ޖޯން އޮސޮފް، ޑިމޮކްރެޓިކް ޕާޓީ އިން ބޭނުންވާފަދަ އައު "އޮބާމާ"!

އެމެރިކާގެ ކުރީގެ ރައީސް ބަރަކް އޮބާމާ ފަދަ ނުފޫޒު ގަދަ ޝަހުސިއްޔަތެއް ހޯދުމަށް ޑިމޮކްރެޓިކް ޕާޓީ އިން ކުރަމުން އަންނަ މަސައްކަތުގައި، ޖޯޖިއާގެ ސެނެޓަރު ޖޯން އޮސޮފް އަކީ 2028 ވަނަ އަހަރުގެ ރިޔާސީ އިންތިޚާބުގައި އެ ޕާޓީ އަށް އޮތް އައު އުންމީދެއްގެ ގޮތުގައި ފާހަގަވާން ފަށައިފި އެވެ. 

އުމުރުން 39 އަހަރުގެ ޔަހޫދީ ނަސްލަށް ނިސްބަތްވާ އޮސޮފް އަކީ މިހާރު ޑިމޮކްރެޓިކް ޕާޓީގެ މެންބަރުންގެ މެދުގައި މަޤުބޫލުވަމުން އަންނަ ބޭފުޅަކަށްވާއިރު، އޭނާ އަކީ އަމިއްލަ ސިޔާސީ މަސްލަޙަތަށްވުރެ ޤައުމީ މަސްލަޙަތު އިސްކުރާ ބޭފުޅެއްގެ ގޮތުގައި ގިނަ ބަޔަކު ޤަބޫލު ކުރެ އެވެ. 

އޮސޮފްގެ ސިޔާސީ ބާރުވެރިކަން އިތުރުވަމުންދާ ކަމުގެ އެންމެ ބޮޑު ހެތްކެކީ، އެމެރިކާގެ ރައީސް ޑޮނަލްޑް ޓްރަމްޕްގެ ފާޑުކިޔުންތައް އޭނާ އަށް އަމާޒުވާން ފެށުމެވެ. ޓްރަމްޕް ވަނީ އޮސޮފް އަކީ، ނާކާމިޔާބު އަދި ދަށު ދަރަޖައިގެ ސެނެޓަރެއްގެ ގޮތުގައި ސިފަ ކުރައްވައި، އޭނާ އަށް ވަރަށް ބޮޑަށް ފާޑު ވިދާޅުވެފައި އެވެ. 

ނަމަވެސް ސިޔާސީ ތަޖުރިބާާކާރުން ދެކޭ ގޮތުގައި ޓްރަމްޕް މިގޮތަށް ހަމަލާ ދެއްވަނީ އޮސޮފްގެ ފަރާތުން ކުރިމަތި ވެދާނެ ނުރައްކަލެއް އިޙުސާސް ކުރެއްވޭތީ އެވެ. ޚާއްސަކޮށް މިދިޔަ ހަފުތާގައި ކޮންގްރެސްގައި ބޭއްވި އަޑުއެހުމެއްގައި، ޑިފެންސް ސެކްރެޓަރީ ޕީޓް ހެގްސެތުއާ އީރާާން ހަނގުރާމައާ ގުޅޭ ގޮތުން ކުރިމަތިލައްވައި އޮސޮފް ދެއްކެވި ހުނަރުވެރި ކަމުން ގިނަ ބައެއްގެ ސަމާލުކަން ވަނީ ލިބިފައި އެވެ. 

ކުރިއަށް އޮތް އެމެރިކާގެ މިޑްޓާމް އިންތިޚާބުގައި ޖޯޖިއާގެ ސެނެޓު ގޮނޑި އަށް ވެރިކަން ކުރާ ރިޕަބްލިކަން ޕާޓީގެ ކެންޑިޑޭޓް މައިކް ކޮލިންސްއާ ދެކޮޅަށް އޮސޮފް ވާދަ ކުރައްވާއިރު، އެންމެ ފަހުގެ ޚިޔާލު ހޯދުމުގެ ވޯޓުތަކުން ދައްކަނީ އޮސޮފް އުޅުއްވަނީ ނުވަ އިންސައްތަ އާއި، 13 އިންސައްތައާ ދެމެދުގެ ކުރިއެރުމެއްގައި އެވެ. 

