މަސްވެރިކަމަށް މ. އަތޮޅުގައި ހަރުކުރި ހުރިހާ ބޮޔެއް ވެސް މިހާރު ހުރީ އެއްގަމުގެ އެކި ތަންތާ!
12 ޖުލައި 2026 | އާދީއްތަ 07:41މ. އަތޮޅުގައި މަސްވެރިންނަށް ޚާއްސަކޮށްފައިވާ ތިން ބޮއިވެސް ކަނޑައިގެން ގޮސްފައިވާއިރު، އެކަމުގެ ސަބަބުން މަސްވެރިކަމަށް ބޮޑެތި ގޮންޖެހުންތަކެއް ކުރިމަތިވެ ތެލަށް ކުރާ ހޭދަ ވަނީ އިތުރުވެފައި. މި މައްސަލަ ފިޝަރީޒް މިނިސްޓްރީގެ ސަމާލުކަމަށް ގެނައި ނަމަވެސް، އެދެވޭ ހައްލެއް ނުލިބޭތީ މަސްވެރިން ވަނީ ކަންބޮޑުވުން ފާޅުކޮށްފައި.
މ.އަތޮޅުގެ ބޮއި ކަނޑައިގެން ގޮސް އެއްގަމަށް އަރުވާފައި. | ރާއްޖެއެމްވީ
މ.އަތޮޅުގެ މަސްވެރިން މަސްވެރިކަން ކުރުމަށް ބޭނުންކުރާ ތިން ބޮއިވެސް ކަނޑައިގެންގޮސް، އެ އަތޮޅުގެ މަސްވެރިކަމަށް ބޮޑެތި ހުރަސްތަކެއް ކުރިމަތިވެފައިވާތީ މަސްވެރިން ކަންބޮޑުވުން ފާޅުކުރަން ފަށައިފި އެވެ.
މ.އަތޮޅުގައި މަސްވެރިންނަށް ޚާއްސަކޮށްގެން އަޅާފައިވާ ތިން ބޮއިވެސް މިވަގުތު އޮތީ ބޭނުންނުކުރެވޭ ހާލަތުގަ އެވެ.
މައުލޫމާތު ލިބިފައިވާ ގޮތުގައި، މ. އަތޮޅުގައި އޮންނަ ތިން ބޮއިގެ ތެރެއިން ވޭވަށާ ދިމާލު ބޭރުގައި އޮންނަ ޖިގިން ބޮއި ކަނޑައިގެން ގޮސް އޮޔާދަނިކޮށް، އެ އަތޮޅުގެ މަސްވެރިން ވަނީ އެ ބޮއި ހޯދައިގެން ކަންނެއްލި ދޯންޏެއްގައި މުލަކަށް ގެނެސްފަ އެވެ. މި ބޮއި މުލަކަށް ގެނެސްފައިވަނީ ޖޫން މަހުގެ ނުވަ ވަނަ ދުވަހު އެވެ. ނަމަވެސް، އެ ބޮއި އެ ރަށު އެއްގަމުގައި އޮންނަތާ މަހަކަށްވުރެ ގިނަ ދުވަސް ވެފައިވާއިރުވެސް، އެ އަލުން އެޅުމުގެ އެއްވެސް މަސައްކަތެއް ކަމާބެހޭ އިދާރާތަކުން ކުރަމުން ނުދާކަމަށް މަސްވެރިން ބުނެ އެވެ.
މީގެ އިތުރުން މުލަކުގެ 12 މޭލު ބޭރުން އޮންނަ ބޮއިވެސް ކަނޑައިގެން ދިއުމާ ގުޅިގެން، ބަޔަކު އެ ނަގައިގެން މިހާރު ވަނީ މާލެ ފޮނުވާފަ އެވެ. އަދި ކޮޅުފުށްޓާ ދިމާލުން އޮންނަ ތިންވަނަ ބޮއިވެސް ކަނޑައިގެން ގޮސްފައިވާއިރު، އެ ބޮއިވީ ތަނެއް މިހާތަނަށް އެނގިފައެއް ނުވެ އެވެ. މިއާއެކު މުޅި މ. އަތޮޅުގައި މަސްވެރިންނަށް މަސްވެރިކަން ކުރެވޭނެ އެއްވެސް ބޮޔެއް މިވަގުތު ނެތެވެ.
