އެމެރިކާ އިން ހޯމަ ދުވަހު ހަމަލާ ދިނީ ފެންފޯރުކޮށްދޭ ސްޓޭޝަނަކަށް: އީރާން

އީރާނުގެ ހުޅަނގު ދެކުނުގައި އޮންނަ ހޫޒިސްތާން ޕްރޮވިންސާއި ދެކުނުގެ ބޫޝެހްރު ޕްރޮވިންސްގައި ހުރި ފެން ފޮނުވައިދޭ ދެ ސްޓޭޝަނަކަށް އެމެރިކާއިން ހަމަލާދީފައިވާ ކަމަށާއި، މީގެ ސަބަބުން ޚާރްޖް އައިލެންޑަށް ފެން ފޯރުކޮށްދިނުމަށް ވަގުތީ ގޮތުން ބުރޫއަރާފައިވާ ކަމަށް އީރާނުގެ އޮފިޝަލުން ވިދާޅުވެއްޖެ އެވެ.

ހޫޒިސްތާން ޕްރޮވިންސްގެ މަހްޝަހްރުގައި ހުންނަ ދަނޑުވެރިކަމަށް ބޭނުންކުރާ ފެން ފޮނުވައިދޭ ސްޓޭޝަނަކަށް އެމެރިކާއިން ދިން މި ހަމަލާގައި އެކަކު މަރުވެ، ހަތަރު މީހަކު ޒަޚަމްވެފައިވާ ކަމަށް އެ ޕްރޮވިންސްގެ އޮފިޝަލަކު ހޯމަ ދުވަހު ވަނީ ވިދާޅުވެފަ އެވެ.

ހޫޒިސްތާން ވޯޓާ އެންޑް އިލެކްޓްރިސިޓީ އޯގަނައިޒޭޝަންގެ މެނޭޖިންގ ޑިރެކްޓަރު އައްބާސް ސަދްރިއަންފަރު ވިދާޅުވީ، މަހްޝަހްރާއި ހެންދިޖާން ސިޓީއާ ދެމެދު އޮންނަ ހެންދިޖާންގެ އާރް.އެމް.ޑީ ޑްރެއިނޭޖް ޕަމްޕިންގ ސްޓޭޝަނަށް "އެމެރިކާ-ޒަޔަނިސްޓް ދުޝްމަނުން" ހަމަލާދީފައިވަނީ ހޯމަ ދުވަހުގެ ފަތިހުގެ ވަގުތެއްގައި ކަމަށެވެ.

މި ހަމަލާގައި މަރުވެފައިވަނީ އިރިގޭޝަން ނެޓްވޯކް އޮޕަރޭޝަން ކުންފުނީގެ މުވައްޒަފެއް ކަމަށްވާ ޝާކިރު މުހްސިނީ ކަމަށް ސަދްރިއަންފަރު ވިދާޅުވި އެވެ. އަދި މި ހަމަލާގައި އިތުރު މުވައްޒަފަކު ޒަޚަމްވެގެން ފަރުވާދެމުންދާ ކަމަށްވެސް އޭނާ ވިދާޅުވި އެވެ.

އޮފިޝަލް ވިދާޅުވި ގޮތުގައި، މި މަރުކަޒަކީ އެ ސަރަހައްދުގެ ދަނޑުވެރިކަމުގެ ވޭސްޓްވޯޓަރ ބޭރުކުރުމުގައި މުހިންމު ދައުރެއް އަދާކުރާ ތަނެކެވެ. އަދި ދަނޑުވެރިކަމަށް ބޭނުންކުރާ ފެނުގެ ނިޒާމުތައް ހަރުދަނާކޮށް ހިންގުމަށްޓަކައި މި ސްޓޭޝަން މެދުނުކެނޑި ހިންގުމަކީ ކޮންމެހެން ބޭނުންތެރި ކަމެއް ކަމަށް އޭނާ ފާހަގަކުރެއްވި އެވެ.

އީރާނުގެ ފެނުގެ ސިނާއަތުގެ އިސް އޮފިޝަލަކު ވަނީ އެމެރިކާއިން ފެން ޕަމްޕުކުރާ ސްޓޭޝަނަށް ދިން ހަމަލާ ކުށްވެރިކުރައްވައި، އެއީ "ހަނގުރާމައިގެ ކުށެއްގެ ސާފު މިސާލެއް" ކަމަށް ސިފަކުރައްވާފަ އެވެ.

އީރާނުގެ ފެނުގެ ސިނާއަތުގެ ތަރުޖަމާނު އީސާ ބޮޒޯގްޒާދޭ ވިދާޅުވީ، ހެންދިޖާންގެ އާރް.އެމް.ޑީ ޑްރެއިނޭޖް ޕަމްޕިންގ ސްޓޭޝަނަށް ފަތިހު ދިން ހަމަލާއަކީ އިންސާނުންގެ "ދިރިއުޅުމާއި، ސިއްހަތާއި، އަދި އާމްދަނީ ހޯދުމަށް ކުރާ މަސައްކަތަށް" ދިން ހަމަލާއެއް ކަމަށެވެ.

