އީސީގެ ރައީސް ޒާހިދު އާއި، ރައީސް މުއިއްޒު ސިއްރު ބައްދަވުންތައް ބާއްވަވާއިރު، ކުރިއަށް އޮތް އެއްވެސް އިންތިޚާބެއް ''ސަހަލު'' ގޮތަކަށް ނުދާނެ: މެންބަރު ޒިޔާދު
މެންބަރު ޒިޔާދު ވިދާޅުވީ ރެފަރެންޑަމް ވޯޓާ ގުޅޭގޮތުން ރަނގަޅު މައުލޫމާތު ރައްޔިތުންނަށް ފޯރުކޮށް ނުދޭ ކަމަށާއި، ރައްޔިތުން ގާތުގައި އަހާ ސުވާލު ވެސް ސާފުކޮށް ނުދޭ ކަމަށް. އަދި ރެފަރެންޑަމް ވޯޓާ ގުޅޭގޮތުން ގިނަ މައުލޫމާތުތައް ރައްޔިތުންނަށް ފޯރުކޮށްދޭން ބޭނުންވާ ކަމަށާއި، ނަމަވެސް މަޖިލީހުގެ ތަޅުމުގައި ވެސް ވާހަކަ ދެއްކުމުގެ ފުރުސަތު ނުލިބޭ ކަމަށް އޭނާ ވިދާޅުވި.
އެމްޑީޕީން ބޭއްވި މަގުމަތީގައި ހަރަކާތެއްގައި ވައިކަރަދޫ ދާއިރާގެ މެންބަރު ހުސައިން ޒިޔާދު ރާއްޖެޓީވީއަށް އިންޓަވިއު ދެއްވަނީ. | ރާއްޖެއެމްވީ
އިލެކްޝަންސް ކޮމިޝަން (އީސީ) ގެ ރައީސް މުހައްމަދު ޒާހިދު އާއި، ރައީސް ޑރ.މުހައްމަދު މުއިއްޒު ސިއްރު ބައްދަވުންތައް ބާއްވަވާއިރު، ކުރިއަށް އޮތް އެއްވެސް އިންތިޚާބެއް ''ސަހަލު'' ގޮތަކަށް ނުދާނެ ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވެއްޖެ އެވެ.
ބުރާސްފަތި ދުވަހުގެ ރޭ އެމްޑީޕީން ބޭއްވި ގައުމީ މަޖިލީހުގެ ބައްދަލުވުމުގައި މެންބަރު ޒިޔާދު ވަނީ ރައްޔިތުންގެ މަޖިލީހުގެ ދައުރު ކުރުކޮށް، ރިޔާސީ އިންތިޚާބާއި މަޖިލިސް އިންތިޚާބު އެއްކޮށް ބޭއްވުމާ ގުޅޭގޮތުން ފެންނަ ނުފެންނަ ވޯޓެއް ނެގުމަށް ސަރުކާރުން އަމަލު ކުރާ ގޮތަށް ވަރަށް ބޮޑަށް ފާޑު ވިދާޅުވެފަ އެވެ.
މެންބަރު ޒިޔާދު ވިދާޅުވީ މިކަމާއި ގުޅޭގޮތުން ރަނގަޅު މައުލޫމާތު ރައްޔިތުންނަށް ފޯރުކޮށް ނުދޭ ކަމަށާއި، ރައްޔިތުން ގާތުގައި އަހާ ސުވާލު ވެސް ސާފުކޮށް ނުދޭ ކަމަށެވެ. އަދި ރެފަރެންޑަމް ވޯޓާ ގުޅޭގޮތުން ގިނަ މައުލޫމާތުތައް ރައްޔިތުންނަށް ފޯރުކޮށްދޭން ބޭނުންވާ ކަމަށާއި، ނަމަވެސް މަޖިލީހުގެ ތަޅުމުގައި ވެސް ވާހަކަ ދެއްކުމުގެ ފުރުސަތު ނުލިބޭ ކަމަށް މެންބަރު ޒިޔާދު ވިދާޅުވި އެވެ. އަދި ވިދާޅުވީ މިއަދު ސަރުކާރުން މީޑިއާތަކަށް ފައިސާ ދެމުންދާތީ މީޑިއާތަކުން ވެސް ވާނުވާ ރައްޔިތުންނަށް އޮޅުންފިލުވައި ނުދޭ ކަމަށެވެ.