އޮސޮފްގެ ކެމްޕެއިން ބިނާ ކޮށްފައި ވަނީ ޓްރަމްޕްގެ އާއިލާ އިން ވެރިކަމުގެ ބޭނުންކޮށްގެން އެތައް މިލިއަނުން ފައިސާ ހޯދާއިރު، އާންމު ރައްޔިތުންނަށް ބޭސްފަރުވާ ނުކުރެވޭ ކަމުގެ މައްޗަށެވެ. އަދި މިއީ ހަމައެކަނި މުއްސަނދިންގެ ސަރުކާރެއް ކަމަށް ވިދާޅުވެ، އޭނާ ދެއްވާ ތަޤުރީރުތައް ސޯޝަލް މީޑިއާގައި ވަރަށް ބޮޑަށް ވައިރަލް ވަމުންދެ އެވެ. 

ފޮރިން ސިޔާސަތަށް ބަލާއިރު، އޮސޮފް އަކީ އިސްރާއީލްގެ ސަލާމަތައް ތާއީދު ކުރާ ބޭފުޅަކަށް ވީ ނަމަވެސް، ބެންޖަމިން ނަތަންޔާހޫގެ ސަރުކާރުން ޣައްޒާގައި ހިންގަމުން އަންނަ އަމަލުތަަކަށް އޭނާ ފާޑު ވިދާޅުވެ އެވެ. ޣައްޒާގައި އާންމުންނަށް ލިބެމުންދާ ގެއްލުންތަކަކީ، އަޚުލާޤީ ނާކާމިޔާބެއް ކަމަށް ސިފަ ކުރެއްވި ފުރަތަމަ ޔަހޫދީ މެންބަރުންގެ ތެރޭގައި އޭނާ ހިމެނެ އެވެ. މީގެ އިތުރުން، އިސްރާއީލް އަށް ހަތިޔާރު ވިއްކުން ހުއްޓުވުމަށް ގޮވާލާ ޤަރާރަކަށް ވެސް އޭނާ ވަނީ ވޯޓު ދެއްވައިފަ އެވެ. މި ސަބަބުތަކާ ހުރެ ޑިމޮކްރެޓިކް ޕާޓީގެ ތެރޭގައި އޮންނަ ތަފާތު ފިކުރުތަކުގެ މެދުގައި އޭނާ އަށް އޮތް ތާއީދު ބޮޑެވެ. 

އެމާސަން އިންސްޓިޓިއުޓް އިން ދާދި ފަހުން ކުރި ސާވޭ އަކުން ދައްކާ ގޮތުގައި، 2028 ވަނަ އަހަރުގެ ރިޔާސީ ޕްރައިމަރީގައި ވާދަ ކުރާނެ ކަމަށް ބެލެވޭ ބޭފުޅުންގެ ތެރެއިން އޮސޮފް އޮތީ 13 އިންސައްތަ އާއެކު ތިން ވަަނައިގަ އެވެ. މި ލިސްޓުގެ ކުރީގައި އުޅެނީ 19 އިންސައްތަ އާއެކު ޕީޓް ބުޓިޖެޖް އެވެ. އަދި 17 އިންސައްތަ އާއެކު ދެ ވަނައިގައި އޮތީ ކެލިފޯނިއާގެ ގަވަރުނަރު ގޭވިން ނިއުސަމް އެވެ. 

މިވަގުތު ރިޔާސީ އިންތިޚާބަށް ޝައުޤުވެރިކަން ނެތް ކަމަށް އޮސޮފް ވިދާޅުވި ނަމަވެސް، މިޑްޓާމް އިންތިޚާބުގައި ޖޯޖިއާ ފަދަ މުހިންމު ސްޓޭޓް އަކުން ބޮޑު އަޣުލަބިއްޔަތެއް ހޯއްދަވައިފި ނަމަ، އޭނާ އަކީ ޑިމޮކްރެޓުންގެ އައު "އޮބާމާ" އަށް ވުމުގެ ފުރުސަތު އޮތް ކަމަށް ބައެއް ފަރާތްތަކުން ދެކެ އެވެ.