2030 ވަނަ އަހަރުގެ ވޯލްޑް ކަޕްއާ ހަމައަށް، އެމެރިކާގެ އެއްބަސްވުން ޕޮޗެޓީނޯ އައުކޮށްފި

އެމެރިކާގެ ޤައުމީ ފުޓުބޯޅަ ޓީމަށް އިރުޝާދު ދެމުން އަންނަ އާާޖެންޓީނާގެ މައުރީސިއޯ ޕޮޗެޓީނޯ، އެ ޓީމުގެ އެއްބަސްވުން އައުކޮށްފި އެވެ. 

އެމެރިކާގެ ކޯޗުކަމާ ޕޮޗެޓީނޯ ހަވާލުވެފައި ވަނީ 2024 ވަނަ އަހަރު އެވެ. އެމެރިކާގެ ކޯޗުކަން އޭނާއާ ހަވާލު ކޮށްފައި ވަނީ 2026 ވަނަ އަހަރުގެ ވޯލްޑް ކަޕްގެ ނިޔަލަށެވެ. އެމެރިކާގައި ކުރިއަށް ދިޔަ މުބާާރާތުގައި އެ ޤައުމަށް ދެވުނީ ގަދަ 16 އާ ހަމަށެވެ. 

ޕޮޗެޓީނޯގެ މުސްތަޤުބަލާ މެދު ސުވާލުތަކެއް އުފެދިފައި ވަނިކޮށް، އެމެރިކާާ އިން ވަނީ އޭނާ އަށް އައު އެއްބަސްވުމެއް ހުށަހަޅައިފަ އެވެ. ހޯމަ ދުވަހު ޕޮޗެޓީނޯ އެމެރިކާގެ އެއްބަސްވުން އައުކޮށްފައިވާއިރު، އައު އެއްބަސްވުމުގެ މުއްދަތު ހަމަވާނީ 2030 ވަނަ އަހަރުގެ ވޯލްޑް ކަޕްގެ ނިޔަލަށެވެ. 

އެމެރިކާގެ ސޮކާގެ ސީއީއޯ ޖޭޓޯ ބެޓްސަން ނެރުއްވި ބަޔާނެއްގައި ވިދާޅުވީ، ޕޮޗެޓީނޯ އާއި އޭނާގެ ޓީމުގެ މަސައްކަތުން އެމެރިކާގެ ފުޓުބޯޅަ ކުރިއަރާ ކަމަށް ޤަބޫލު ކުރައްވާ ކަމަށެވެ. ޕޮޗެޓީނޯ އަށް ހަވާލުކުރި އައު ޕްރޮޖެކްޓަކީ އެމެރިކާގެ ޤައުމީ ފިރިހެން ޓީމުގެ ކުރިއެރުމާއި، ޓީމުގެ މުސްތަޤުބަލަށް ރަނގަޅު ފައިދާތަކެއް ކުރާނެ ކަމަށް ޤަބޫލު ކުރައްވާ ކަމަށް ވެސް ވިދާޅުވެފައިވެ އެވެ. 

ޕޮޗެޓީނޯގެ އިރުޝާދުގެ ދަށުން މިފަހަރުގެ ވޯލްޑް ކަޕްގެ ގުރޫޕު ސްޓޭޖުގައި އެމެރިކާ އިން ވަނީ ޕެރަގުއޭ އާއި އޮސްޓްރޭލިއާ ބަލިކޮށްފައި އެވެ. ފަހު މެޗުގައި ތުރުކީ އަތުން ބަލިވިއިރު، ގަދަ 32 ގައި އެމެރިކާ އިން ވަނީ ބޮސްނިއާގެ މައްޗަށް ވެސް ކުރި ހޯދައިފަ އެވެ. ގަދަ 16 ގައި ބެލްޖިއަމް އަތުން ބަލިވެ، އެމެރިކާ މުބާރާތުން ކެޓީ އެވެ. 

އެމެރިކާާގެ އެއްބަސްވުން އައު ކުރުމަށް ފަހު ޕޮޗެޓީނޯ ބުނެފައި ވަނީ، އެމެރިކާގައި މިދިޔަ ދެ އަހަރު ކުރި މަސައްކަތާ މެދު ހިތްހަމަޖެހޭ ކަމަށެވެ. އަދި އެމެރިކާގެ ޓީމު ވަރުގަދަ ކުރުމާ އެކު، ޓީމު ކުރިއެރުވުމަށް ގިނަ ފުރުސަތުތަކެއް އޮތް ކަމަށް އޭނާ ޤަބޫލު ކުރާ ކަމަށް ވެސް ޕޮޗެޓީނޯ ބުންޏެވެ. ޕޮޗެޓީނޯ ބުނީ އެމެރިކާ އާއެކު ކުރިއަށް ދިޔުމަށް އޭނާގެ ޝައުޤުވެރިކަން އޮތް ކަމަށެވެ.

މީގެ ކުރިން ޓޮޓެންހަމް އާއި ޗެލްސީ އަށް ވެސް އިރުޝާދު ދީފައިވާ ޕޮޗެޓީނޯ އަކީ، 2019 ވަނަ އަހަރު ޓޮޓެންހަމް އަށް ޔުއެފާ ޗެމްޕިއަންސް ލީގުގެ ފައިނަލްގެ ޖާގަ ހޯދައިދިން ކޯޗެވެ.