ކުޅުދުއްފުށި ސްކޫލްތަކުގެ އެކްސްޓެންޝަން މަސައްކަތް: އެއްދުވަހު ގަލެއް ބަހައްޓައިފިއްޔާ އަނެއް 5 ދުވަހު މަސައްކަތެއް ނުކުރޭ!
ކުޅުދުއްފުށީގެ ތިން ސްކޫލެއްގައި ކުރިއަށްދާ އިމާރާތްކުރުމުގެ މަޝްރޫޢުތައް ލަސްވުމުގެ ސަބަބުން، 3،000 އެއްހާ ދަރިވަރުން ކިޔަވަމުންދާ އެ ސްކޫލްތަކަށް ޖާގައިގެ ދަތިކަން އިންތިހާއަށް ކުރިމަތިވެފައިވާ ކަމަށް އެ ސިޓީގެ ކައުންސިލުން ބުނެފި. އާބާދީ އިތުރުވަމުންދާ ނިސްބަތަށް ބަލާއިރު އައު ސްކޫލެއްގެ މުހިންމުކަން ބޮޑުވެފައިވާއިރު، މިހާރު ހުރި މަޝްރޫޢުތައް ހުއްޓިފައި އޮތުމުން އާންމުންގެ ކަންބޮޑުވުން ވަނީ އިތުރުވެފައި
އެއްދުވަހު ގަލެއް ބައިންދައިފިއްޔާ އަނެއް ދެ ދުވަސް ނުވަތަ ފަސް ދުވަސް މަސައްކަތެއް ނުކުރޭ : ކައުންސިލް | ރާއްޖެއެމްވީ
ކުޅުދުއްފުށި ސިޓީގެ ތިން ސްކޫލެއްގައި ކުރީގެ ސަރުކާރުން ފަށާފައިވާ ތަރައްޤީގެ ޕްރޮޖެކްޓްތަކުގެ މަސައްކަތް މި ސަރުކާރު އައިފަހުން ވަރަށް ބޮޑަށް މަޑުޖެހިފައިވާ ކަމަށާއި، އޭގެ ސަބަބުން ސްކޫލްތަކުގެ ޖާގައިގެ ދަތިކަން އިންތިހާއަށް ބޮޑުވެފައިވާ ކަމަށް އެ ސިޓީގެ ޑެޕިއުޓީ މޭޔަރު އަޙްމަދު ޢަބްދުﷲ ވިދާޅުވެއްޖެ އެވެ.
އަޙްމަދު ޢަބްދުﷲ ފާހަގަކުރެއްވި ގޮތުގައި، ކުރީގެ ސަރުކާރުން ވަނީ ޖަލާލުއްދީން ސްކޫލުގައި 8 ކްލާސްރޫމް އިމާރާތް ކުރުމުގެ މަސައްކަތާއި، އޭއީސީގައި އޮފީސް އިމާރާތުގެ މަސައްކަތުގެ އިތުރުން އަފީފުއްދީން ސްކޫލުގައި އިތުރު ކްލާސްރޫމްތައް ބިނާކުރުމުގެ މަޝްރޫއު ފަށާފަ އެވެ. ނަމަވެސް، މި ސަރުކާރު ވެރިކަމަށް އައި ހިސާބުން ފެށިގެން އެ މަޝްރޫޢުތަކުގެ މަސައްކަތުގެ ސްޕީޑް ވަރަށް ބޮޑުތަނުން ދަށަށް ގޮސްފައިވާ ކަމަށް އޭނާ ވިދާޅުވި އެވެ.
މި ސަރުކާރަށް ވީ ހިސާބުން ފެށިގެން މަސައްކަތުގެ ސްޕީޑް ހަމަ ވަރަށް ބޮޑުތަނުން ކުޑަވެއްޖެ. އެއްދުވަހު ގަލެއް ބައިންދައިފިއްޔާ އަނެއް ދެ ދުވަސް ނުވަތަ ފަސް ދުވަސް ހިނގައިދާނެ މަސައްކަތް ނުކޮށް. މިގޮތަށް މިކަހަލަ ސްޕީޑެއްގަ މަސައްކަތް ކުރެވެމުން މި ދަނީ. ސްކޫލުތަކުގައި ޖާގައިދެ ދަތިކަން އިންތިހާ އަށް އެބައޮތް. ކޮންމެ ސްކޫލެއްގައި ވެސް 1،000 އިން ޕޮޕިއުލޭޝަން ނައްޓާފަ އެއޮތީ. ޖުމްލަ ގާތްގަނޑަކަށް 3،000 ކުދިން ކިޔަވަމުން އެބަ ދޭ. މިއީ މިއަދުގެ ހާލަތަކީ އަދި މިހާރު ކުދިންގެ އާބާދީ އިތުރުވަމުންދާ ނިސްބަތުން އިތުރު ސްކޫލެއް ވެސް މުހިއްމުވާ ސިޓީ އެއް މި ސިޓީ އަކީ. އެހެން ނަމަވެސް ޕްރޮޖެކްޓްތަކުގެ މަސައްކަތް މިދަނީ މިކަހަލަ ގޮތަކަށްއަޙްމަދު ޢަބްދުﷲ
މި ސަރުކާރު ވެރިކަމަށް އައި ހިސާބުން ފެށިގެން އެ މަޝްރޫޢުތަކުގެ މަސައްކަތުގެ ސްޕީޑް ވަރަށް ބޮޑުތަނުން ދަށަށް ގޮސްފައިވާ ކަމަށް އެ ސިޓީ ކައުންސިލުން ބުނޭ
އެގޮތުން އެއްދުވަހު ގަލެއް ބައިންދައިފިއްޔާ އަނެއް ދެ ދުވަސް ނުވަތަ ފަސް ދުވަސް މަސައްކަތް ނުކޮށް ދާ ކަމަށް ވެސް އޭނާ ވިދާޅުވި އެވެ. ކުޅުދުއްފުށީގެ ކޮންމެ ސްކޫލެއްގައި 1,000 އަށްވުރެ ގިނަ ދަރިވަރުން ކިޔަވަމުންދާއިރު، ޖުމްލަ 3,000 އާ ގާތްކުރާ އަދަދަކަށް ކުދިން އެ ތިން ސްކޫލުގައި ކިޔަވަމުންދާތީ، ޖާގައިގެ ދަތިކަން ވަނީ އިންތިހާއަށް ބޮޑުވެފައި ކަމުގައި ވެސް އޭނާ ވިދާޅުވި އެވެ.
އާބާދީ އިތުރުވަމުންދާ ނިސްބަތަށް ބަލާއިރު ކުޅުދުއްފުއްޓަށް އިތުރު އައު ސްކޫލެއް ވެސް މިއަދު އިންތިހާއަށް މުހިންމު ކަމަށް ޑެޕިއުޓީ މޭޔަރު ފާހަގަކުރެއްވި އެވެ. ނަމަވެސް، މިހާރު ފަށާފައިވާ އިމާރާތްތަކުގެ މަސައްކަތް ވެސް ކުރިއަށް ނުގޮސް ދިގުލައިގެންދާއިރު، އައު ސްކޫލެއް އަޅަން އިންތިޒާރު ކުރަންޖެހޭނީ ކިހާ ހިސާބަކަށް ކަމާމެދު އާންމުންގެ މެދުގައި ބޮޑެތި ސުވާލުތަކެއް އުފެދިފައިވާ ކަމަށް ވެސް އަހްމަދު އަބްދުﷲ ވަނީ ވިދާޅުވެފަ އެވެ.
