ވައިކަރަދޫގެ ގިނަ މަޝްރޫއުތަކެއް ހުއްޓި، ނިމިފައިވާ ބައެއް މަޝްރޫއުތަކުގެ އިމާރާތްތައް ބޭނުންނުކޮށް ހުރުމުގެ ސަބަބުން ވީރާނާވަނީ!
10 އޯގަސްޓު 2026 | ހޯމަ 09:59ވައިކަރަދޫގެ ގިނަ މަޝްރޫއުތަކެއް ހުއްޓި، ނިމިފައިވާ ބައެއް އިމާރާތްތައް ބޭނުންނުކޮށް ހުރުމުގެ ސަބަބުން ވީރާނާވަމުންދާތީ މެންބަރު ހުސައިން ޒިޔާދު ވަނީ ކަންބޮޑުވުން ފާޅު ކުރައްވާފައި. ސްކޫލް ކްލާސްރޫމްތަކާއި އިންޖީނުގެ ފަދަ މުހިންމު މަސައްކަތްތައް ލަސްވަމުންދާތީ ރައްޔިތުންގެ ޝަކުވާ ބޮޑުވެފައިވާކަން ފާހަގަކުރައްވައި، މެންބަރު ވަނީ ސަރުކާރުގެ ވައުދުތައް ފުއްދުމަށް ގޮވާލައްވާފައި
ރައީސް މުއިއްޒު ހދ. ވައިކަރަދޫ އަށް ކުރެއްވި ރަސްމީ ދަތުރުފުޅެއްގައި އެރަށުގެ އޭރު އޮތް ކައުންސިލްއާ ބައްދަލުކުރައްވަނީ. މި ދަތުރުފުޅުގައި ވެސް އެ ރަށަށް ގިނަ ވައުދުތަކެއް ރައީސް މުއިއްޒު ވެވަޑައިގެންނެވި | ރައީސް އޮފީސް
ހދ. ވައިކަރަދޫގެ ގިނަ މަޝްރޫއުތަކެއް ހުއްޓި، ނިމިފައިވާ ބައެއް މަޝްރޫއުތަކުގެ އިމާރާތްތައް ބޭނުންނުކޮށް ހުރުމުގެ ސަބަބުން ވީރާނާވަމުންދާ ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ.
ރާއްޖެޓީވީގެ ވައުދުނާމާ ޕްރޮގްރާމްގައި، މެންބަރު ޒިޔާދު ވަނީ އެ ދާއިރާގެ ރަށްތަކުގައި ސަރުކާރުން ފަށާފައިވާ ގިނަ މަޝްރޫއުތަކެއް ހުއްޓި، ތަރައްގީގެ މަސައްކަތްތައް މަޑުޖެހިފައިވާތީ އެކަމުގެ ކަންބޮޑުވުން ފާޅުކުރައްވާފަ އެވެ. މެންބަރު ޒިޔާދު ފާހަގަކުރެއްވި ގޮތުގައި ވައިކަރަދޫގެ ތަރައްގީގެ ވައުދު ފޮތުގައި އޮތް އެންމެ ބޮޑު އެއް ވައުދު ކަމަށްވާ ސްކޭޓް ޕާކުގެ މަސައްކަތް ވެސް މިހާރު ވަނީ ހުއްޓިފަ އެވެ.
މެންބަރު ޒިޔާދު ވިދާޅުވީ ކައުންސިލް އިންތިޚާބާ ދިމާކޮށް ސްކޭޓް ޕާކު އެޅުމަށް ބިން ކޮނުނު ނަމަވެސް، ފަހުން އެތަނަށް ފަސްއަޅައި މަސައްކަތް ހުއްޓާލާފައިވާ ކަމަށެވެ. އަދި ވޭތުވެދިޔަ ތިން އަހަރު ދުވަހުގެ ތެރޭގައި އެ މަޝްރޫއަށް އެއްވެސް ކުރިއެރުމެއް ލިބިފައި ނުވާކަން އޭނާ ފާހަގަކުރެއްވި އެވެ.
