އިމްރާންޚާން 33 މަސްދުވަހު އެކަހެރިކޮށް ޖަލު ބަންދުގައި ބަހައްޓާފައި ހުރުން އދ.ގެ ޓޯޗަރ އެކްސްޕާޓް ކުށްވެރިކޮށްފި
28 ޖުލައި 2026 | އަންގާރަ 09:49ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ޖަލުގައި ބަންދުކޮށްފައި ހުންނެވީ ބައިނަލްއަގުވާމީ އުސޫލުތަކާ ޚިލާފަށް، އިންސާނީ ކަރާމާތް ގެއްލޭ ފަދަ ލާއިންސާނީ ހާލަތެއްގައި ކަމަށް ބުނެ އދ. އިން ކަންބޮޑުވުން ފާޅުކޮށްފި. އެމަނިކުފާނަށް ސިއްހީ ފަރުވާ ނުލިބޭ ކަމުގެ ޝަކުވާތަކާއެކު، އިމްރާން މިނިވަންކުރުމަށް ގޮވާލައި މުޅި ގައުމުގައި ބޮޑު އިހުތިޖާޖެއް ބޭއްވުމަށް ޕީ.ޓީ.އައި އިން ދަނީ ތައްޔާރުވަމުން
ޕާކިސްތާނުގެ ކުރީގެ ބޮޑުވަޒީރު އިމްރާން ޚާން، ގުޖްރަންވާލާގައި ކުރިއަށްދިޔަ ސަރުކާރާ ދެކޮޅު މުޒާހަރާގެ ހިނގާލުމެއްގެ ތެރެއިން ވާހަކަފުޅު ދައްކަވަނީ. | ގެޓީ އިމޭޖަސް
ޕާކިސްތާނުގެ ކުރީގެ ބޮޑުވަޒީރު އިމްރާން ޚާން މިނިވަންކުރުމަށް ގޮވާލައި އެމަނިކުފާނުގެ ޕާޓީން މުޅި ގައުމުގައި ބޮޑު ހިނގާލުމެއް ބޭއްވުމަށް ތައްޔާރުވަމުންދަނިކޮށް، ޖަލުގައި ހުންނެވި އިމްރާން ޚާނާ މެދު އަމަލުކުރަމުންދާ އިންސާނިއްޔަތާ ޚިލާފު އަމަލުތައް ހުއްޓާލުމަށް އދ. ގެ ލާއިންސާނީ އަމަލުތަކާ ބެހޭ މާހިރަކު ޕާކިސްތާނަށް ގޮވާލައްވައިފި އެވެ.
އދ. އިން ލާއިންސާނީ އަމަލުތަކާ ބެހޭ ކަންކަމަށް ކަނޑައަޅާފައި ހުންނަވާ ޚާއްސަ ރެޕަޓުއާ އެލިސް ޖިލް އެޑްވާޑްސް ވިދާޅުވީ، ވޭތުވެދިޔަ 33 މަސްދުވަހު އިމްރާން ޚާން ބަންދުކޮށްފައި ހުންނެވީ 24 ގަޑިއިރު ސީސީޓީވީ ކެމެރާގެ މޮނިޓަރިންގެ ދަށުން، އެކަހެރިކޮށް ކަމަށެވެ.
ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ޖަލުގައި ހުންނަވާތާ ދެ އަހަރަށްވުރެ ގިނަ ދުވަސް ވެފައިވާއިރު، އެމަނިކުފާނާއި އެމަނިކުފާނުގެ ޕާކިސްތާން ތަހްރީކޭ އިންސާފް (ޕީ.ޓީ.އައި) ޕާޓީން ބުނަމުންދަނީ އެމަނިކުފާނުގެ މައްޗަށް އުފުލާފައިވާ ގިނަ ދައުވާތަކަކީ ސިޔާސީ މަގްސަދެއްގައި އުފުލާފައިވާ ދައުވާތަކެއް ކަމަށެވެ. 2022 ވަނަ އަހަރު ޕާލަމެންޓުގައި ނެގި އިތުބާރު ނެތްކަމުގެ ވޯޓަކުން މަގާމުން ދުރުކުރި ފަހުން، އިމްރާން ޚާންގެ މައްޗަށް ކޮރަޕްޝަނާއި، ދައުލަތުގެ ސިއްރުތައް ހާމަކުރުމާއި، ޓެރަރިޒަމާ ގުޅުންހުރި ކުށްތައް ހިމެނޭހެން އެތައް ދައުވާއެއް ވަނީ އުފުލާފަ އެވެ. ނަމަވެސް އެމަނިކުފާނު ގެންދަވަނީ މި ހުރިހާ ތުހުމަތުތަކަކަށް އިންކާރު ކުރައްވަމުންނެވެ.
