އީރާނުގެ ރައީސް ޕެޒެޝްކިއަން އެ ގައުމުގެ އެންމެ މަތީ ވެރިޔާ ޚާމަނާއީއާ ބައްދަލުކުރައްވައިފި
9 އޯގަސްޓު 2026 | އާދީއްތަ 11:35އީރާނުގެ ރައީސް މަސްއޫދު ޕެޒެޝްކިއަން އެގައުމުގެ ރޫހާނީ ލީޑަރާ ބައްދަލުކުރައްވައި، އިގްތިސާދީ ކަންކަމާއި އަސްކަރީ ކުރިއެރުންތަކާ ގުޅޭގޮތުން ފުޅާ ދާއިރާއެއްގައި މަޝްވަރާ ކުރައްވައިފި. މި ބައްދަލުވުމުގައި އެމެރިކާ އާއި އިސްރާއީލުގެ އުދުވާނުތަކާ ކުރިމަތިލުމާއި، ރައްޔިތުންގެ ޒަރޫރީ ބޭނުންތައް ފުއްދުމުގެ އިތުރުން ބޭރުގެ ބައިވެރިންނާއެކު ގުޅުން ބަދަހިކުރުމާ ގުޅޭގޮތުން ވާހަކަދެކެވުނު
އީރާނުގެ ވެރިރަށް ތެހެރާންގައި ހުންނަ އިމާމް ޚުމައިނީ ގްރޭންޑް މިސްކިތުގައި 2026 ވަނަ އަހަރުގެ ޖުލައި މަހުގެ 3 ވަނަ ދުވަހު ބޭއްވި، އާޔަތުﷲ ޚާމަނާއީ އާއި އެމަނިކުފާނުގެ އާއިލާގެ ބޭފުޅުންގެ ހަށިކޮޅުތައް ވަޅުލުމުގެ ރަސްމިއްޔާތުގައި، އެ ގައުމުގެ ރައީސް މަސްއޫދު ޕެޒެޝްކިއަން ބައިވެރިވެވަޑައިގަންނަވަނީ | ގެޓީ އިމޭޖަސް
އީރާނުގެ ރައީސް މަސްއޫދު ޕެޒެޝްކިއަން، އެމަނިކުފާނުގެ ރިޔާސީ ދައުރުގެ ތިންވަނަ އަހަރު ފެއްޓެވުމާ ގުޅިގެން، އިސްލާމީ އިންގިލާބުގެ ލީޑަރު އާޔަތުﷲ ސައްޔިދު މުޖުތަބާ ޚާމަނާއީއާ ބައްދަލުކުރައްވައިފި އެވެ.
އީރާނުގެ ސަރުކާރުގެ ޓީވީ - ޕްރެސްޓީވީ އިން ބުނެފައިވަނީ މި ބައްދަލުކުރެއްވުމުގައި ދެ ބޭފުޅުން ވަނީ ގައުމުގެ އިގްތިސާދީ އަދި އަސްކަރީ ކަންކަމާ ގުޅޭގޮތުން މަޝްވަރާ ކުރައްވާފަ އެވެ.
މި މަޝްވަރާތަކުގެ ތެރޭގައި ރައްޔިތުންގެ ދިރިއުޅުމުގެ ޒަރޫރީ ބޭނުންތަކާއި، އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ އުދުވާނީ ހަނގުރާމައިގެ މިހާރުގެ ހާލަތާއި ކުރިމަގުގައި ކަންތައްތައް ވެދާނެ ގޮތްތަކާ ގުޅޭގޮތުން ވާހަކަދެކެވުނު ކަމަށް ރިޕޯޓުކޮށްފައިވެ އެވެ. މީގެ އިތުރުން އަސްކަރީ ކުރިއެރުންތަކާއި، ގައުމުގެ ވަސީލަތްތައް ރައްކާތެރިކުރުމާއި، އީރާނުގެ ފައިސާ ކަމަށްވާ ރިއާލް އާއި ބޭރު ފައިސާ އަދި ހަކަތައަށް ކުރާ ހޭދަ މެނޭޖްކުރުމުގެ އިތުރުން، ބޭރުގެ ބައިވެރިންނާއެކު އިގްތިސާދީ ގޮތުން ގުޅުން ބަދަހިކުރާނެ ގޮތްތަކާ ބެހޭގޮތުން ވެސް ދެ ބޭފުޅުން މަޝްވަރާ ކުރެއްވި އެވެ.
މި ބައްދަލުވުން ބާއްވާފައިވަނީ، އީރާނާ ދެކޮޅަށް އެއްވެސް ސަބަބަކާ ނުލައި ފެށި ހަނގުރާމައިގައި އެމެރިކާއިން ކަނޑައެޅި މަގްސަދުތައް ހާސިލުނުވުމާ ގުޅިގެން، އީރާނާއި އެމެރިކާއާ ދެމެދު އޮތް ނުތަނަވަސްކަން އިތުރަށް ބޮޑުވެދާނެ ކަމުގެ ބިރު އޮތް ދަނޑިވަޅެއްގަ އެވެ.
މަގާމާ ހަވާލުވެވަޑައިގަތް ފަހުން މުޖުތަބާ ޚާމަނާއީ އަދި އާންމުންގެ ތެރެއިން ފެނިފައެއް ނުވެ އެވެ.
އެމެރިކާ އާއި އިސްރާއީލުން އިސްލާމީ ޖުމްހޫރިއްޔާއާ ދެކޮޅަށް ހަނގުރާމައިގެ ދެވަނަ ބުރު ފަށާފައިވަނީ ފެބްރުއަރީ 28 ގަ އެވެ. އެއީ އިސްލާމީ އިންގިލާބުގެ ކުރީގެ ލީޑަރު އާޔަތުﷲ ސައްޔިދު އަލީ ޚާމަނާއީ އާއި، އަސްކަރިއްޔާގެ އިސް ކޮމާންޑަރުންނާއި އޮފިޝަލުންތަކެއް އަވަހާރަކޮށްލުމަށްފަހު އެވެ.
2024 ވަނަ އަހަރުގެ ރިޔާސީ އިންތިޚާބުގެ ދެވަނަ ބުރު ޖުލައި މަހުގެ 5 ވަނަ ދުވަހު ކާމިޔާބު ކުރެއްވުމާ ގުޅިގެން، ޖުލައި 6، 2024 ގައި ޕެޒެޝްކިއަން ރައީސް ކަމަށް އިންތިޚާބުވެވަޑައިގަތެވެ. އެމަނިކުފާނު ރަސްމީކޮށް ރައީސްކަމުގެ މަގާމަށް އާޔަތުﷲ ސައްޔިދު އަލީ ޚާމަނާއީ އައްޔަންކުރެއްވީ ޖުލައި 28، 2024 ގައެވެ. އަދި އީރާނުގެ މަޖިލީހުގެ ކުރިމަތީގައި ރައީސްކަމުގެ ހުވާ ކުރެއްވީ ޖުލައި 30 ގަ އެވެ.
ޕެޒެޝްކިއަން ރައީސް ކަމަށް އިންތިޚާބުވެވަޑައިގަތީ، ކުރީގެ ރައީސް އިބްރާހީމް ރައީސީ ދަތުރުކުރެއްވި ހެލިކޮޕްޓަރު ވެއްޓުނު ހާދިސާއެއްގައި އަވަހާރަވިތާ މަސްތަކެއް ފަހުންނެވެ.
