ވަޒީފާގެ ފުރުސަތުތަކާއި ކިޔެވުމަށް އޮތް ހުރަސް: ނާލާފުށީ ރައްޔިތުންގެ އެންމެ ބޮޑު އާދޭހަކީ ކޯޒްވޭ

މ. ނާލާފުށީގެ ރައްޔިތުން ދަނީ ދިރިއުޅުމުގެ އެކި ދާއިރާތަކުން އިންތިހާ ދަތިތަކަކާއި ގޮންޖެހުންތަކަކާ ކުރިމަތިލަމުންނެވެ. އެގޮތުން، ރަށުގެ ސިއްހީ ނިޒާމު ބަލިކަށިވެ، ބޭސްފަރުވާ ކުރުމުގައި ބޮޑެތި ހުރަސްތަކެއް ވަނީ ކުރިމަތިވެފަ އެވެ.

ޝަކުވާތަކާއި، ރައްޔިތުންގެ ހާލަތު އެ ރަށުން ރާއްޖެޓީވީގެ "ހާލު ކިހިނެއް" ޕްރޮގްރާމްގައި ވާހަކަ ދެއްކި ކޮންމެ ރައްޔިތަކު ވަނީ ފާޅުކޮށްފަ އެވެ. އެގޮތުން ކޮންމެ ދުވަހަކު ކާންޖެހޭ ބަލިތަކަށް ބޭނުންވާ ގިނަ އަދަދެއްގެ ބޭސް ނުލިބުމާއި، ހަފުތާއަކު އެއްފަހަރު ޖަހަންޖެހޭ އިންޖެކްޝަން ފަރމަސީން ހުސްވެފައިވުމުގެ ސަބަބުން ބަލިމީހުންގެ ސިއްހީ ހާލަތު ވަނީ ނުރައްކަލަކަށް ހުށަހެޅިފަ އެވެ.

މީގެ އިތުރުން، ތަކެތީގެ އަގުބޮޑުވުމާއި ދިރިއުޅުމުގެ ޚަރަދުތައް އިންތިހާއަށް މައްޗަށް ދިއުމަކީ ރައްޔިތުންނަށް އުފުލަން ދަތިވެފައިވާ ބޮޑު ބުރައެކެވެ. ކާބޯތަކެތީގެ އަގު އުފުލިފައިވުމުން އާންމު ދިރިއުޅުމުގެ ކަންކަން ހަމަޖައްސަން ދަތިވެ، ލިބޭ މަދު އާމްދަނީން ދެކޮޅުޖެއްސުމަށް ވަނީ ދަތިވެފަ އެވެ. އާދައިގެ ކަޅުސައި ތައްޓަކާއި ހެދިކާއެއްގެ އަގު ވެސް 30 ރުފިޔާއާއި 40 ރުފިޔާއާ ދެމެދުގެ އަގަކަށް އަރައިގެން ގޮސްފައިވާއިރު، ވާނުވާ ނޭނގި ކަރަންޓު ބިލުތައް ބޮޑުވަމުންދާތީ ރައްޔިތުން ދަނީ ކަންބޮޑުވުން ފާޅުކުރަމުންނެވެ.

އަގެއް ހެވެއް ނޫން އެއްގޮތަކަށް ވެސް. ތެދަށް ބުނާނަމަ އަޅުގަނޑުމެން ކައިބޮއެގެން އުޅެން ވެސް ދަތި. އެހާ ބޮޑަށް ކާބޯތަކެތީގެ އަގު މަތިވެއްޖެ. ތެދުތެދަށް ބުނާނަމަ ހޮޓަލަކަށް ވަދެ ދުފާލަން ވިޔަސް 7 ރުފިޔާ 8 ރުފިޔާ އަށް ބިލެއް އަރި އެއްވެސް މި ލިބެނީ. ދުފާލައި އުޅެން ވެސް ދަތިވެއްޖެ. ކަޅުސައި ތައްޓަކައި، ހެދިކާޔަކާ ކާލައިފިއްޔައި، 30 ރުފިޔާ އާއި 40 ރުފިޔާ އާ ނާރާނެ ގޮތެއް އެއީ ނެތް ގޮތެއް