ކުރިއަށް އޮތް ލޯކަލް ކައުންސިލް އިންތިޚާބާއެކު ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ތާރީހެއްގައި ބޭއްވުމާ މެދު ގޮތެއް ނިންމަން ނަގާ ވޯޓުގައި އެކަމަށް ނޫނެކޭ ބުނަންޖެހޭކަން ފާހަގަކުރައްވައި މެންބަރު ޒިޔާދު ވިދާޅުވީ، އީސީގެ ރައީސް ޒާހިދު، ރައީސް މުއިއްޒާއެކު ސިއްރު ބައްދަލުވުންތައް ބާއްވަވާއިރު ކުރިއަށް އޮތް އެއްވެސް އިންތިޚާބެއް ސަހަލު ގޮތަކަށް ނުދާނެ ކަމަށާއި، ރައްޔިތުން އެވަރު ވިސްނަން ޖެހޭ ކަމަށެވެ.
ފުރަތަމަ ކަމަކަށް ސުވާލު. އެސުވާލެއް ކަމަށް މިހާރު ލަފާކުރެވެނީ ރައީސުލްޖުމްހޫރިއްޔާ އެގެނައި ގާނޫނު އަސާސީ އެ ގެނައި ބަދަލުތައް ތަސްތީގު ކުރަން ފެނޭތޯ ނުވަތަ ނޫން ތޯ އަހާފާނެ ރައްޔިތުން ކައިރި. އަނެހެން އޭގެޒާތުގައި އެއްވެސް މައްސަލައެއް ނޫން. މިގޮތަށް މިހާރު ސުވާލު ކުރާ ގޮތަށް ވިސްނުން ހުރީ. ޕީއެންސީއަށް ނިސްބަތްވާ މަޖިލިސް މެންބަރުން އެހެން ވާހަކަ ވެސް ދައްކަވަނީ. ރައްޔިތުންނާ ކުރިމަތިކުރުވާ ސުވާލަކީ ގާނޫނު އަސާސީއަށް ގެނައި އިސްލާހަށް ތާއީދު ކުރާނަންތޯ ނޫންތޯ. ސުވާލުގައި މާ ބޮޑު މައްސަލައެއް ނެތް. އެހެންނަމަވެސް އޭގެން ނުކުންނަ ނަތީޖާ ބުނެދޭން މިޖެހެނީ އެމްޑީޕީއަށް. އެ ތަސްތީގު ކުރަން ފެނޭތޯ އާއެކޭ ބުނެފިއްޔާ އޭގެން އެ ގެއްލެނީ ރައްޔިތުންނަށް ބަސްބުނުމުގެ ފުރުސަތު އަދި މިހާރު ރަށްރަށުގައި ހިނގާ ތަރައްގީގެ މަޝްރޫއުތައް ހުއްޓިގެން އެދަނީ އޭގެ ނަތީޖާއާ ހަމައިން. މިމައުލޫމާތު ކަރުދާސް އޮންނަން ޖެހޭނެ ފާސް ކުރެވިފައި. މިމައުލޫމާތު ކަރުދާހެއް ނެތް. މިބުނާ ސުވާލެއް ވެސް ނެތް. މިހާރު މިއޮތީ އިލެކްޝަން ކޮމިޝަނާއި ރައީސުލްޖުމްހޫރިއްޔާގެ އެކަހެރި ބައްދަލުވުމުން މިކަން ނިންމާލާފައި.ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސެއިން ޒިޔާދު
މެންބަރު ޒިޔާދު ވިދާޅުވީ ރައްޔިތުންގެ މަޖިލީހުގެ ދައުރު ކުރުކޮށް، ރިޔާސީ އިންތިޚާބާއި މަޖިލިސް އިންތިޚާބު އެއްކޮށް ބޭއްވުމާ ގުޅޭގޮތުން ފެންނަ ނުފެންނަ ވޯޓު ކައުންސިލް އިންތިޚާބުގައި ނެގުމަށް ސަރުކާރުން މަސައްކަތް ކުރަމުންދަނީ މުޅިން އެހެން މަގުސަދެއްގައި ކަމަށެވެ.
މިކަމުގެ ސަބަބުން ރައްޔިތުންނަށް ކުރިމަތިވާނެ ނުރައްކަލާއި، ގެއްލުންތައް ރައްޔިތުންނަށް ހާމަ ކޮށްދޭން ޖެހޭ ކަމަށާއި، މިކަން ވިޔަނުދިނުމަށް އެމްޑީޕީން ކުރަންޖެހޭ ހުރިހާ މަސައްކަތެއް ކުރާނެ ކަމަށް މެންބަރު ޒިޔާދު ވިދާޅުވި އެވެ.
