އިރާގުން ކުރުދީންގެ ސަރަހައްދުތަކަށް ބައިނަލްއަގްވާމީ ފްލައިޓްތައް ހުއްޓާލައިފި
އިރާގުގެ 37 މިލިއަނެއްހާ މީހުންގެ އާބާދީގެ 15-20 ޕަސެންޓާ ދެމެދުގެ އަދަދަކީ ކުރުދީން
ކުރުދިސްތާން ސަރުކާރުން ވަނީ ބަޣްދާދުން އަންގާ އެންގުންތަކަކީ ޣައިރުގާނޫނީ އެންގުންތަކެއް ކަމަށް ބުނެފައި
ހޯމަ ދުވަހު ކުރުދީން ނެގި ފެންނަ ނުފެންނަ ވޯޓަށް ފަހު އިރާގުގެ މައިސަރުކާރުން އެ ސަރަހައްދަށް ބައިނަލްއަގްވާމީ ދަތުރުތައް ހުއްޓާލައިފިއެވެ.
ބަޣްދާދުން ބުނީ އިބްރިލް އާއި ސުލައިމާނިޔާ އެއަރޕޯޓް ހަވާލު ނުކުރާހާ ހިނދަކު ހަމައެކަނި ބޭއްވޭނީ ޑޮމެސްޓިކް ދަތުރުތައް ކަމަށެވެ.
އިންސާނީ އެހީ އާއި އަސްކަރީ އަދި ޑިޕްލޮމެޓިކް ފަރާތްތައް ދަތުރުކުރާ ފްލައިޓްތައް ވެސް މަނާ ކުރެވިފައިވާ ކަމަށް ރިޕޯޓްތައް ބުނެއެވެ.
ކުރުދިސްތާން ސަރުކާރުން ވަނީ ބަޣްދާދުން އަންގާ އެންގުންތަކަކީ ޣައިރު ގާނޫނީ އެންގުންތަކެއް ކަމަށް ބުނެ އެކަން ކަމަށް ތަބާވުމަށް އިންކާރުކޮށްފައެވެ.
ކުރުދީން ވަކިވުމަށް ނެގި ފެންނަ ނުފެންނަ ވޯޓްގައި ވަކިވުމަށް ތާއީދުކޮށް 92 ޕަސެންޓް މީހުން ވޯޓް ދީފައިވާއިރު އިރާގުގެ ބޮޑުވަޒީރު ހައިދަރު އަލް އަބާދީ ގެންދަވަނީ އެ ވޯޓް ބާތިލް ކުރެއްވުމަށް މަސައްކަތްކުރައް ވަމުންނެެވެ.
ކުރުދީ ލީޑަރުން ގެންދަވަނީ ފެންނަ ނުފެންނަ ވޯޓް ސައްހަ ކަމަށް ބުނަމުންނެވެ. އަދި ބަޣްދާދާއި އަވަށްޓެރި އެހެނިހެން ގައުމުތަކާ އެކު ކުރުދީންނަށް މަޝްވަރާކުރުމުގެ ފުރުސަތު އޮންނާނެ ކަމަށް ކުރުދީ ލީޑަރުން ބުނެއެވެ.
ކުރުދީންނަކީ މެދުއިރުމަތީގައި އުފެދިފައިވާ ދީނީ ވަކިވަކި ފިކުރުތަކުގެ ގްރޫޕްތަކުގެ ތެރެއިން ހަތަރުވަނައަށް އެންމެ ބޮޑު ގްރޫޕް ނަމަވެސް އެމީހުންނަށް އަދި ދާއިމީ ވަކި ގައުމެއް ލިބިފައެއް ނުވެއެވެ.
އިރާގުގެ 37 މިލިއަނެއްހާ މީހުންގެ އާބާދީގެ 15-20 ޕަސެންޓާ ދެމެދުގެ އަދަދަކީ ކުރުދީން ކަމަށްވާއިރު 1991 ގައި އެމީހުންގެ ވަކި ސަރުކާރެއް އެކުލަަވާލެވުމުގެ ކުރިން އެތައް އަހަރެއް ވަންދެން އެމީހުންނަށް ދިޔައީ އެތައް ތުރާތަކެއް ކުރިމަތިކުރަމުންނެވެ.
