އިންޑިއާގައި ހަދަމުން ދިޔަ ޓަނަލެއް ގޮވައި މަދުވެގެން 12 މީހުން މަރުވެއްޖެ

އިންޑިއާގެ އުތުރުއިރުމަތީ ސިކިމް ސްޓޭޓްގައި ހަދަމުންދިޔަ ޓަނަލް ތެރޭގައި ގޭސް އެކްސްޕްލޯޝަނެއް ހިނގައި، އެތަނުން ބައެއް ވެއްޓި މަދުވެގެން 12 މަސައްކަތްތެރިން މަރުވެއްޖެ ކަމަށް އޮފިޝަލުން ވިދާޅުވެއްޖެ އެވެ.

މިދިޔަ ހޯމަ ދުވަހު ހިނގި މި ހާދިސާގައި ޓަނަލް ތެރޭގައި ތާށިވި ކަމަށް ރިޕޯޓްކޮށްފައިވާ އިތުރު 13 މީހަކު ހޯދުމުގެ މަސައްކަތް ރެސްކިއު ޓީމުތަކުން އަދިވެސް ދަނީ ކުރަމުންނެވެ.

އިންޑިއާގެ ނޭޝަނަލް ޑިޒާސްޓަރ ރެސްޕޮންސް ފޯސް (އެން.ޑީ.އާރް.އެފް) އިން ބުނި ގޮތުގައި، މި ހާދިސާ ހިނގާފައިވަނީ ޓަނަލްގެ އެތެރޭގެ ގާތްގަނޑަކަށް 1.5 ކިލޯމީޓަރު (0.9 މޭލު) ހިސާބުގަ އެވެ.

ހިމާލިޔާ ސަރަހައްދުގައި ހިމެނޭ ސިކިމްގައި، ސަރުކާރުގެ ކުންފުންޏެއް ކަމަށްވާ ނޭޝަނަލް ހައިޑްރޯއިލެކްޓްރިކް ޕަވަރ ކޯޕަރޭޝަން (އެން.އެޗް.ޕީ.ސީ) އިން ތަރައްޤީކުރާ މި ބޮޑު މަޝްރޫޢަކީ، ކައިރީގައި އޮންނަ ޓީސްޓާ ކޯރުން ހައިޑްރޯޕަވަރ ޕްލާންޓެއްގެ ޓާބައިންތަކަށް ފެން ގެންދިއުމަށްޓަކައި ހަދަމުންދާ ޓަނަލެކެވެ.

އެން.އެޗް.ޕީ.ސީ އިން ނެރުނު ބަޔާނެއްގައި ބުނެފައިވަނީ، މި ހާދިސާ ހިނގީ ހިލަތަކުގެ ތެރޭގައި ތާށިވެފައި ހުރި ކަމަށް ބެލެވޭ މީތޭން ގޭސްތަކެއް ކުއްލިއަކަށް ބޭރުވެ، ގޮވުމެއް ހިނގައި، އޭގެ ސަބަބުން ބޯ ދުމާއި ވިހަ ގޭސްތައް އުފެދުމާ ގުޅިގެން ކަމަށެވެ.

މި ހާދިސާއާ ގުޅިގެން ސިކިމް ސަރުކާރުން ވަކިން ނެރުނު ބަޔާނެއްގައި ބުނެފައިވަނީ، މި އެކްސިޑެންޓް ހިނގަން މެދުވެރިވީ "މީތޭން ގޭހުގައި ރޯވުމުގެ" ސަބަބުން ކަމަށެވެ.

މީތޭން އަކީ ގުދުރަތީ ގޮތުން ބިމުގެ އަޑީގައި އުފެދި، ބައެއް ފަހަރު ހިފެހެއްޓިފައި ހުންނަ ގޭހެކެވެ. ސަރުކާރުގެ އޮފިޝަލަކު ވިދާޅުވި ގޮތުގައި، ޓަނަލް ކޮނުމުގެ ތެރޭގައި މި ގޭސް ބޭރުވެ، ބަންދުވެފައިވާ ތަނެއްގެ ތެރޭގައި ކުޑަވެސް އަލިފާން ކަންޏެއް ފަދަ އެއްޗެއްގެ ސަބަބުން އަލިފާން ރޯވުން ނުވަތަ ގޮވުމެއް ހިނގުމަކީ އެކަށީގެންވާ ކަމެކެވެ.

މި ހާދިސާ ހިނގި ވަގުތު ޓަނަލްގެ އެކި ސަރަހައްދުތަކުގައި 27 މީހުން މަސައްކަތް ކުރަމުންދިޔައިރު، އޭގެ ތެރެއިން ދެ މީހަކު ވަނީ ގޮވުމަށްފަހު ސަލާމަތުން ބޭރަށް ނުކުމެފަ އެވެ. އަދި ބާކީ 25 މީހުން ތިބީ އެތެރޭގައި ތާށިވެފަ އެވެ.

ބުދަ ދުވަހުގެ ހެނދުނު ބީ.ބީ.ސީ އަށް މައުލޫމާތު ދެއްވަމުން ސުޕްރިންޓެންޑެންޓް އޮފް ޕޮލިސް ސޯނަމް ޑީ ބޫޓިއާ ވިދާޅުވީ، ތާށިވި 25 މީހުންގެ ތެރެއިން މިހާތަނަށް 12 މީހެއްގެ ހަށިގަނޑު ފެނިފައިވާ ކަމަށާއި، ބާކީ ތިބި 13 މީހުން ހޯދުމުގެ މަސައްކަތް ޓީމުތަކުން ކުރަމުންދާ ކަމަށެވެ.

ފުލުހުން ބުނާ ގޮތުގައި މަރުވި މީހުންގެ ތެރެއިން ހަތް މީހަކު މިހާރު ވަނީ ދެނެގަނެވިފައެވެ. 

އޮފިޝަލުން ވިދާޅުވި ގޮތުގައި، މި މީހުން މަރުވާން މެދުވެރިވި ސީދާ ސަބަބު ކަށަވަރުވާނީ ޕޯސްޓްމޯޓަމް ހެދުމަށްފަހުގަ އެވެ.

އެން.ޑީ.އާރް.އެފްގެ އޮފިޝަލް މުހްސިން ޝާހިދީ އޭ.އެން.އައި ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ، މިހާރު ކުރިއަށްދާ ސާޗް އެންޑް ރެސްކިއު އޮޕަރޭޝަން ބޮޑަށް އަމާޒުކޮށްފައިވަނީ، ބާކީ ތިބި މީހުން ތިބޭނެ ކަމަށް ލަފާކުރެވޭ 200 މީޓަރުގެ ވަކި ސަރަހައްދަކަށް ކަމަށެވެ.

މި ހާދިސާއާ ގުޅިގެން ސިކިމްގެ ޗީފް މިނިސްޓަރު ޕްރޭމް ސިންގް ތަމަންގް ވަނީ ހާއްސަ ތަހުގީގީ ޓީމެއް އެކުލަވާލައްވާފަ އެވެ.

ނޫސްވެރިންނާ ވާހަކަދައްކަވަމުން ތަމަންގް ވިދާޅުވީ، ހާދިސާ ހިނގަން މެދުވެރިވި ސީދާ ސަބަބާއި ކަން ހިނގާދިޔަ ގޮތް ހޯދުމަށް ފަންނީ މާހިރުންގެ ޓީމެއް ހަރަކާތްތެރިވަމުންދާ ކަމަށާއި، އެ ޓީމުގެ ހޯދުންތަކުގެ މައްޗަށް ބިނާކޮށް ފިޔަވަޅު އަޅުއްވާނެ ކަމަށެވެ.