މީހެއްގެ ހުއްދައާ ނުލައި ކުޑަދޫ ބުރިކޮށްލުމުން ކުރި ދައުވާ ސިވިލް ކޯޓުން ބޭރުކޮށްލުމުން މައްސަލަ ހައިކޯޓަށް!
2 އޯގަސްޓު 2026 | އާދީއްތަ 09:51ޓްރީޓޮޕް ހޮސްޕިޓަލުން ކުރި އޮޕަރޭޝަނެއްގައި ހުއްދައާ ނުލައި ކުޑަދޫ ބުރިކޮށްލި ކަމަށް ބުނެ ހުށަހެޅި މައްސަލަ، ގާނޫނީ އިޖުރާއަތްތައް ފުރިހަމަނުވާތީ ސިވިލް ކޯޓުން ވަނީ ބޭރުކޮށްލާފައި. ސިއްހީ ހިދުމަތަކާ ގުޅޭ މައްސަލައެއް ކޯޓަށް ހުށަހެޅުމުގެ ކުރިން އެންމެ ފުރަތަމަ އެ ހޮސްޕިޓަލަކަށް ނުވަތަ ހެލްތު މިނިސްޓްރީއަށް ހުށަހަޅަންޖެހޭނެ ކަމަށް ކޯޓުގެ ހުކުމުގައި ބަޔާންކޮށްފައިވޭ. މި މައްސަލަ ހުށަހެޅި ފަރާތުން ބަދަލުގެ ގޮތުގައި 4 މިލިއަނަށް ވުރެ ގިނަ ޑޮލަރު ހޯދުމަށް އެދިފައިވަނީ އޮޕަރޭޝަނަށްފަހު ޖިސްމާނީ އަދި ނަފްސާނީ ގެއްލުންތަކެއް ލިބިފައިވާ ކަމަށް ބުނޭ
ހައިކޯޓު ބޭރުން ނަގާފައިވާ ފޮޓޯ އެއް | ހައި ކޯޓް
ޓްރީޓޮޕް ހޮސްޕިޓަލުގައި ކުރި އޮޕަރޭޝަނެއްގެ ތެރެއިން، ހުއްދައާ ނުލައި ކުޑަދޫ ބުރިކޮށްލި ކަމަށް ބުނެ ގެއްލުމުގެ ބަދަލުގެ ގޮތުގައި 4 މިލިއަނަށް ވުރެ ގިނަ ޑޮލަރު ހޯދުމަށް އަމިއްލަ ފަރާތަކުން ކުރި ދައުވާ ސިވިލް ކޯޓުން ބޭރުކޮށްލުމުން، އޭނާގެ ފަރާތުން މައްސަލަ ހައިކޯޓަށް ހުށަހަޅައިފި އެވެ.
މި މައްސަލައަކީ 2023 ވަނަ އަހަރުގެ ތެރޭގައި ހިނގާފައިވާ ހާދިސާއަކާ ގުޅިގެން ހުށަހަޅާފައިވާ މައްސަލައެކެވެ.
މި މައްސަލަ ހުށަހެޅި ފަރާތުން ބުނެފައިވަނީ، އޭނާގެ ޓޮންސިލްގައި އިންފެކްޝަން އުފެދިގެން ޓްރީޓޮޕް ހޮސްޕިޓަލުން ކުރި އޮޕަރޭޝަނެއްގެ ތެރެއިން، އޭނާގެ އެއްވެސް ހުއްދައެއް ނެތި ކުޑަދޫ ބުރިކޮށްލާފައިވާ ކަމަށެވެ. މިކަމުގެ ސަބަބުން ޖިސްމާނީ ގޮތުންނާއި ނަފްސާނީ ގޮތުން ބޮޑެތި އަނިޔާތަކެއް ލިބިފައިވާ ކަމަށް ބުނެ، ބަދަލުގެ ގޮތުގައި 1،080،000 ދިވެހި ރުފިޔާއާއި 4 މިލިއަނަށް ވުރެ ގިނަ އެމެރިކާ ޑޮލަރު ނަގައިދިނުމަށް އޭނާ ވަނީ ކޯޓުގައި އެދިފަ އެވެ.
