ދީނަށް ލޯބި ކުރާ މީހުންނާއި ތަނަވަސްކަން ހުރި މީހުން ގިނަވާ ވަރަކަށް ހައްޖު ކިޔު ދިގުވާނެ ކަމަށް މިނިސްޓަރު ޝަހީމް ވިދާޅުވެއްޖެ
4 އޯގަސްޓު 2026 | އަންގާރަ 17:24ދީނަށް ލޯބިކުރާ މީހުންނާއި ތަނަވަސްކަން އިތުރުވެ، ހައްޖަށް ދާން ބޭނުންވާ މީހުން އިތުރުވާ ވަރަކަށް ހައްޖަށް ކިޔު ދިގުވަމުންދާނެ ކަމަށް އިސްލާމިކް މިނިސްޓަރު ޝަހީމް ވިދާޅުވެއްޖެ. މިނިސްޓަރު ޝަހީމް ވިދާޅުވީ ހައްޖު ކިޔު ދިގުވުމަކީ ތަބީއީ ކަމެއް ކަމަށް. އަދި މިސްރު، އިންޑޮނީޝިއާ، ޕާކިސްތާނު ފަދަ ގައުމުތަކުގައި ވެސް ހައްޖު ކިޔު މިލިއަނުން އޮންނާނެ ކަމަށް މިނިސްޓަރު ޝަހީމް ވިދާޅުވި
އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި އިސްލާމިކް މިނިސްޓަރު ވާހަކަ ދައްކަވަނީ | ރައްޔިތުންގެ މަޖިލިސް
ދީނަށް ލޯބިކުރާ މީހުންނާއި ތަނަވަސްކަން އިތުރުވެ، ހައްޖަށް ދާން ބޭނުންވާ މީހުން އިތުރުވާ ވަރަކަށް ހައްޖު ކިޔު ދިގުވަމުންދާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ވައިކަރަދޫ ދާއިރާގެ މެންބަރު ހުސެއިން ޒިޔާދު ވަނީ ދިވެހި ސަރުކާރާއި ސައުދީ ސަރުކާރާ ދެމެދު ގާތް ގުޅުމެއް އުފެދިފައި އޮތްކަމަށް މިނިސްޓަރު ޝަހީމް ވިދާޅުވަމުންދާކަމަށާއި އެހެންކަމަށްވާ ނަމަ، ހައްޖު ކޯޓާ އިތުރު ކުރުމުގައި އެއްވެސް އުއްމީދެއް އެބަ އޮތްތޯ ސުވާލު ކުރައްވާފައި އެވެ.
މެންބަރު ޒިޔާދުގެ ސުވާލަށް ޖަވާބު ދެއްވަމުން މިނިސްޓަރު ޝަހީމް ވިދާޅުވީ ހައްޖު ކިޔު ދިގުވުމަކީ ތަބީއީ ކަމެއް ކަމަށެވެ. އަދި މިސްރު، އިންޑޮނީޝިއާ، ޕާކިސްތާނު ފަދަ ގައުމުތަކުގައި ވެސް ހައްޖު ކިޔު މިލިއަނުން އޮންނާނެ ކަމަށް މިނިސްޓަރު ޝަހީމް ވިދާޅުވި އެވެ.
މިނިސްޓަރު ޝަހީމް ވިދާޅުވީ ޕެންޝަން ފަންޑުގައި ހުންނަ ފައިސާ ބޭނުން ކޮށްގެން ހައްޖަށް ދާން ފައިސާ ދައްކާ މީހުންނަކީ މި އަންނަ އަހަރު ހައްޖަށް ދާން ބޭނުންވާ މީހުންނަށް ނުވެދާނެ ކަމަށެވެ. އެގޮތުން ބައެއް މީހުން އެމީހުންގެ ދަރިން މީގެ 10 އަހަރު ފަހުން ހައްޖަށް ދާން މިހާރު ފައިސާ ދައްކާ ކަމަށް މިނިސްޓަރު ޝަހީމް ވިދާޅުވި އެވެ.
މީގެއިތުރުން ހައްޖަށް ދިޔުމުގައި މިހާރު ދިމާވާ ދަތިތަކަށް ހައްލެއް އަންނާނެ ކަމަށާއި، އެއްވެސް ގައުމަކަށް ހައްޖު ކޯޓާ އިތުރުވެގެން ދާނަމަ ރާއްޖެއަށް ވެސް އިތުރު ވެގެން ދާނެ ކަމަށް މިނިސްޓަރު ޝަހީމް ވިދާޅުވި އެވެ.
ޕްލޭން ކުރެވިގެން މިހާރު އެ ދަނީ، މިހާރު މިކަން އިންތިޒާމްވެފައި މިއޮތީ ހަގީގަތުގައި ވަރަށް ރަނގަޅަށް ދެން އެހެންނޫނީއާ މުއްސަނދިންނަށް އެކަނި ހައްޖަށް ދެވެނީ ފަގީރު މީހާއަށް ނޯވޭ ހައްޖަށް ދާކަށް، ކޯޓާތައް އަމިއްކަ ކުންފުނިތަކުން މީހުންނަށް ބޮޑު އަގުގައި ވިއްކަމުން ދިޔައީ، އެހެންވީމަ އެ ނިޒާމް އެވަނީ ނިމިފައިޑރ. މުހައްމަދު ޝަހީމް އަލީ ސައީދު
ސައުދީ އަރަބިއްޔާގެ ޝޫރާ މަޖިލީހުގެ ރައީސް ރާއްޖެ ވަޑައިގެންނެވިކަން ފާހަގަ ކުރައްވައި، ރާއްޖެ އާއި ސައުދީއާ ދެމެދު އޮތީ ވަރަށް ރަނގަޅު ގުޅުމެއް ގާއިމު ކުރެވިފައި ކަމަށް މިނިސްޓަރު ޝަހީމް ވިދާޅުވި އެވެ.
ސަރުކާރުގެ ހަރަދުގައި ހައްޖަށް މީހުން ފޮނުވުމާއި ގުޅިގެން ފައިސާ ދައްކާފައިވާ މީހުން ތިއްބާ އެ މީހުންނަށް ފުރުސަތު ނުދީ ހައްޖު ކިޔުގެ ބޭރުން ބަޔަކަށް ފުރުސަތު ދީފައިވާކަމުގެ ތަހުމަތުތަކެއް ވަނީ މިނިސްޓަރު ޝަހީމަށް އަމާޒުވެފައި އެވެ. ނަމަވެސް މިނިސްޓަރު ވަނީ އެ ތުހުމަތުތައް ދޮގުކުރައްވާ، ހައްޖު ކިޔުއަށް ނުފޫޒު ނުފޯރުވާ ކަމަށް ވިދާޅުވެފައި އެވެ.
