ސައްހަ ނޫން ޓީޓީތަކުގެ މައްސަލައިގައި ޝިފާއުގެ މައްޗަށް އިއްވި ޖަލު ހުކުމް ފަސްކޮށްދެވެން ނެތްކަމަށް ނިންމައިފި
10 އޯގަސްޓު 2026 | ހޯމަ 21:11ސައްހަ ނޫން ޓީޓީ ބޭނުންކޮށްގެން 1.9 މިލިއަން ރުފިޔާގެ މުދާ ހޯދި މައްސަލާގައި ހުސައިން ޝިފާއުގެ މައްޗަށް އިއްވާފައިވާ ޖަލު ހުކުމް ތަންފީޒުކުރުން ފަސްކޮށްދެވެން ނެތް ކަމަށް ހައި ކޯޓުން ނިންމައިފި. މަކަރާއި ހީލަތް ހެދުމާއި މަނީ ލޯންޑްރިންގެ 23 ދައުވާ ސާބިތުވެ އޭނާގެ މައްޗަށް ކްރިމިނަލް ކޯޓުން ވަނީ 10 އަހަރުގެ ޖަލު ހުކުމެއް އިއްވާފައި
ސައްހަ ނޫން ޓީޓީތަކުގެ މައްސަލައިގައި ޝިފާއުގެ މައްޗަށް އިއްވި ޖަލު ހުކުމް ފަސްކޮށްދެވެން ނެތްކަމަށް ނިންމައިފި | ޕޮލިސް
ސައްހަ ނޫން ޓީޓީތަކުގެ މައްސަލައިގައި ޝިފާއުގެ މައްޗަށް އިއްވި ޖަލު ހުކުމް ފަސްކޮށްދެވެން ނެތްކަމަށް ހައި ކޯޓުން ނިންމައިފި އެވެ.
ސައްހަ ނޫން ޓެލެގްރެފިކް ޓްރާންސްފަރ (ޓީޓީ) ފޮނުވައިގެން ބޭރުގެ ކުންފުނިތަކެއްގެ އަތުން އޮޅުވާލައިގެން 123،000 ޑޮލަރު (1.9 މިލިއަން ރުފިޔާ) ގެ މުދާ ހޯދި މައްސަލާގައި ހުސައިން ޝިފާއުގެ މައްޗަށް މަނީ ލޯންޑްރިންގެ ހަތް ދައުވާ ސާބިތުވެފައިވާއިރު، އޭނަގެ ޖަލު ހުކުމް ތަންފީޒުކުރުން ފަސްކުރެވެން ނެތް ކަމަށް ހައި ކޯޓުން ވަނީ ނިންމައިފި އެވެ.
ހައި ކޯޓުން މައްސަލަ ބައްލަވަނީ ފަނޑިޔާރު އިސްމާއީލް ޝަފީއު އާއި ފަނޑިޔާރު ހުސައިން މަޒީދު އަދި ފަނޑިޔާރު ދީބާނާޒް ފަހުމީ އެވެ.
ސައްހަ ނޫން ޓީޓީތަކެއް ފޮނުވައިގެން މުދާ ހޯދި މައްސަލާގައި ޝިފާއު ހައްޔަރު ކުރީ 2023 ވަނަ އަހަރުގައި އެވެ. އޭނާގެ މައްޗަށް 23 ދައުވާއެއް ދައުލަތުން ކޮށްފައިވާއިރު، މަކަރާއި ހީލަތް ހެދުމުގެ 16 ދައުވާއަކާއި މަނީ ލޯންޑްރިންގެ ހަތް ދައުވާ ހިމެނެ އެވެ.
ކްރިމިނަލް ކޯޓުގައި މި މައްސަލަ ބެއްލެވި ގާޒީ އަލީ ނަދީމް ވަނީ ޝިފާއުގެ މައްޗައް މި 23 ދައުވާ ވެސް ސާބިތުވާ ކަމަށް ނިންމާފައި އެވެ. އަދި އެ މައްސަލާގައި ޝިފާއު ލޯންޑާކުރި 123،000 ޑޮލަރު ދައުލަތަށް ނަގަން އެދުނަސް، ގާޒީ ވިދާޅުވީ އެ ފައިސާ ހުރީ ކޮން ތަނެއްގައިކަން ދައުލަތަށް ބުނެ ނުދެވޭތީ އެ ފައިސާ ދައުލަތަށް ނަގަން އަމުރު ނުކުރެވޭނެ ކަމަށެވެ.
މީގެއިތުރުން ދައުލަތުން އެދިފައި ވަނީ ކޮންމެ ދައުވާއެއްގައި އެއްލައްކަ ރުފިޔާގެ ޖޫރިމަނާއަކާ އެކު 10 އަހަރުގެ ޖަލު ހުކުމެއް އިއްވުމަށެވެ.