ދައުވާގައި ބަޔާންކޮށްފައިވާ ގޮތުގައި، ކުޑަދޫ ނެތްކަން އޭނާއަށް އެނގުނީ އޮޕަރޭޝަން ނިންމުމަށްފަހު ހޮސްޕިޓަލުގައި އެނދުމަތިކޮށްފައި އޮއްވަ އެވެ. ނަމަވެސް ހޮސްޕިޓަލުން ދޫކުރި ޑިސްޗަރޖް ސަމަރީގައި ކުޑަދޫ ބުރިކޮށްލިކަމުގެ އެއްވެސް ވާހަކައެއް ހިމަނާފައި ނުވާ ކަމަށާއި، އޭގައި އޮތީ ހަމައެކަނި ޓޮންސިލް ނެގުމަށް ކުރި އޮޕަރޭޝަންގެ ވާހަކަ އެކަނި ކަމަށް އޭނާ ބުނެފައިވެ އެވެ. އަދި އެކަމާ ގުޅިގެން ސުވާލު ކުރުމުން، ކުޑަދުލުގެ ވާހަކަ ލިޔެވޭނީ އެކަމަށް ކުރި އޮޕަރޭޝަންގެ ފައިސާ ދެއްކުމުން ކަމަށް ހޮސްޕިޓަލުން ބުނެފައިވާ ކަމަށްވެސް ދައުވާގައި ބުނެފައިވެ އެވެ.
މި މައްސަލައިގައި ދިފާއުގައި ޓްރީޓޮޕް ހޮސްޕިޓަލުން ކޯޓުގައި ބުނެފައިވަނީ، މި މައްސަލަ ކޯޓަށް ހުށަހަޅާފައިވަނީ އޮންނަ އިޖުރާއަތުގެ ތެރެއިން ނޫން ކަމަށެވެ. އެހެންކަމުން މި މައްސަލަ ކޯޓަށް ބެލޭނެ ގާނޫނީ ހުއްޖަތެއް ނެތް ކަމަށް ހޮސްޕިޓަލުން ވަނީ ފާހަގަކޮށްފަ އެވެ.
މި މައްސަލަ ބެލުމަށްފަހު ސިވިލް ކޯޓުން ނިންމާފައިވަނީ، މިއީ މި ބާވަތުގެ މައްސަލަތައް ކޯޓަށް ހުށަހެޅުމުގެ ކުރިން ފުރިހަމަ ކުރަންޖެހޭ ގާނޫނީ އިޖުރާއަތުތައް ފުރިހަމަކޮށްފައި ނުވާ ދައުވާއެއް ކަމަށެވެ.
ކޯޓުގެ ހުކުމުގައި ބަޔާންކޮށްފައިވަނީ، ސިއްހީ ހިދުމަތްދޭ ތަނަކުން ދޭ ހިދުމަތަކާ ގުޅިގެން މައްސަލައެއް ދިމާވެއްޖެނަމަ، އެންމެ ފުރަތަމަ އެ މައްސަލައެއް އެ ހޮސްޕިޓަލަކަށް ހުށަހަޅަން ޖެހޭނެ ކަމަށެވެ.
މީގެ އިތުރުން، ހޮސްޕިޓަލުގެ ނިންމުމާމެދު ހިތްހަމަނުޖެހޭނަމަ އެ މައްސަލައެއް ދެން ހުށަހަޅަން ޖެހޭނީ މިނިސްޓްރީ އޮފް ހެލްތަށް ކަމަށްވެސް ކޯޓުގެ ހުކުމުގައިވެ އެވެ. އަދި މިނިސްޓްރީގެ ކޮމިޝަނަރ އޮފް ކޮލިޓީ އެޝުއަރެންސްގެ ނިންމުމާމެދު ހިތްހަމަނުޖެހޭނަމަ، މައްސަލަ ކޯޓަށް ހުށަހެޅުމުގެ ފުރުސަތު އޮންނާނެ ކަމަށް ސިވިލް ކޯޓުން ވަނީ ކަނޑައަޅާފައެވެ. މި އިޖުރާއަތުތައް ފުރިހަމަވެފައި ނުވާތީ، ކޯޓުން ވަނީ މި ދައުވާ ބޭރުކޮށްލާފަ އެވެ.
އެހެންވެ އޭނާގެ ފަރާތުން މި މައްސަލަ މިހާރު ވަނީ ހައިކޯޓަށް ހުށަހަޅާފަ އެވެ.