މީގެ އިތުރުން ސްކޫލްގެ 12 ކްލާސްރޫމް އެޅުމުގެ މަސައްކަތް ވެސް ހުއްޓިފައި އޮތުމަށްފަހު މިހާރު ފެނަކައާ ހަވާލުކޮށްގެން ކުރިއަށް ގެންދިޔަ ނަމަވެސް، މިއަހަރުގެ ޖަނަވަރީ މަހު ކިޔަވައިދޭން ފެށުމަށް ވީ ވައުދު ސަރުކާރުން ފުއްދައިދީފައިނުވާ ކަމަށް ވިދާޅުވި އެވެ.
މީގެއިތުރުން ކުޅިވަރު ދަނޑާއި ޒުވާނުންގެ މަރުކަޒުގެ ހާލަތަށް އިޝާރާތް ކުރައްވައި މެންބަރު ޒިޔާދު ވިދާޅުވީ، ދަނޑުގައި ޓާފް އެޅުމަށްފަހު އިތުރު މަސައްކަތެއް ނުކުރެވި އޮތް ނަމަވެސް، ދާދި ފަހުން ބައްތި ޖެހުމުގެ މަސައްކަތް ފަށާފައިވާ ކަމަށެވެ. ނަމަވެސް ޒުވާނުންގެ މަރުކަޒުގެ މަސައްކަތް ނިމި، އިމާރާތް ހިޔާކޮށް ސިމެންތި ޖަހާފައި ހުރި ނަމަވެސް، ބޭނުން ނުކޮށް ގިނަ ދުވަސްވުމުގެ ސަބަބުން އެތަން މިހާރު ވީރާނާވަމުންދާ ކަމަށް މެންބަރު ޒިޔާދު ވިދާޅުވި އެވެ.
އެ ހުރިގޮތަށް ހުރެ ވީރާނާވެގެން އެ ދަނީ މިހާރު. އަޅުގަނޑުމެން އެންމެ ފަހުން މިނިސްޓަރާ ސުވާލުކުރީމަ ޖަވާބުދެއްވީ އެހެން ބަޔަކާ ހަވާލުކުރަނީ ކަމަށްހުސައިން ޒިޔާދު
ވައިކަރަދޫގެ އައު އިންޖީނުގެއާ ގުޅޭގޮތުން މެންބަރު ޒިޔާދު ވިދާޅުވީ، ރާނާއި ސިމެންތިޖަހައި ހިޔާކޮށް ނިމިފައި އޮތް ނަމަވެސް، އެތަން މިހާރު އޮތީ ޖަންގައްޔަކަށް ވެފައި ކަމަށެވެ. އަދި އެމްޑީޕީ ސަރުކާރު ނިމުނުއިރު އިންޖީނުގޭގެ އޮފީސް މަސައްކަތް ނިމިފައިވާ ކަމަށާއި، ނަމަވެސް މިހާތަނަށް އެތަން ހުޅުވިފައި ނުވާކަން އޭނާ ފާހަގަކުރެއްވި އެވެ.
މީގެ އިތުރުން ފަތާ ޓްރެކާއި މޫދަށް އެރޭ ސަރަހައްދުގެ މަސައްކަތް ވެސް ބަޖެޓުގައި ހިމެނިފައިވީ ނަމަވެސް އަމަލީ އެއްވެސް މަސައްކަތެއް ކުރިއަށް ނުދާ ކަމަށް ވިދާޅުވި އެވެ.
މެންބަރު ޒިޔާދު ވިދާޅުވީ، ކުރީ ސަރުކާރުގައި ފެށި މަޝްރޫއުތަކުގެ ތެރެއިން، މިސަރުކާރުގައި ކާމިޔާބު ކަމާއެކު ނިންމާލެވުނީ އޭޓީއެމްގެ މަސައްކަތާއި މަލްޓި ޕާޕަސް ހޯލްގެ މަސައްކަތް ކަމަށެވެ. އަދި ހުއްޓިފައިވާ މަޝްރޫއުތަކާ ގުޅޭގޮތުން ވަޒީރުންނާ ސުވާލުކުރުމުން މަސައްކަތްތައް ހިނގާނެ ކަމަށް ވިދާޅުވި ނަމަވެސް، އަމަލީ ގޮތުން ރަށުން އެކަން ނުފެންނާތީ ރައްޔިތުންގެ ކަންބޮޑުވުން އިންތިހާއަށް އެބައޮތް ކަމަށް އޭނާ ވިދާޅުވި އެވެ.
