ކުނި މެނޭޖް ކުރުމަށް ބޭނުންވާ ފެސިލިޓީތައް ގާއިމް ކުރުމަށް ބޭނުންވާ ފައިސާ ވެސް ސަރުކާރުގައި ނެތް: މައުރޫފް

ކުނި މެނޭޖް ކުރުމަށްޓަގައި ގާއިމް ކުރަން ޖެހޭ ފެސިލިޓީތަކާއި، އެ ނިޒާމުތައް ހިންގުމަށް ބޭނުންވާ ފައިސާ ވެސް މި ސަރުކާރުގައި ނެތް ކަން މިއަދު ވަރަށް ރަނގަޅަށް ހާމަވާ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ. 

އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ސަރުކާރުގެ ފަރާތުން، އުނގޫފާރު ދާއިރާގެ މެންބަރު އިބްރާހީމް ޝިފާޒް ހުށަހަޅުއްވާފައިވާ ކުނި މެނޭޖް ކުރުމުގެ ބިލުގެ ބަހުސް ވަނީ ކުރިއަށް ގެންގޮސްފަ އެވެ. އެ ބިލަށް ބަހުސް ކުރައްވަމުން މެންބަރު އެންމެ ބޮޑަށް ކަންބޮޑުވުން ފާޅުކުރައްވާފައި ވަނީ ކުނި މެނޭޖްކުރުމުގައި ރަށްރަށުގެ ކައުންސިލްތަކަށް ދަތިތަކާ ކުރިމަތިލާން ޖެހޭތީ އެކަމެވެ. 

މެންބަރު ވިދާޅުވީ މީހުން ދިރިއުޅޭ ރަށްރަށުގައި ކުނި މެނޭޖް ކުރުމުގައި މިހާރު ދިމާވާ އެންމެ  ބޮޑު އެއް ގޮންޖެހުމަކީ ކުނި މެނޭޖް ކުރުމަށްޓަކައި އިމާރާތް ހެދުމަށް ޚަރަދުތަކެއް ހިނގުން ކަމަށެވެ. އަދި އެތަން ހެދުމުން ކުނި މެނޭޖް ކޮށްގެން ރަށްރަށުގެ ކައުންސިލަށް ލިބޭ އާމްދަނީ އިން އެ ރަށްރަށުގައި އުފެދޭ ކުނި މެނޭޖް ނުކުރެވުން ކަމަށެވެ.

މައުރޫފް ވިދާޅުވީ މި އިސްލާހަކީ އެކަމަށް ހައްލެއް ހޯދުމަށްޓަކައި ކައިރި ރިސޯޓްތަކާ އަދި އިންޑަސްޓްރިއަލް ރަށްރަށުގެ ކުނި މެނޭޖް ކުރެވޭނެ ނިޒާމެއް ހަމަޖެއްސުމަށްޓަކައި ގާނޫނުން ފުރުސަތު ދޭން ގެނަސްފައިވާ އިސްލާހެއް ކަމަށެވެ. 

އަޅުގަނޑުގެ ނަޒަރުގައި އެކަން ކުރުމުގައި ކައުންސިލްތަކަށް ފަސޭހަ ވާނެ ގޮތަކަށް ކަންކަން އިންތިޒާމު ކުރުމަކީ މުހިއްމު ކަމެއް. ޚާއްސަކޮށް ކައުންސިލްތަކުން މިސާލަކަށް ބިމެއް ދޫކުރާއިރުގަ، މާލިއްޔަތު ގާނޫނުގައި ހުރި ދަތިތައް، ކައުންސިލްތަކަށް ފިލަން ޖެހޭ، ކުނި މެނޭޖްކުރުމަށްޓަކައި އެ ދޫކުރާ ބިން ނުވަތަ އެ އިމާރާތް ކުރުމުގައި އެންމެ ކައިރީގައި އޮންނަ ރިސޯޓަކާ ނުވަތަ ކައިރީގަ ހުރި ރިސޯޓްތަކާއެކީގައި ކްރޮސް ސަބްސިޑީގެ އުސޫލުން ވިޔަސް ނުވަތަ ސީއެސްއާރް އުސޫލުން ވިޔަސް އެކަން ފަސޭހަ އިން ކުރެވޭނެ އިންތިޒާމްތައް ހަމަޖައްސަން ޖެހޭ....... އެހެންވީމާ މި ގާނޫނަށް ގެނެވޭ އިސްލާހުތަކާ އެއްކޮށް ކައުންސިލްތަކަށް ފަސޭހަ އިން މިކަން ކުރެވޭނެ އިންތިޒާމު ހަމަޖެއްސުމަކީ މުހިއްމު ކަމެއް. އަޅުގަނޑުމެންނަށް އެބަ އެނގޭ، ސަރުކާރަށް މި އުޅެނީ ކުނި މެނޭޖް ކުރުމުގެ ފެސިލިޓީސްތައް ގާއިމް ކުރަން އުނދަގޫވެގެންކަން. އަދި އެއަށް ބޭނުންވާ ފައިސާ ނެތިގެން ކަން. 

ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު

ގާނޫނުގެ ދަށުން ހަދަން ޖެހޭ ގަވާއިދުތަކެއް ހުރިކަން ފާހަގަ ކުރައްވާ މެންބަރު ވިދާޅުވީ އެ އުސޫލުތަކުގެ ތެރޭގައި ރިސޯޓެއްގެ ކުނި، މީހުން ދިރިއުޅޭ ރަށަކަށް ގެންނަ ކަމަށް ވާނަމަ، އެ ކުނި އެ ރަށަކަށް ބާލައި، އެ ރަށަށް އަރުވައި ބާލައި ހެދުމުގައި، އާންމުން ދިރިއުޅޭ ތަންތަނާ ވަކިން، ނުވަތަ އާންމުންނަށް އުނދަގޫ ނުވާނެހެން އެ އިންތިޒާމު ލާޒިމް ކުރުމަކީ ކޮންމެހެން މުހިއްމު ކަމެއް ކަމަށެވެ. 

ބައެއް ރަށްރަށުގައި ކުނި ކޮށިތައް އިމާރާތް ކޮށްފައި ހުންނަނީ މީހުން ދިރިއުޅޭ ސަރަހައްދާ ދުރުގައި، ރަށުގެ ކޮންމެވެސް އެއް ކޮޅެއްގައި އިމާރާތް ކޮށްފައިވާ ތަންތަން ކަމަށާ އެދިމާލުން ޚާއްސަކޮށް ޖެޓީއެއް ހަދައިގެން ނޫނީ ކުނި ބާލައި އަރުވާ ހެދޭނެ އިންތިޒާމްތައް ހެދުމަށް ކުނި މެނޭޖް ކުރާ ތަންތަނުގައި ލާޒިމް ކުރުމަކީ މުހިއްމު ކަމެއް ކަމަށް ވެސް މައުރޫފް ވިދާޅުވި އެވެ. 

އޭގެ އިތުރުން ރިސޯޓްތަކުން ކުނި މެނޭޖް ކުރާކަމުގައި ވާނަމަ، ކައުންސިލަށް ބުރަ ނުވާނެ ގޮތަކަށް ރަށުގެ އެތެރޭގަ އުފެދޭ، އަދި ގޭބިސީތަކުގަ އުފެދޭ ކުނި ވެސް އުސޫލުތަކެއްގެ ތެރެއިން އެކަންކަން ހަމަޖެއްސުމަކީ މުހިއްމު ކަމެއް ކަމަށް މެންބަރު ވިދާޅުވި އެވެ.

ރާއްޖޭގައި މިހާރު އަހަރެއްގެ މައްޗަށް އުފެދޭ ކުނީގެ މިންވަރު ފަސް ލައްކަ ޓަނަށް ވުރެ އިތުރުވެފައިވާކަމަށާއި ކުނި މެނޭޖު ކުރަން ގިނަ ގޮންޖެހުންތަކެއް އެބަހުރި ކަމަށް އެންވަޔަރަންމަންޓް މިނިސްޓްރީ އިން ވެސް ވަނީ ބުނެފަ އެވެ.