އިސްރާއީލަށް ދެމުން އަންނަ އަސްކަރީ އެހީ ހުއްޓާލަން އެމެރިކާގެ ޑިމޮކްރަޓިކް ޕާޓީ އިން ތާއީދު ކުރޭ

އެމެރިކާ އިން އިސްރާއީލަށް ދެމުން އަންނަ އަސްކަރީ އެހީތެރިކަން ހުއްޓާލުމަށް ގޮވާލައި، އެމެރިކާގެ ޤާނޫނު ހަދާ މަޖިލީހަށް ހުށަހަޅާފައިވާ އިސްލާހަށް ތާއީދު ކުރާ ޑިމޮކްރަޓިކް ޕާޓީގެ މެމްބަރުންގެ އަދަދު އިތުރުވާން ފަށައިފި އެވެ. 

އެމެރިކާގެ ހައުސް އޮފް ރެޕްރެޒެންޓެޓިވްސްގައި ހިމެނޭ ޕްރޮގްރެސިވް ޑިމޮކްރަޓުންގެ އިސް މެންބަރެއް ކަމަށްވާ ގްރެގް ކޭސާ ވަނީ، އިސްރާއީލުގެ އަސްކަރިއްޔާ އަށް ދިނުމަށް ހަމަޖެހިފައިވާ 3.3 ބިލިއަން ޑޮލަރުގެ އެހީ ހުއްޓުވުމަށް ހުށަހަޅާފައިވާ އިސްލާހަށް އޭނާ ތާއީދު ކުރައްވާނެކަން ރަސްމީކޮށް އިއުލާން ކުރައްވާފައި އެވެ.

މިކަމާ ގުޅޭ ގޮތުން އެކްސްގައި ކުރެއްވި ޕޯސްޓެއްގައި ކޭސާ ވިދާޅުވީ، ޣައްޒާގައި ގަތުލުއާންމު ހިންގުމަށާއި، ލުބުނާން އާއި އެ ނޫންވެސް ސަރަހައްދުތަކުގައި ކުށެއް ނެތް އާންމުން މެރުމަށް ބޭނުންކުރާ އެހީ ދިނުން ހުއްޓާލަން ޖެހޭ ވަގުތު ޖެހިއްޖެ ކަމަށެވެ. އަދި މި އެހީގެ ސަބަބުން އީރާން އާއެކު ކުރެވޭ ހަނގުރާމައެއްގެ ތެރެއަށް އެމެރިކާ ފުރޮޅިގެން ދިޔުމުގެ ބާރު ލިބޭ ކަމަށް ވެސް އޭނާ ފާހަގަ ކުރެއްވި އެވެ.

ކޭސާގެ އިތުރުން، އެމެރިކާގެ ގާނޫނު ހަދާ މަޖިލީހުގެ މެންބަރު ރޯ ކަންނާ ވެސް ވަނީ މި އިސްލާހަށް ތާއީދު ކުރައްވާނެ ކަމަށް ވިދާޅުވެފައި އެވެ. ކަންނާ އަކީ ދާދި ފަހުން އިސްރާއީލުން ހިފާފައިވާ ހުޅަނގު އައްސޭރި އަށް ކުރެއްވި ޒިޔާރަތެއްގައި، އިސްރާއީލުގެ ވަޒަންވެރިން އޭނާ ހިފަހައްޓައި ހުރަސްތަކެއް ކުރިމަތި ކުރުވި މެންބަރެވެ.

މި މައްސަލައިގައި ވާހަކަ ދައްކަވަމުން ކަންނާ ވިދާޅުވީ، ގަތުލުއާންމު ހިންގާ ގައުމަކަށް އެހީތެރިވުމަށް އޭނާގެ ވޯޓު ނުދެއްވާނެ ކަމަށެވެ. އަދި އެމެރިކާގެ ރައްޔިތުން ދައްކާ ޓެކްސް ފައިސާ ބޭނުން ކޮށްގެން، އޭނާ ފަދަ އެމެރިކާގެ ރައްޔިތުން ހިފަހައްޓައި އަނިޔާވެރިވާ ގައުމަކަށް އެހީ ދިނުމަށް ތާއީދު ނުކުރެއްވޭނެ ކަމަށް ވެސް ކަންނާ ވިދާޅުވި އެވެ.

އިސްރާއީލުން ޣައްޒާގައި ހިންގަމުންދާ އުދުވާންއާ ގުޅިގެން އެމެރިކާގެ ސަރުކާރުން އިސްރާއީލަށް ދޭ އަސްކަރީ އެހީތަކަށް އޮތް ފާޑު ކިޔުންތައް ވަނީ ވަރަށް ބޮޑަށް އިތުރުވެފައި އެވެ. ހާއްސަކޮށް ވެރިކަން ކުރާ ރިޕަބްލިކަން ޕާޓީގެ ތެރޭގައި މިކަމާ މެދު އޮތް ހިޔާލު ތަފާތުވުންތައް ދަނީ ދުވަހެއް ދުވަހަކަށް ބޮޑު ވަމުންނެވެ.