އެކްސްގައި ކުރެއްވި ޕޯސްޓެއްގައި އެޑްވާޑްސް ވިދާޅުވީ، ކުރީގެ ބޮޑުވަޒީރު އިމްރާން ޚާން މިހާރު ބަންދުކޮށްފައި ހުރީ ކުޑަދޮރެއް ނެތް ކުޑަ ގޮޅިއެއްގައި، 24 ގަޑިއިރު ސީސީޓީވީ ކެމެރާގެ ބެލުމުގެ ދަށުން، ގާތްގަނޑަކަށް މުޅިން އެކަހެރިކޮށް ކަމަށެވެ.
އެކަމަނާ އިތުރަށް ވިދާޅުވީ، ގިނަ ފަހަރަށް ދެ ހަފުތާއަށްވުރެ ގިނަ ދުވަސް ވަންދެން މެދުނުކެނޑި، ކަސްރަތު ކުރުމުގެ ފުރުސަތެއް ނުވަތަ އިންސާނަކާ ބައްދަލުވެ ވާހަކަދެއްކުމުގެ ފުރުސަތެއް ނެތި އިމްރާން ޚާން ބަންދުކޮށްފައި ހުންނަ ކަމަށެވެ. މިއީ "މަންޑޭލާ ރޫލްސް" ނުވަތަ ގައިދީންނާ މެދު އަމަލުކުރަންޖެހޭ ބައިނަލްއަގުވާމީ އުސޫލުތަކާ ކަނޑައެޅިގެން ޚިލާފު ކަމެއް ކަމަށް ވިދާޅުވެ، ޖަލުގެ ހާލަތު އިސްލާހުކުރުމަށް އެކަމަނާ ވަނީ ޕާކިސްތާނަށް ގޮވާލައްވާފަ އެވެ. އެޑްވާޑްސްގެ ޕޯސްޓުގައި އިޝާރާތް ކުރައްވާފައިވަނީ ގައިދީންގެ އިންސާނީ ކަރާމާތާއި ހައްގުތައް ކަށަވަރުކުރުމަށް އދ. އިން އެކުލަވާލާފައިވާ "ޔުނައިޓެޑް ނޭޝަންސް ސްޓޭންޑަޑް މިނިމަމް ރޫލްސް ފޯ ދަ ޓްރީޓްމަންޓް އޮފް ޕްރިޒަނާސް" އަށެވެ.
މި އުސޫލުތަކުގައި ބަޔާންކޮށްފައިވާ ގޮތުން، ދުވާލަކު 22 ގަޑިއިރު ނުވަތަ އެއަށްވުރެ ގިނަ ވަގުތު އިންސާނަކާ ބައްދަލުނުވެ ބަންދުކޮށްފައި ބެހެއްޓުމަކީ އެކަހެރިކޮށް ބަންދުކުރުމެވެ. އަދި ވިދިވިދިގެން 15 ދުވަހަށްވުރެ ގިނަ ދުވަހު އެކަހެރިކޮށް ބަންދުކޮށްފައި ބެހެއްޓުމަކީ މަނާކަމެކެވެ. ސަބަބަކީ އެއީ އަނިޔާވެރި، ލާއިންސާނީ، ނުވަތަ އިންސާނީ ކަރާމާތް ގެއްލޭ ފަދަ އަމަލަކަށް ވެދާނެތީ އެވެ. ލިންކްޑްއިންގައި ކުރެއްވި ދިގު ޕޯސްޓެއްގައި އެޑްވާޑްސް އިތުރަށް ވިދާޅުވީ، އިމްރާން ޚާނަށް އެކަށީގެންވާ ސިއްހީ ފަރުވާ ނުލިބޭ ކަމުގެ ރިޕޯޓުތަކާ މެދު ކަންބޮޑުވާ ކަމަށެވެ. ޚާއްސަކޮށް 2013 ވަނަ އަހަރުގެ އެކްސިޑެންޓެއްގައި ލިބުނު ބުރަކަށީގެ އަނިޔާއާއި، 2022 ވަނަ އަހަރުގެ ނޮވެމްބަރު މަހު އަވަހާރަކޮށްލަން ދިން ހަމަލާގައި ލިބުނު އަނިޔާތަކަށް އެކަށީގެންވާ ފަރުވާ ނުލިބުމުގެ ސަބަބުން ސިއްހީ ހާލަތު އިތުރަށް ގޯސްވަމުންދާ ކަމަށް އެކަމަނާ ފާހަގަކުރެއްވި އެވެ.
