ޤައުމީ ޓީމުގެ ކޯޗަކަށް ހޮންގް ހަމަޖެއްސި މައްސަލައިގައި، ދެކުނު ކޮރެއާގެ ފުޓުބޯޅަ އެސޯސިއޭޝަން އަށް ފުލުހުން ރެއިޑު ޖަހައިފި
6 އޯގަސްޓު 2026 | ބުރާސްފަތި 15:19މި މައްސަލަ ފެންމަތިވެފައި ވަނީ 2013 އިން 2014 އަށް ވެސް ކޮރެއާގެ ކޯޗުކަން ކުރި ހޮންގް، 2024 ވަނަ އަހަރު އަލުން އެ މަޤާމާ ހަވާލުވުމާ ގުޅިގެން. ބޭރުގެ ކޯޗުން ހޯދުމަށް އެތަށް މަސްދުވަސް ވަންދެން ކުރި މަސައްކަތް ކުއްލި އަކަށް ހުއްޓާލުމަށް ފަހު، ކުރު ބައްދަލުވުމަކަށް ފަހު ހޮންގް އައްޔަން ކުރުމުން ގިނަ ބައެއްގެ ފާޑު ކިޔުން ވަނީ އަމާޒުވެފައި
ދެކުނު ކޮރެއާގެ ކޯޗު ކަމުގައި އެންމެ ފަހުން ހޮންގް މިޔުންގް ބޯ | ރޮއިޓާސް
ދެކުނު ކޮރެއާގެ ޤައުމީ ފުޓުބޯޅަ ޓީމުގެ ކޯޗުގެ މަޤާމަށް ހޮންގް މިޔުންގް ބޯ އައްޔަންކުރި މަރުހަލާގައި "ވިޔަފާރި އަށް ހުރަސްއެޅި" ކަމަށް ބުނެ ކުރާ ތަހުގީގަކާ ގުޅިގެން، ސޯލްގެ ފުލުހުން އެ ޤައުމުގެ ފުޓުބޯޅަ އެސޯސިއޭޝަން (ކޭއެފްއޭ) ގެ އޮފީސްތައް ރެއިޑުކޮށް ފާސްކޮށްފި އެވެ.
މި މައްސަލަ ފެންމަތިވެފައި ވަނީ 2013 އިން 2014 އަށް ވެސް ކޮރެއާގެ ކޯޗުކަން ކުރި ހޮންގް، 2024 ވަނަ އަހަރު އަލުން އެ މަޤާމާ ހަވާލުވުމާ ގުޅިގެންނެވެ. ބޭރުގެ ކޯޗުން ހޯދުމަށް އެތަށް މަސްދުވަސް ވަންދެން ކުރި މަސައްކަތް ކުއްލިއަކަށް ހުއްޓާލުމާ އެކު، ކުރު ބައްދަލުވުމަކަށް ފަހު ހޮންގް އައްޔަން ކުރުމުން ގިނަ ބައެއްގެ ފާޑު ކިޔުން ވަނީ އަމާޒުވެފައި އެވެ.
މިދިޔަ މަހު ބޭއްވި ޕާލަމެންޓްރީ އަޑުއެހުމެއްގައި ހޮންގް ވަނީ އޭނާ އައްޔަން ކުރުމުގައި ޚާއްސަ އިނާޔަތްތަކެއް ލިބިފައިވާ ކަމަށް ބުނެ، މެންބަރުން ކުރެއްވި ތުހުމަތުތައް ދޮގުކޮށްފައި އެވެ. ނަމަވެސް، ދެކުނު ކޮރެއާގެ ވޯލްޑް ކަޕް ދަތުރު ގްރޫޕް ސްޓޭޖުން ކަޓައިގެން ދިޔުމުގެ ޒިންމާ އޭނާ ވަނީ އުފުލާފައި އެވެ.
ދެކުނު ކޮރެއާގެ މިނިސްޓްރީ އޮފް ކަލްޗަރ، ސްޕޯޓްސް އެންޑް ޓޫރިޒަމް އިން 2024 ވަނަ އަހަރުގެ އޮކްޓޫބަރު މަހު ބުނެފައި ވަނީ، ހޮންގް އަދި ކުރީގެ ކޯޗު ޔާގެން ކްލިންސްމަން އައްޔަން ކުރުމުގައި ކޭއެފްއޭ އިން އަމިއްލަ ޤަވާއިދުތަކާ ޚިލާފުވެފައިވާ ކަމަށެވެ. ޚާއްސަކޮށް، ޓެކްނިކަލް ޑައިރެކްޓަރު ހޮންގްއާ ބައްދަލުކުރި ކުރުމަކީ ރަނގަޅު އިންޓަވިއުއެއްގެ ގޮތުގައި ބެލެވެން ނެތް ކަމަށް މިނިސްޓްރީ އިން ފާހަގަކޮށްފައިވެ އެވެ.
އެހެން ނަމަވެސް، މި މަރުހަލާގައި އެއްވެސް ޣައިރު ގާނޫނީ އަމަލެއް ހިންގާފައިވާ ކަމުގެ ހެއްކެއް ފެނިފައި ނުވާތީ، ހޮންގްގެ އެއްބަސްވުން ބާތިލު ކުރުމަށް މިނިސްޓްރީ އިން އަމުރުކޮށްފައި ނުވެ އެވެ. ފުލުހުން މި މައްސަލަ ތަހުގީގު ކުރަން ފަށާފައި ވަނީ ވޯލްޑް ކަޕްގެ ކުރިން ހޮންގް އައްޔަން ކުރުމުގައި ނުފޫޒު ފޯރުވާފައިވާ ކަމަށް ބުނެ ހުށަހެޅި ޝަކުވާތަކަކާ ގުޅިގެންނެވެ.
މިހާތަނަށް ހޮންގް ނުވަތަ ކޭއެފްއޭގެ އެއްވެސް އޮފިޝަލެއްގެ މައްޗަށް ޖިނާއީ ކުށެއް ސާބިތުވެފައި ނުވެ އެވެ. އަދި މި ރެއިޑްއާ ގުޅިގެން އަލް ޖަޒީރާ އިން ކުރި ސުވާލުތަކަށް ކޭއެފްއޭ އިން އަދި ވަކި ޖަވާބެއް ދީފައި ނުވާ ކަމަށް އެ ނޫހުން ވަނީ ބުނެފައި އެވެ.