މ. ނާލާފުށިން ކަންބޮޑުވުން ފާޅު ކުރި ރައްޔިތެއް

މަސްވެރިކަމަށް ބަރޯސާވެފައިވާ އެ ރަށުގެ މަސްވެރިންނަށް ވެސް ވަނީ ބޮޑެތި ގޮންޖެހުންތަކާ ކުރިމަތިލާންޖެހިފަ އެވެ. ރަށުން އައިސް ލިބޭނެ އިންތިޒާމެއް ނެތުމުގެ ސަބަބުން، އައިސް ހޯދުމަށްޓަކައި އެހެން އަތޮޅުތަކަށް އެގޮތުން ދ.، ފ.، އަދި ވ. އަތޮޅަށް ދަތުރުކުރަންޖެހޭ އިރު ތެލުގެ އަގު ލީޓަރެއް 26 ރުފިޔާއަށް އުފުލިފައިވާ ކަމަށް އެ ރަށުން ވާހަކަ ދެއްކި މަސްވެރިއަކު ކިޔައިދިނެވެ. އެ ރަށުން ވާހަކަދެއްކި މަސްވެރިން ބުނީ އެ ސަރަހައްދުގައި ހުރި ބޮއިތައް ކެނޑި، ސަރުކާރުން އެކަމަށް އެކަށީގެންވާ ހައްލެއް ހޯދައިދީފައި ނުވާ އިރު، މަސްވެރިކަމުން ލިބޭ އާމްދަނީ އިން ދިރިއުޅުމުގެ ޚަރަދުތައް ދެކޮޅު ޖެއްސުމަށް ނުކުޅެދިފައިވާ ކަމަށެވެ. 

އިޖުތިމާއީ ގޮތުން ރަށަށް ދިމާވެފައިވާ އެންމެ ބޮޑު ގޮންޖެހުމަކީ ނާލާފުއްޓާއި މުއްޔާ ދެމެދު ކޯޒްވޭ އެއް ނެތުމެވެ. އާބާދީ ކުޑަވުމާއެކު ރަށުގައި ވަޒީފާގެ ފުރުސަތުތައް މަދުވެ، ޒުވާނުންނާއި ކިޔަވައިގެން އަންނަ ކުދިން އުޅެންޖެހެނީ މުލީގަ އެވެ. ނުވަތަ ވަޒީފާ އަދާކުރުމަށް ކޮންމެ ދުވަހަކު ދާން ޖެހެނީ މުއްޔަށެވެ. ސްކޫލު ކުދިންނާއި މުލީގައި މަސައްކަތްކުރާ ނަރުހުން ފަދަ ފަރާތްތަކުން ކޮންމެ ދުވަހަކު ޑިންގީގައާއި ފެރީގައި ނުރައްކާތެރި ކަނޑުދަތުރުތައް ކުރަންޖެހޭއިރު، މޫސުން ގޯސް ދުވަސްވަރު މިކަމުގެ ސަބަބުން ބޮޑެތި ނުރައްކާތަކާ ކުރިމަތިލާންޖެހެ އެވެ.

އަޅުގަނޑުމެން ބޭނުންވަނީ ނާލާފުއްޓާ، މުއްޔާ އެކު ގުޅާލަން. ކޯޒްވޭ. އަޅުގަނޑުމެންގެ މި އޮންނަނީ ކުޑަކުޑަ އާބާދީ އެއް. އަޅުގަނޑުމެންގެ ނޯވޭ މާގިނަ ވަޒީފާތަކެއް ވެސް. އެ ފުރުސަތުތައް ލިބެނީ މުލިން. ދަރިން ކިޔަވައިގެން އައިސް ވެސް އުޅެން ޖެހެނީ މުލީގައި. ސްކޫލަށް ދާ ކުދިން ވެސް ދަނީ މުއްޔަށް. ސްކޫލު ދުވަސްދުވަހު ދަރިވަރުން ދަނީ ފެރީގައި. އެކަމު އަޅުގަނޑުގެ ދަރިފުޅަކީ މުލީގައި މަސައްކަތް ކުރާ ނަރުހެއް، ކޮންމެ ފަހަރަކު ދާން ޖެހެނީ ޑިންގީގައި. މެންދަމު ވެސް ދާން ޖެހޭ ފަހަރު އާދޭ

މ. ނާލާފުށިން ކަންބޮޑުވުން ފާޅު ކުރި ރައްޔިތެއް

މީގެ ކުރިން ކުރިއަށްދިޔަ ތަރައްގީގެ މަޝްރޫއުތައް މި ސަރުކާރު އައުމާ އެކު ހުއްޓިފައިވާއިރު، ރައްޔިތުންގެ އެންމެ ބޮޑު އާދޭހަކީ ނާލާފުއްޓާއި މުލި ގުޅުވައިދޭ ކޯޒްވޭގެ މަޝްރޫއު އަވަހަށް ފަށައި ނިންމައިދިނުމެވެ.