ގާނޫނުއަސާސީ ގެ ބޭނުން ނަހަމަގޮތުގައި ހިފައިގެން އެންމެ ގިނަ ސިޔާސީ މުވައްޒަފުން އައްޔަންކޮށްފައިވަނީ ރައީސުލްޖުމްހޫރިއްޔާ: ޝަމްހީދު

ގާނޫނުއަސާސީގެ 115 ވަނަ މާއްދާގެ ދަށުން ދައުލަތުގެ ބަޖެޓުން ބޮޑު ހޭދައެއް ހިނގާ ގޮތަށް އެންމެ ގިނަ ބޭކާރު ސިޔާސީ މުވައްޒަފުން އައްޔަންކޮށްފައިވަނީ ރައީސް ޑރ. މުހައްމަދު މުއިއްޒުގެ ސަރުކާރުން ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާ ތަމްސީލުކުރައްވާ މެންބަރު ޑރ. އަހްމަދު ޝަމްހީދު ވިދާޅުވެއްޖެ އެވެ.

އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން ޑރ. ޝަމްހީދު ވިދާޅުވީ، އިނގިރޭސިވިލާތް ފަދަ ތަރައްގީވެފައިވާ ބޮޑެތި ގައުމުތަކުގައި ސިޔާސީ ގޮތުން އައްޔަންކުރާ މުވައްޒަފުންގެ އަދަދު އުޅެނީ 20 އާއި 50 އާ ދެމެދުގައި ކަމަށެވެ. ނަމަވެސް، ރާއްޖެ ފަދަ ކުޑަ ގައުމެއްގައި މި އަދަދު 2،000 އަށްވުރެ މައްޗަށް އަރައިގެން ގޮސްފައިވާތީ އެކަމަށް ޝަމްހީދު ވަނީ ވަރަށް ބޮޑަށް ފާޑުވިދާޅުވެފަ އެވެ. ޝަމްހީދު ފާހަގަކުރެއްވި ގޮތުގައި، ރާއްޖޭގައި ރައީސް އައްޔަންކުރައްވާ މުވައްޒަފުންނަށް ދައުރެއްގެ ތެރޭގައި ހަގީގަތުގައި ހަރަދުކުރަންޖެހޭނީ 150 މިލިއަން ރުފިޔާ އެވެ. ނަމަވެސް، މިފަދަ ސިޔާސީ މުވައްޒަފުންނަށް ދައުރެއްގެ ތެރޭގައި ގާތްގަނޑަކަށް 3.3 ބިލިއަން ރުފިޔާ މިހާރު ހަރަދުވާ ކަމަށް އޭނާ ވިދާޅުވި އެވެ.

ޑރ. ޝަމްހީދު ވިދާޅުވީ ސިޔާސީ ވަޒީފާތައް އުފެއްދުމުގެ ނަމުގައި ސަރުކާރުތަކުން އުފައްދަނީ ކޮރަޕްޝަން ކަމަށައި، ގާނޫނުއަސާސީގެ 115 ވަނަ މާއްދާގައި ރައީސަށް ސީދާ ވަޒީފާތައް އުފެއްދޭނެ ކަމަށް ބަޔާންކޮށްފައިނުވާ ކަމަށެވެ. ރައްޔިތުންގެ ފައިސާ ސަލާމަތްކުރަން ބޭނުންވާ ކަމަށް ވެސް ޝަމްހީދު ވަނީ ވިދާޅުވެފަ އެވެ.

