އިރާޤުން ކުރުދީ ބޯޑަރުތައް ހިފައިފި

އިރާޤުގެ އުތުރުގައި މިނިވަންކަން އިޢުލާނުކޮށްފައިވާ ކުރުދިސްތާނާއި، ބައިނަލްއަޤުވާމީ ދުނިޔެ ގުޅޭ ބޯޑަރުތައް އިރާޤުގެ އަސްކަރިއްޔާގެ ބާރުގެ ދަށަށް ގެންގޮސްފިއެވެ.

މި އޮޕަރޭޝަނަކީ، ކުރުދީން ނެގި މިނިވަންކަމުގެ ވޯޓާއި ގުޅިގެން، އެފަރާތްތައް އެކަހެރި ކުރުމަށް އިރާޤުގެ މައި ސަރުކާރުން ފަށާފައިވާ މަސައްކަތުގެ ތެރެއިން ހިންގާ އޮޕަރޭޝަނެކެވެ.

މި އޮޕަރޭޝަން ހިންގާއިރު، ކުރުދީ ސަރަޙައްދުތަކަށް ބައިނަލްއަޤުވާމީ ވައިގެ ދަތުރުތައް ކުރުން އިރާޤު ސަރުކާރުން ވަނީ މަނާކޮށްފައެވެ.

ތުރުކީ އާއި އީރާނުގައި ތިބި އިރާޤުގެ ސިފައިން، ހޮނިހިރު ދުވަހުގެ ހެނދުނުން ފެށިގެން ކުރުދީ ސަރަޙައްދުގެ ބޯޑަރުތައް ކައިރީ ހަރަކާތްތެރިވާން ފަށާފައިވާއިރު، އިރާޤު ސަރުކާރުން ބުނެފައިވަނީ، ކުރުދީ ސަރަޙައްދުތަކަށް އަޅަމުންދާ ދަތިކުރުމުގެ ފިޔަވަޅުތަކަކީ އެ ސަރަޙައްދުގައި ދިރިއުޅޭ ރައްޔިތުންނާއި ދެކޮޅަށް އަޅާ ފިޔަވަޅުތަކެއް ނޫން ކަމަށާ، އެއީ އެ ރައްޔިތުންނަށް ރަނގަޅަކަށް އަޅާ ފިޔަވަޅުތަކެއް ކަމަށެވެ.

އިރާނާއި ތުރުކީގެ އެހީއާއިއެކު އިރާޤު ސިފައިން ބޯޑަރުތައް އެފަރާތްތަކުގެ ބާރުގެ ދަށަށް ގެންގޮސްފައި މިވަނީ، އެ ބޯޑަރުތައް އިރާޤު ސަރުކާރާއި ހަވާލުކުރުމަށް ކުރުދީ ލީޑަރުން ދެކޮޅުހަދަމުން ދަނިކޮށެވެ.

އިރާޤުން ވަކިވެ، ކުރުދިސްތާނުގެ ނަމުގައި ވަކި މިނިވަން ދައުލަތެއް އުފެއްދުމަށް ކުރުދީން ނެގި ވޯޓުގައި ކުރުދީންގެ ގިނަ ބަޔަކު ވަނީ އެކަމަށް ތާޢީދުކޮށްފައެވެ.