްޖެ (33-78) އަތުން މޮޅުވެފައި އެވެ. ނަމަވެސް، ޕްރިލިމިނަރީ ބުރުގައި ހޮންކޮންގްއާ ބައްދަލުކުރި މެޗު 57-57 އިން އެއްވަރުވިއިރު، ސިންގަޕޫރު އަތުން ވަނީ 51-62 އިން ބަލިވެފައި އެވެ. އޭގެ ފަހުން ސެމީ ފައިނަލްގައި ސިންގަޕޫރު އަތުން 54-82 އިން ބަލިވި ނަމަވެސް، ތިން ވަނަ ހޮވި މެޗުގައި މެލޭޝިއާ 60-65 އިން ބަލިކޮށް ސްރީލަންކާ އިން ވަނީ ތިން ވަނަ މަގާމު ކަށަވަރުކޮށްފައި އެވެ.