ސިޔާސީ ވަޒީފާތަކޭ ކިޔައިފަ މި އުފައްދަނީ ކޮރަޕްޝަން، ގާނޫނުއަސާސީގެ 115 ވަނަ މާއްދާއަކު ނެތް ރައީސުލްޖުމްހޫރިއްޔާއަށް ވަޒީފާތަކެއް އުފެއްދޭނެ ވާހަކައެއް، އައްޔަންކުރާ ވާހަކަ އިންނާނީ 115 ވަނަ މާއްދާގައި، އެހެންވީމާ މިއީ ކޮންމެ ބަޔަކު ކުރިޔަސް ގޯސް ވާނީ ގޯހަށް، ރައްޔިތުންގެ ފައިސާ ސަލާމަތްކުރަން އަޅުގަނޑުމެން ބޭނުންވޭ، މި 115 ވަނަ މާއްދާ ނަހަމަގޮތުގައި ބޭނުން ހިފައިގެން ރައީސުލްޖުމްހޫރިއްޔާ ކޮރަޕްޝަން ހިންގަވަނީ"

ޑރ. ޝަމްހީދު

ރައީސް އައްޔަންކުރައްވާ މުވައްޒަފުންނަށް ދައުރެއްގެ ތެރޭގައި ގާތްގަނޑަކަށް 3.3 ބިލިއަން ރުފިޔާ ހަރަދުވާކަން ފާހަގަކުރައްވަމުން ޝަމްހީދު ވިދާޅުވީ، ރައްޔިތުންގެ ފައިސާ ސަލާމަތްކުރުމަށް ދައްކަންޖެހޭނީ މިފަދަ ވާހަކަތައް ކަމަށެވެ.

ޝަމްހީދު އިތުރަށް ވިދާޅުވީ ސިޔާސީ މުވައްޒަފުންގެ ނަމުގައި ތިބޭ މުވައްޒަފުންނަކީ އެއްވެސް މަސައްކަތެއް ނުކޮށް ތިބޭ ބައެއް ކަމަށާއި އެ މީހުންނަށް ދައުލަތުން 100 މިލިއަނާއި 150 މިލިއަނާއި ދެމެދުގެ ހޭދަކުރާ ކަމަށެވެ. ޝަމްހީދު ވިދާޅުވީ ސިޔާސީ ޕާޓީ ހިންގުމަށާއި ޕާޓީގެ އެކްޓިވިސްޓުންނަށް ވަޒީފާ ދިނުމަށް 115 ވަނަ މާއްދާ ބޭނުން ނަހަމަގޮތުގައި ހިފާ ކަމަށާއި،  މި ސަރުކާރުގެ 5 އަހަރުގެ ތެރޭގައި އެފަދަ މުވައްޒަފުންނަށް 3.3 ބިލިއަނާއި 3.5 ބިލިއަން ރުފިޔާއާއި ދެމެދުގެ އަދަދެއް ހޭދަކުރާ ކަމަށެވެ.

ޑރ. ޝަމްހީދު މި މޭރުމުން ވިދާޅުވެފައިވާއިރު ފާހަގަކޮށްލަންޖެހޭ ކަމަކީ ދައުލަތުގެ ހަރަދުތައް ކުޑަކުރުމުގެ ނަމުގައި މި ސަރުކާރުން އަންނަނީ ސަރުކާރުގެ ކުންފުނިތައް (އެސްއޯއީ) ތަކުގައި މަސައްކަތްކުރާ އެންމެ އާދައިގެ މުވައްޒަފުން ވަޒީފާއިން ވަކިކުރަމުންނެވެ. ނަމަވެސް ސިޔާސީ އެކި މަގާމުތަކަށް އައްޔަންކުރާ މީހުންގެ އަދަދު ދުވަހަކަށްވުރެ ދުވަހެއް އިތުރުވަމުންދާއިރު، އެފަދަ މަގާމުތަުގައި ތިބި މުވައްޒަފުންގެ އަދަދު ވެސް 2،000 އަށްވުރެ މަތިވާނެ ކަމަށް ލަފާކުރެވެ އެވެ. ސަރުކާރުން މި އަދަދު ސިއްރުކުރަމުން އަންނާތީ ސީދާ އަދަދެއް ސާފެއް ނޫނެވެ. މި ސަރުކާރުގެ މިފަދަ ދޯހަޅި ސިޔާސަތުތަކުގެ ސަބަބުން ސަރުކާރާމެދު ރައްޔިތުން ކުރަމުން އަންނަ އިތުބާރު ވަނީ އިންތިހާއަށް ކުޑަވެފަ އެވެ.