މި މައްސަލައާ ގުޅިގެން މުލަކާއި ނާލާފުށީގެ މަސްވެރިން ބުނަމުންދަނީ، އަތޮޅުގައި ބޮއެއް ނެތުމުގެ ސަބަބުން މަސްވެރިކަން ކުރުމަށް މިހާރު ދާންޖެހެނީ ތާ އަތޮޅާ ދިމާލަށް ކަމަށެވެ. މިކަމުގެ ސަބަބުން ދަތުރުތައް ދިގުވެ، ތެލަށް ކުރަންޖެހޭ ހޭދަ އިންތިހާއަށް ބޮޑުވެފައިވާ ކަމަށް މަސްވެރިން ފާހަގަކުރެ އެވެ. އަދި ދިގު ދަތުރުތައް ކުރަންޖެހުމުން އައިސް ހޯދުމަށާއި މަސް ތާޒާކަންމަތީ ބެހެއްޓުމަށްވެސް ބޮޑެތި ގޮންޖެހުންތަކެއް ކުރިމަތިވަމުންދާ ކަމަށް އެ ފަރާތްތަކުން ބުނެ އެވެ.
މ.އަތޮޅުގެ ތިން ބޮއި ކަނޑައިގެން މަސްވެރިކަމަށް ވަނީ ހުރަސްތައް ކުރިމަތިވެފައި.
މ.އަތޮޅުގެ ތިން ބޮއި ކަނޑައިގެން މަސްވެރިކަމަށް ވަނީ ހުރަސްތައް ކުރިމަތިވެފައި.
މަސްވެރިން ބުނާ ގޮތުގައި މި ބޮއިތައް ކަނޑައިގެން ދިޔަ މައްސަލަ ފިޝަރީޒް މިނިސްޓްރީގެ ސަމާލުކަމަށް ވަނީ އެކި ފަހަރުމަތިން ގެނެސްފަ އެވެ.
އެގޮތުން ފޯނުން ގުޅައިގެންނާއި، މެސެޖުގެ ޒަރީއާއިން އަދި ލިޔުމުންވެސް މިނިސްޓަރަށް މިކަން އަންގާފައިވާނެ ކަމަށް މަސްވެރިން ބުނެ އެވެ. ނަމަވެސް، އެއްގަމަށް ގެނެސްފައި އޮތް ބޮއި އަލުން އެޅުމަށް ނުވަތަ އަނެއް ދެ ބޮއިގެ މައްސަލައަށް މިހާތަނަށް އެދެވޭ ހައްލެއް ލިބިފައި ނުވާތީ މަސްވެރިން ތިބީ ވަރަށް ބޮޑު މާޔޫސްކަމެއްގެ ތެރޭގަ އެވެ.
މަސްވެރިކަމަކީ މ. އަތޮޅުގެ ގިނަ ރައްޔިތުންގެ އާމްދަނީއާ ގުޅިފައިވާ މައިގަނޑު މަސައްކަތަށް ވާއިރު، މިފަދަ އަސާސީ ވަސީލަތްތައް ގާއިމުވެފައި ނެތުމަކީ މަސްވެރި އާއިލާތަކަށް ލިބޭ ވަރަށް ބޮޑު ނިކަމެތިކަމެއްގެ ގޮތުގައި އެ އަތޮޅުގެ މަސްވެރިން ސިފަކުރެ އެވެ. މަސްވެރިން އެދެނީ ވީހާވެސް އަވަހަކަށް މި ބޮއިތައް މަރާމާތުކޮށް، އަލުން ކަނޑަށް އެޅުމުގެ އިންތިޒާމު ސަރުކާރުން ހަމަޖައްސައިދިނުމަށެވެ.
މީގެ އިތުރުން އެންމެފަހުން ބޭއްވި ނޫސްވެރިންގެ ބައްދަލުވުމުގައި ފިޝަރީޒް މިނިސްޓަރު އަހުމަދު ޝިޔާމް މަސްވެރިންނަށް އެއްވެސް ދައްޗެއް ކުރިމަތިނުވާނެ ކަމަށާއި، މައްސަލަތަކަށް އަވަހަށް ހައްލު ހޯދައިދޭ ކަމަށެވެ. އަދި މިސަރުކާރުގައި ހުރިހާ އަތޮޅަކުން އައިސް އަދި ތެޔޮ ލިބޭ ކަމަށް ވެސް މިނިސްޓަރު ޝިޔާމް ވިދާޅުވި އެވެ. ނަމަވެސް މ.އަތޮޅުން އައިސް އާއި ތެޔޮ ނުލިބޭތީ ވެސް މަސްވެރިން ވަނީ ކަންބޮޑުވުންފާޅު ކޮށްފަ އެވެ.