އިނގިރޭސިވިލާތުގައި ހުންނަވާ އިމްރާން ޚާންގެ ބައިނަލްއަގުވާމީ މީޑިއާ އެޑްވައިޒަރު ސައްޔިދު ޒުލްފިކާރު ބުޚާރީ ވިދާޅުވީ، ވޭތުވެދިޔަ އަށް މަހަށްވުރެ ގިނަ ދުވަހު އިމްރާން ޚާން ހުންނެވީ އެއްވެސް މީހަކާ ބައްދަލުނުކުރެވޭ ގޮތަށް މުޅިން އެކަހެރިކޮށްފައި ކަމަށެވެ. އެޑްވާޑްސްގެ ޕޯސްޓަށް ރައްދު ދެއްވަމުން އޭނާ އެކްސްގައި ލިޔުއްވާފައިވަނީ، އިމްރާން ޚާނާއި އެމަނިކުފާނުގެ އަނބިކަނބަލުންނަށް ވެސް އިންސާފުވެރި ޝަރީއަތެއް ލިބުމާއި ގައިދީންގެ އަސާސީ ހައްގުތައް ލިބުމަކީ އަސާސީ ހައްގެއް ކަމަށެވެ. އަދި މިހާރުގެ ހާލަތަކީ ދެ ބޭފުޅުންނަށް ވެސް ނުހަނު ކަންބޮޑުވާންޖެހޭ ނުރައްކާތެރި ހާލަތެއް ކަމަށް އޭނާ ވިދާޅުވި އެވެ.
އިމްރާން ޚާންގެ ކޮއްކޯފުޅު އަލީމާ ޚާން މި ދުވަސްވަރު ގެންދަވަނީ ޕާކިސްތާނުގެ ޚައިބަރު ޕަޚްތޫންޚުވާ ޕްރޮވިންސްގެ އެކި ރަށްތަކަށް ދަތުރުކުރައްވައި، އޮގަސްޓް މަހުގެ 5 ވަނަ ދުވަހު އަދިއާލާ ޖަލާ ހަމައަށް ބޭއްވުމަށް ހަމަޖެހިފައިވާ ހިނގާލުމަށް ތާއީދު ހޯއްދަވަމުންނެވެ. އިމްރާން ޚާން ބަންދުކޮށްފައި ހުރީ އެ ޖަލުގައެވެ. މި ހިނގާލުން ބޭއްވުމަށް ނިންމާފައިވަނީ އެމަނިކުފާނު ޖަލަށްލީތާ ތިން އަހަރު ފުރުމާ ދިމާކޮށެވެ.
ޕާކިސްތާނުގެ ޕަންޖާބު ސަރުކާރުން ވަނީ ލާހޯރުގައި މި ހިނގާލުން ބޭއްވުމުގެ ހުއްދަ ނުދީފަ އެވެ. ނަމަވެސް ޕީ.ޓީ.އައި ޕާޓީގެ ލީޑަޝިޕުން ބުނީ، އޮގަސްޓް 5 ގައި ފަށާ މި އިހުތިޖާޖު ކުރިއަށް ގެންދިއުމުގެ ހުއްދައަށް ކޯޓުގައި އެދޭނެ ކަމަށާއި، އިމްރާން ޚާން މިނިވަންވަންދެން މި ހަރަކާތް ކުރިއަށްދާނެ ކަމަށެވެ. އެއްވުމެއްގައި ވާހަކަދައްކަވަމުން އަލީމާ ޚާން ވިދާޅުވީ، އިންސާފު ހޯދުމަށް އަންހެން ކޮއްކޮއިން މަގުމައްޗަށް ނުކުންނަން މަޖުބޫރުވުމުން ދޭހަވަނީ އަނިޔާވެރިން ހުރިހާ ރަތް ރޮނގަކުން ބޭރުވެފައިވާ ކަން ކަމަށެވެ.
ކުރިން ކްރިކެޓް ތަރިއެއްގެ ގޮތުގައި މަޝްހޫރުވި އިމްރާން ޚާންގެ ސިއްހީ ހާލަތާ މެދު އެމަނިކުފާނުގެ ޕާޓީއާއި އާއިލާއިން ތަކުރާރުކޮށް ކަންބޮޑުވުން ފާޅުކުރަމުންދެ އެވެ. އެގޮތުން އެމަނިކުފާނުގެ ލޮލުގެ ފެނުން ދަށްވަމުންދާ ކަމަށާއި، އެއް ލޮލުގެ ފެނުން ގާތްގަނޑަކަށް ގެއްލިފައިވާ ކަމަށާއި، އެކަށީގެންވާ ސިއްހީ ފަރުވާ ދިނުމަށް ސަރުކާރުން ދެކޮޅު ހަދަމުންދާ ކަމަށް އެ ފަރާތްތަކުން ބުނެ އެވެ. ނަމަވެސް ޕާކިސްތާނުގެ ކަމާބެހޭ ފަރާތްތަކުން ވަނީ އިމްރާން ޚާނާ މެދު ގޯސްކޮށް އަމަލުކުރަމުންދާ ކަމަށް ކުރާ ތުހުމަތުތައް ދޮގުކޮށްފަ އެވެ.
