2026 ވަނަ އަހަރުގެ ކޮމަންވެލްތު ގޭމްސްގައި ރާއްޖެއާއެކު 74 ގައުމަކުން ބައިވެރިވޭ

އިނގިރޭސިވިލާތުގެ ސްކޮޓްލޭންޑުގެ ގްލާސްގޯގައި 2026 ވަނަ އަހަރުގެ ކޮމަންވެލްތު ގޭމްސް ފެށިގެން ގޮސްފައިވާއިރު، ތަފާތު ސަގާފަތްތައް ރަމްޒުކޮށްދޭ ޖުމްލަ 74 ގައުމަކާއި ޓެރިޓަރީ އަކުން މި މުބާރާތުގައި ބައިވެރިވުމަށް ވަނީ ހަމަޖެހިފައި ކަމަށް މުބާރާތް އިންތިޒާމު ކުރާ ފަރާތުން ހާމަ ކޮށްފި އެވެ.

ސްކޮޓްލޭންޑްގެ ގްލާސްގޯގެ އޯވީއޯ ހައިޑްރޯގައި 2026 ޖުލައި މަހުގެ 23 ވީ ބުރާސްފަތި ދުވަހު ބޭއްވި، 2026 ވަނަ އަހަރުގެ ކޮމަންވެލްތު ގޭމްސް ހުޅުވުމުގެ ރަސްމިއްޔާތުގައި ކެލަމް ބީޓީ ހުށަހަޅައިދެނީ. | ގެޓީ އިމޭޖަސް

އާންމުކޮށް 'ފްރެންޑްލީ ގޭމްސް' ނުވަތަ އެކުވެރިކަމުގެ ކުޅިވަރުތަކުގެ ގޮތުގައި މަޝްހޫރުވެފައިވާ ކޮމަންވެލްތު ގޭމްސްއަކީ، މެމްބަރު ގައުމުތަކުގެ މެދުގައި އެއްބާރުލުމާއި ކުޅިވަރުގެ ރޫހުގައި ވާދަކުރުމަށް ދުނިޔޭގެ އެކި ކަންކޮޅުތަކުން އެތުލީޓުން އެއްތަންކޮށްދޭ މުބާރާތެކެވެ.

2026 ވަނަ އަހަރުގެ ޖުލައި މަހުގެ 23 ވަނަ ދުވަހު ސްކޮޓްލޭންޑްގެ ގްލާސްގޯގެ އޯވީއޯ ހައިޑްރޯގައި ބޭއްވި 2026 ވަނަ އަހަރުގެ ކޮމަންވެލްތު ގޭމްސް ހުޅުވުމުގެ ރަސްމިއްޔާތުގެ ތެރެއިން، އިނގިރޭސިވިލާތުގެ ރަސްގެފާނު ޗާލްސް ތިންވަނައާއި، ރާނީ ކެމިލާގެ އިތުރުން އިނގިރޭސިވިލާތުގެ ބޮޑުވަޒީރު އެންޑީ ބާންހަމް ފެނިގެންދަނީ. | ގެޓީ އިމޭޖަސް

މި މުބާރާތުގައި ބައިވެރިވާ ގައުމުތަކުގެ ތެރޭގައި ދިވެހިރާއްޖެ ހިމެނޭއިރު، ފާއިތުވި ދިހަވަރަކަށް އަހަރުގެ ތެރޭގައި ކޮމަންވެލްތުގެ މެންބަރުކަމުގައި ރާއްޖެއަށް ވަނީ ބޮޑެތި ބަދަލުތަކެއް އައިސްފަ އެވެ. ރާއްޖެއިން އެންމެ ފުރަތަމަ ކޮމަންވެލްތު ގޭމްސްގައި ވާދަކޮށްފައިވަނީ 1986 ވަނަ އަހަރު އެޑިންބަރާގައި ބޭއްވި މުބާރާތުގަ އެވެ. އޭގެ ފަހުން 2014 ވަނަ އަހަރާ ހަމައަށް ކޮންމެ މުބާރާތެއްގައިވެސް ރާއްޖެއިން ބައިވެރިވި ނަމަވެސް، އޭރު އުފެދުނު ސިޔާސީ ނުތަނަވަސްކަމާ ގުޅިގެން 2016 ވަނަ އަހަރު ރާއްޖެއިން ކޮމަންވެލްތުން ވަކިވި އެވެ. މީގެ ސަބަބުން 2018 ވަނަ އަހަރު ގޯލްޑް ކޯސްޓުގައި ބޭއްވި މުބާރާތުގައި ރާއްޖެއަށް ބައިވެރިއެއް ނުވެވުނެވެ.

ދިވެހިރާއްޖެ އަލުން ކޮމަންވެލްތާ ގުޅުނީ 2020 ވަނަ އަހަރުގަ އެވެ. އަދި އޭގެ ފަހުން 2022 ވަނަ އަހަރު ބާމިންހަމްގައި ބޭއްވި ގޭމްސްއާއެކު ރާއްޖެއިން އަލުން މި ކުޅިވަރު މައިދާނަށް ރުޖޫއަވި އެވެ.

2026 ވަނަ އަހަރު ގްލާސްގޯގައި ބާއްވާ މުބާރާތުގައިވެސް ރާއްޖޭގެ އެތުލީޓުން ބައިވެރިވެފައިވީ ނަމަވެސް ކޮމަންވެލްތު ގޭމްސްގައި ރާއްޖެއިން މިހާތަނަށް މެޑެއްޔެއް ހޯދާފައެއް ނުވެ އެވެ. މިފަހަރުގެ މުބާރާތުގައި ފެތުމާއި އެތުލެޓިކްސް ފަދަ ކުޅިވަރުތަކުން ދިވެހި އެތުލީޓުން ވަނީ ފާހަގަކޮށްލެވޭ ކުރިއެރުންތަކެއް ހޯދާފަ އެވެ. ގްލާސްގޯގައި ބޭއްވި މި ގޭމްސް ހުޅުވުމުގެ ރަސްމިއްޔާތުގައި ރާއްޖޭގެ ދިދަ އުފުލައިދިނީ މުހައްމަދު އާން ހުސައިން އެވެ. އޭނާއާއެކު ރާއްޖޭގެ އަށް އެތުލީޓުންގެ މައްޗަށް އެކުލެވޭ ޓީމަކުން މި މުބާރާތުގައި ރާއްޖެ ތަމްސީލުކުރެ އެވެ.

2026 ވަނަ އަހަރުގެ މި މުބާރާތް ކުރިއަށްދަނީ އެތުލެޓިކްސް، ފެތުން އަދި ޓްރެކް ސައިކްލިން ހިމެނޭހެން ޖުމްލަ 10 ކުޅިވަރަކަށް މަދުކޮށްލައިގެންނެވެ. މިގޮތަށް މުބާރާތުގެ ކުޅިވަރުތައް މަދުކުރަން ނިންމީ، މީގެ ކުރިން މި މުބާރާތް ބޭއްވުމަށް ހަމަޖެހިފައި އޮތް ވިކްޓޯރިއާއިން، ހަރަދު ބޮޑުވުމުގެ ސަބަބުން މުބާރާތް ބޭއްވުމަށް އުޒުރުވެރިވުމާ ގުޅިގެން، މުބާރާތް ކުރިއަށް ގެންދެވޭނެ އިންތިޒާމެއް ހަމަޖެއްސުމުގެ ގޮތުންނެވެ.