ދެވަނަ ކުއާޓަރު ގައި މޯލްޑިވްސް އިސްލާމިކް ބޭންކަށް 111 މިލިއަން ރުފިޔާގެ ސާފު ފައިދާ
2 އޯގަސްޓު 2026 | އާދީއްތަ 12:26މޯލްޑިވްސް އިސްލާމިކް ބޭންކް (އެމްއައިބީ) އަށް ލިބުނު އާމްދަނީ އާއި ފައިދާ އިތުރުވެ، މި އަހަރުގެ ދެވަނަ ކުއާޓަރުގައި އެ ބޭންކުން ބޮޑު ކުރިއެރުމެއް ހޯދައިފި. މި މުއްދަތުގައި ބޭންކުގެ ހިންގުމުގެ ފައިދާ 170 މިލިއަނަށް އަރާފައިވާއިރު، ކަސްޓަމަރުން ޑިޕޮސިޓް ކުރި މިންވަރު ވެސް ވަނީ 16.22 ބިލިއަން ރުފިޔާއަށް އިތުރުވެފައި. ބޭންކުގެ ސާފު ފައިދާގެ ގޮތުގައި 111.42 މިލިއަން ރުފިޔާ ލިބިފައިވާއިރު، މިއީ ކުރީ އަހަރާ އަޅާބަލާއިރު 15.66 އިންސައްތައިގެ ކުރިއެރުމެއް
އަރިއަތޮޅު އުތުރުބުރީ ތޮއްޑޫގައި މޯލްޑިވްސް އިސްލާމިކް ބޭންކް (އެމްއައިބީ) ގެ އޭޓީއެމްގެ ޚިދުމަތް ރަސްމީކޮށް އިފްތިތާހުކުރުން | އެމްއައިބީ
2026 ވަނަ އަހަރުގެ ދެވަނަ ކުއާޓަރު ނިމުނުއިރު، މޯލްޑިވްސް އިސްލާމިކް ބޭންކުގެ ސާފު ފައިދާގެ ގޮތުގައި 111.42 މިލިއަން ރުފިޔާ ލިބިއްޖެ އެވެ. މިއީ އަހަރުން އަހަރަށް ބަލާއިރު 15.66 އިންސައްތައިގެ ކުރިއެރުމެކެވެ.
ކުއާޓަރު ނިމުނު އިރު މޯލްޑިވްސް އިސްލާމިކް ބޭންކް (އެމްއައިބީ) ގެ ޖުމްލަ މުދަލުގެ އަގު (ޓޯޓަލް އެސެޓްސް) ވަނީ 19.31 ބިލިއަން ރުފިޔާއަށް އަރާފަ އެވެ. މިއީ އޭގެ ކުރީ ކުއާޓަރާ އަޅާބަލާއިރު 4.37 އިންސައްތައިގެ ކުރިއެރުމެކެވެ. އަދި 2025 ވަނަ އަހަރުގެ މި މުއްދަތާ އަޅާބަލާއިރު މިއީ 43.52 އިންސައްތައިގެ ބޮޑު ކުރިއެރުމެކެވެ.
މީގެއިތުރުން، ހިންގުމުގެ ފައިދާގެ ގޮތުގައި އެ ބޭންކަށް 170 މިލިއަން ރުފިޔާ ލިބިފައިވާއިރު، މިއީ ކުރީ ކުއާޓަރާ އަޅާބަލާއިރު 4.29 އިންސައްތައިގެ އިތުރުވުމެކެވެ.
ކަސްޓަމަރުން ބޭންކުގައި ފައިސާ ރައްކާކުރި މިންވަރު ނުވަތަ ޑިޕޮސިޓްތަކަށް ބަލާއިރު، މި ކުއާޓަރުގައި 5.37 އިންސައްތަ އިތުރުވެ، ޖުމްލަ 16.22 ބިލިއަން ރުފިޔާއަށް ވަނީ އަރާފަ އެވެ. އަދި ވޭތުވެދިޔަ އަހަރާ އަޅާބަލާއިރު ޑިޕޮސިޓްތައް ވަނީ 46.24 އިންސައްތައިގެ ބޮޑު ކުރިއެރުމެއް ހޯދާފަ އެވެ.
ބޭންކަށް ލިބުނު އާމްދަނީއަށް ބަލާއިރު، ޖުމްލަ އާމްދަނީ ވަނީ 284.60 މިލިއަން ރުފިޔާއަށް އަރާފަ އެވެ. މިއީ ކުރީ ކުއާޓަރާ އަޅާބަލާއިރު 5.85 އިންސައްތައިގެ ކުރިއެރުމެކެވެ. އަދި 2025 ވަނަ އަހަރުގެ މި މުއްދަތާ އަޅާބަލާއިރު މިއީ 32.07 އިންސައްތައިގެ އިތުރުވުމެކެވެ.
