ކުލަގަދަ ރަސްމިއްޔާތަކާއެކު 2026 ވަނަ އަހަރުގެ ކޮމަންވެލްތު ގޭމްސް ގްލާސްގޯގައި ފަށައިފި

2026 ވަނަ އަހަރުގެ ކޮމަންވެލްތު ގޭމްސް، ގްލާސްގޯގެ "ދަ ހައިޑްރޯ" އެރީނާގައި ބޭއްވި ކުލަގަދަ އަދި ފުރިހަމަ ހުޅުވުމުގެ ރަސްމިއްޔާތަކާއެކު ރަސްމީކޮށް ފަށައިފި އެވެ. ކްރިއޭޓިވް ލީޑް ލުއީސާ މޭހަންގެ އިރުޝާދުގެ ދަށުން ތައްޔާރުކުރި މި ރަސްމިއްޔާތުގައި، ކޮމަންވެލްތުގެ ރޫހާއި، ކުރު މުއްދަތެއްގެ ތެރޭގައި މި މުބާރާތް ބޭއްވުމާ ހަވާލުވި ގްލާސްގޯ ސިޓީގެ ކުޅަދާނަކަން ވަނީ ދައްކުވައިދީފަ އެވެ.

މުބާރާތުގައި ބައިވެރިވާ ގައުމުތަކުގެ އެތުލީޓުން އެރީނާއަށް ވަދެގެން އައި "ޕެރޭޑް އޮފް ނޭޝަންސް" ހިނގާލުމުގައި، 74 ގައުމަކާއި ސަރަހައްދަކުން އެތުލީޓުން ބައިވެރިވި އެވެ. އާންމުކޮށް އަމަލުކުރާ އުސޫލާ ހިލާފަށް، މިފަހަރުގެ މުބާރާތް ބާއްވާ ގައުމުގެ ހައިސިއްޔަތުން ސްކޮޓްލޭންޑް އެރީނާއަށް ވަނީ އެންމެ ފަހުންނެވެ. އެހެން ގައުމުތައް އެރީނާއަށް ވަދެފައިވަނީ އެ ގައުމުތައް ނިސްބަތްވާ ސަރަހައްދުތަކުގެ ތަރުތީބުން، އަކުރުގެ ތަރުތީބުންނެވެ.

އޭޝިއާ ސަރަހައްދުގެ ގައުމުތައް ހިންގާލުމުގައި ބައިވެރިވި ވަގުތު، ދިވެހިރާއްޖޭގެ ވަފުދު ވަނީ އެރީނާއަށް ހާޒިރުވެފަ އެވެ. އަށް މެންބަރުންގެ މައްޗަށް އެކުލެވޭ ރާއްޖޭގެ ވަފުދުގެ ދިދަ އުފުލާލަދިނީ ފެތުންތެރިޔާ މުހައްމަދު އާން ހުސައިން އެވެ. ޒުވާން ފެތުންތެރިޔާ ގައުމީ ދިދަ ހިފައިގެން ހިނގިއިރު، އޭނާއާއެކު "ކިންގްސް ބެޓަން" ހިފައިގެން ހުރީ ބެޓަން ބެއަރަރ މިރާލް އައިން ލަތީފެވެ. 2020 ވަނަ އަހަރު އަލުން ކޮމަންވެލްތާ ގުޅުނު ފަހުން، މިއީ ރާއްޖެއިން މި މުބާރާތުގައި ވިދިވިދިގެން ބައިވެރިވާ ދެވަނަ ފަހަރެވެ. ރާއްޖޭގެ ވަފުދުގައި ހިމެނެނީ ފެތުމާއި އެތުލެޓިކްސްގެ ކުޅިވަރުތަކުން ބައިވެރިވާ އެތުލީޓުންނެވެ. 

އެރީނާއަށް ވަތް އެހެން ގައުމުތަކުގެ ތެރެއިން ފާހަގަކޮށްލެވޭ ބައެއް ގައުމުތަކަށް ބަލާއިރު، މެލޭޝިއާގެ މަޝްހޫރު ބެޑްމިންޓަން ތަރިންނާ ނުލައި އެ ގައުމުން ބައިވެރިވިއިރު، ޕާކިސްތާނުގެ ވަފުދު އިސްވެ ނިކުތީ އޮލިމްޕިކްސްގެ ޖެވެލިން ތުރޯއިން ރަން މެޑަލް ހޯދި އަރުޝަދު ނަދީމާއެކުގައެވެ. ސްކޮޓްލޭންޑްގެ ރޮކް ބޭންޑް "ސިމްޕަލް މައިންޑްސް" އާއި އޮސްޓްރޭލިއާގެ ލަވަކިޔުންތެރިޔާ ޑެލްޓާ ގުޑްރެމްގެ ހުށަހެޅުންތަކުން ފެށުނު މި މުބާރާތުގައި، 10 ކުޅިވަރަކުން 11 ދުވަހުގެ މުއްދަތަށް ވާދަވެރި މުބާރާތްތައް ކުރިއަށްދާނެ އެވެ. ގްލާސްގޯ 2026 ގެ ސީއީއޯ ފިލް ބެޓީ ވިދާޅުވީ، މިއީ މުބާރާތުގެ ހަރަދުތައް ކުޑަކޮށް، ދެމެހެއްޓެނިވި ގޮތެއްގައި ކުރިއަށް އޮތް ތަނުގައިވެސް މުބާރާތް ބޭއްވޭނެ ނަމޫނާ މޮޑެލްއެއް ދައްކުވައިދޭނެ ފަހަރެއް ކަމަށެވެ.