ރައީސް މުއިއްޒު މިހާތަނަށް ވެވަޑައިގެންނެވި ވައުދުތަކުގެ ޖުމްލަ އަދަދު އެމަނިކުފާނަށް ވެސް އެނގިވަޑައި ނުގަންނަވާނެ: މެންބަރު ޒިޔާދު
ރައީސް މުއިއްޒުގެ ވައުދުތަކުގެ ޖުމްލަ އަދަދު އެނގޭ އެއްވެސް ދިވެހި ރައްޔިތެއް މިހާރު ނުހުންނާނެ
ރާއްޖެޓީވީގެ ޕްރޮގްރާމެއްގައި ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު ވާހަކަ ދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިހާތަނަށް ވެވަޑައިގެންނެވި ވައުދުތަކުގެ ޖުމްލަ އަދަދު އެމަނިކުފާނަށް ވެސް އެނގިވަޑައިނުގަންނަވާނެ ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު ޒިޔާދު ވިދާޅުވީ ރައީސް މުއިއްޒު ރިޔާސީ އިންތިޚާބުގެ ކެންޕޭން ތެރޭގައި ވެވަޑައިގެންނެވި ވައުދު ތަކާ ގުޅޭ ފޮތެއް ޗާޕު ކުރައްވައި ނެރުއްވި ކަމަށެވެ. އޭގެފަހުން މިހާތަނަށް ވެސް އެ ފޮތުގައި ހިމެނޭ ވައުދުތަކަށް ވުރެ ގިނަ ވައުދުތައް ވެވަޑައިގެންފައިވާ ކަމަށް އޭނާ ވިދާޅުވި އެވެ.
މެންބަރު ޒިޔާދު ވިދާޅުވީ ރައީސް މުއިއްޒުގެ ވައުދުތަކުގެ ޖުމްލަ އަދަދު އެނގޭ އެއްވެސް ދިވެހި ރައްޔިތެއް މިހާރު ނުހުންނާނެ ކަމަށެވެ.
ރަށެއްގައި ކުރަން ޖެހޭ އުމްރާނީ މަސައްކަތް ތަކަށްވުރެ ރަށަކަށް ވަޑައިގަންނަވައި، އެރަށުގެ ކައުންސިލްއާ ރައްޔިތުންނާ ބައްދަލުކުރައްވައި ފޮޓޯ ނެންގެވުން ފަސޭހަކަން ފާހަގަކުރައްވައި މެންބަރު ޒިޔާދު ވިދާޅުވީ ރައީސް މުއިއްޒު އެ މަސައްކަތް ވަރަށް ރަނގަޅަށް ކުރައްވާ ކަމަށާއި، އެކަމުގައި ނަތީޖާ ފެންނަ ކަމަށެވެ. މި ސަރުކާރުގެ ދެ އަހަރުގެ ތެރޭގައި އެމަނިކުފާނު ކުރެއްވި މަސައްކަތްތަކީ ރަށްރަށަށް ދަތުރު ކުރެއްވުން ކަމަށް މެންބަރު ޒިޔާދު ވިދާޅުވި އެވެ.
އަނެއްކާ މިދަތުރު ކުރައްވަނީ އެވައުދުތައް ފުއްދަން. ދެން ހަދަން ޖެހެނީ ކިހިނެތްތޯ ބަލަން. ދަތުރުކޮށް ނިންމާފައި ދެން އައިސްފައި މި ވިދާޅުވަނީ މާލެ އަރާފައި ތިމަންނާމެން ކުރާނީ މައުނަވީ ގޮތުންނޭ. ތިމަންނާ ކުރާނީ ބޮޑު ސިންގާ ޕްލޭނެއް 20 އަހަރުގެ ތަރައްގީ ހަދާފައޭ. މަސައްކަތް ފަށާނީ. އެއީ ވެރިކަމަށް ވަޑައިގެންފައި ވިދާޅުވި. މިހާރު އެ ޕްލޭން ހަދަން ބަޔަކަށް ދީގެން އެ އުޅެނީ. ދެ އަހަރުވީއޭ. ހަމަ ހުސް ދަތުރަށް ދިޔައީ. ރައްޔިތުންނަށް މިލިބޭ ލުއިކަމަކީ ރައީސުލްޖުމްހޫރިއްޔާ ކައިރިން ފެނުނީމަ އެކަން އެނގިވަޑައިގަތީމަ ރައީސުލްޖުމްހޫރިއްޔާ މި ހަދާ އެއްޗަކީ ކޮންމެ ރަށަކަށް ވެސް ދަނީ. ދެން ކަމެއް ނުވޭ. އެކަމަކު ރައީސް އައު ވަދެއްވީމަ އަނެއްކާ ވެސް އުންމީދުގައިތާ ރައްޔިތުން ތިބޭނީ. އަބަދު ވެސް. ވައުދުވުން މި ދެ އަހަރު ވެސް މިދިޔައީ. އެންމެ ފަހުން މި ނިންމާލި ކަމަށް ވަނީ އަދި މާލޭގެ ރައްޔިތުންނާ ވަކިން ބައްދަލުވެ ނިމިގެން ކަމަށް ވަނީ ނިމޭނީ. އެހިސާބުން އެނގޭނީ ޖުމްލަ ވައުދު ހުރި ވަރެއްރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު
މެންބަރު ޒިޔާދު ވިދާޅުވީ ރައްޔިތުންނާ ބައްދަލު ކުރައްވައި ތަކުރާރުކޮށް ވައުދުވެވަޑައިގެން ރައީސް މުއިއްޒު ނަތީޖާ ދައްކަވާ ކަމަށެވެ. އަދި އޭ ރިޕޯޓާއި ޔޫ ރިޕޯޓަކީ ވެސް ނަތީޖާ އެއް ކަމަށާއި، ގޮތް ނިންމާނީ ރައްޔިތުން ކަމަށް އޭނާ ވިދާޅުވި އެވެ.
