ސްޕެނިޝް ލަލީގާގައި އަމިއްލަ ދަނޑުގައި ފުރަތަމަ ފަހަރަށް ރެއާލް މެޑްރިޑް މޮޅުވެއްޖެއެވެ.  

މި ސީޒަނުގެ ކުރީކޮޅު ދަށް ނަތީޖާތަކެއް ހޯދުމަށް ފަހު ރެއާލްއިން ވަނީ އަމިއްލަ ދަނޑުގައި ދެ ލަނޑު ސުން ލަނޑުން އެސްޕަންޔޯލް ބަލިކޮށް ތާވަލުގެ ކުރިޔަށް ޖެހިލާފައެވެ. އެގޮތުން މި މެޗުގެ ކުރިން ރެއާލްގެ އަމިއްލަ ދަނޑުގައި މިހާތަނަށް ކުޅުނު އެއްވެސް މެޗަކުން އެ ޓީމު މޮޅުވެފައެއް ނުވެއެވެ.

ރެއާލްގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި އެ ޓީމުގެ ފުރަތަމަ ލަނޑު މެޗުގެ 30 ވަނަ މިނިޓުގައި ކްރިސްޓިއާނޯ ރޮނާލްޑޯގެ އެހީތެރިކަމާ އެކު ކާމިޔާބުކޮށްދިނީ އިސްކޯއެވެ.

އެއް ލަނޑު ސުން ލަނޑުން ރެއާލް ކުރީގަ އޮވެގެން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް އެސްޕަންޔޯލްގެ ހާފުގައި ގިނަ ވަގުތު ބޯޅަ ގެންގުޅެ އެ ޓީމުގެ ގޯލާ އަމާޒުކޮށް ގިނަ ހަމަލާތަށް ފޮނުވާލާފައެވެ. ރެއާލްގެ ދެވަނަ ލަނޑު މެޗުގެ 71 ވަނަ މިނިޓުގައި އެ ޓީމަށް ޖަހައިދިނީ މެޗުގެ މޮޅު ކުޅުންތެރިޔަކަށް ހޮވުނު އިސްކޯއެވެ.

މި މެޗުން ހޯދި މޮޅާ އެކު ރެއާލްގެ ކޯޗު ޒައިނުއްދީން ޒިދާން ވަނީ އެ ޓީމާއެކު ލަލީގާގައި 50 މެޗު ކާމިޔާބު ކޮށްފައެވެ. އަދި މި މެޗުގައި އިސްކޯ ޖެހި ދެ ލަނޑާ އެކު އޭނާވަނީ މިއަހަރު ތެރޭ ލަލީގާގައި އެހެން އެއްވެސް މިޑްފީލްޑަރެއް ނުޖަހާ ވަރަށް ލަނޑު ޖަހާފައެވެ. މި  މެޗުގައި ކްރިސްޓިއާނޯ ރޮނާލްޑޯއަށް ލަނޑެއް ޖެހިފައެއް ނުވެއެވެ.

ރެއާލް ސޮސިއެޑާޑްއާ ރެއާލް ބެޓިސް ވާދަކުރި މެޗު 4-4 އަކުން އެއްވަރުވި އިރު ވެލެންސިއާ ވަނީ ތިން ލަނޑު ދެ ލަނޑުން އެތުލެޓިކް ބިލްބާއޯ ބަލިކޮށްފައެވެ. އަދި ވިލަރެއާލްއިން ވަނީ ތިން ލަނޑު ސުން ލަނޑުން އެއިބާ ބަލިކޮށްފައެވެ.

ސްޕެނިޝް ލަލީގާގެ އެއް ވަނައިގައި ކުޅުނު ހުރިހާ މެޗެއް ކާމިޔާބުކޮށް 21 ޕޮއިންޓާއެކު އޮތީ ބާސެލޯނާއެވެ. ސެވިއްޔާއަށް 16 ޕޮއިންޓާ އެކު ދެވަނަ ލިބޭއިރު 15 ޕޮއިންޓާއެކު ލަނޑުގެ ތަފާތުން ކުރި ހޯދައިގެން އޮތީ ވެލެންސިއާއެވެ.