ބޮޒޯގްޒާދޭ ނެރުއްވި ބަޔާނެއްގައި ވިދާޅުވީ، ބައިނަލްއަގުވާމީ ހުރިހާ ގަވާއިދުތަކުގެ އިތުރުން، އިރުމަތީގެ އަދި އީރާނުގެ ސަގާފަތާއި ތަމައްދުނުގައިވެސް ފެނަކީ މުގައްދަސް އެއްޗެއް ކަމަށެވެ. އަދި ފެނުގެ ވަސީލަތްތަކަށް އަރައިގަތުމަކީ އިންސާނުންގެ އަސާސީ ހައްގުތަކަށް އަރައިގަތުން ކަމަށް އޭނާ ވިދާޅުވި އެވެ.

މި ހަމަލާއަކީ "ވިސްނުމާއި އަމަލުން ނިކަމެތިވެ، ގޮތް ހުސްވެފައިވާކަމުގެ" ނިޝާނެއްގެ ގޮތުގައި ބޮޒޯގްޒާދޭ ސިފަކުރެއްވި އެވެ. އޭނާ އިތުރަށް ވިދާޅުވީ، ދުޝްމަނުން ފެނުގެ ވަސީލަތްތަކަށް އަމާޒުކުރުމުން ހާމަވަނީ އެމީހުންގެ ނުކުޅެދުންތެރިކަން ކަމަށާއި، މިއީ އަސްކަރީ ކާމިޔާބީއެއް ނޫން ކަމަށާއި، މިއީ ނުބައި ވިސްނުމާއި އަމަލުގެ ހެއްކެއް ކަމަށެވެ.

އޭނާ ވިދާޅުވި ގޮތުގައި މި ހަމަލާގެ މަގްސަދަކީ އެ މަރުކަޒުގެ މަސައްކަތްތައް ހުއްޓުވާލުމެވެ. ނަމަވެސް ފަތިހުން ފެށިގެން ފެނުގެ ސިނާއަތުގެ މުވައްޒަފުން ދަނީ ހާލަތު ކޮންޓްރޯލްކޮށް، ލިބުނު ގެއްލުންތައް ކުޑަކުރުމަށް މަސައްކަތް ކުރަމުންނެވެ.

ހޫޒިސްތާން ޕްރޮވިންސްގެ އެކި ސަރަހައްދުތަކަށް، ހޯމަ ދުވަހުގެ ފަތިހު އެމެރިކާއިން ހަމަލާދީފައިވާ ކަމަށް ކަމާބެހޭ ފަރާތްތަކުން ބުނެ އެވެ. އަދި ލިބުނު ގެއްލުންތައް ބެލުމުގެ މަސައްކަތް މިހާރު ދަނީ ކުރަމުންނެވެ.

އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި އަހްވާޒްގެ ބޭރުގައި އޮންނަ ދެ ސަރަހައްދަކަށް ހަމަލާ އަމާޒުވެފައިވީ ނަމަވެސް، އަހްވާޒް އިންޓަނޭޝަނަލް އެއާޕޯޓަށް ހަމަލާދީފައިވާ ކަމަށް ދެކެވޭ ވާހަކަތައް ވަނީ ދޮގުކޮށްފަ އެވެ.

އިސްލާމިކް ރިވޮލިއުޝަން ގާޑް ކޯޕްސް (އައިއާރްޖީސީ) އިން ނެރުނު ބަޔާނެއްގައި، ފެން ޕަމްޕަށް ދިން ހަމަލާއާ ގުޅިގެން ބަދަލުހިފުމުގެ ގޮތުން ބަހްރައިންގައި ހުރި އެމެރިކާ ސިފައިންގެ އަސްކަރީ އިންފްރާސްޓްރަކްޗަރާއި، އޮމާންގައި ހުރި އެފްޕީއެސް ލޯންގް ރޭންޖް އެއާ ސަވައިލަންސް ރޭޑާ އަދި މެރިޓައިމް ސަވައިލަންސް ރޭޑާއެއް ހަލާކުކޮށްލާފައިވާ ކަމަށް ބުނެފައިވެ އެވެ.

އެ ބަޔާނުގައި އިތުރަށް ބުނެފައިވަނީ، ބަދަލުހިފުމުގެ އޮޕަރޭޝަންގެ ފަސްވަނަ މަރުހަލާގައި، ބަހްރައިންގެ ޖުފައިރުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީ ބޮޑެތި ގެއްލުންތަކެއް ދިނުމުގެ އިތުރުން، އޮމާންގައި ހުރި އެމެރިކާގެ ރާޑަރު ސިސްޓަމްތަކަށް މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދީ ހަލާކުކޮށްލާފައިވާ ކަމަށެވެ.

ފެނުގެ އިންފްރާސްޓްރަކްޗަރަށް ދިން މި ހަމަލާތައް އައިސްފައިވަނީ، މިދިޔަ މަހު ހުރްމުޒްގާން ޕްރޮވިންސްގެ ސިރިކް ކައުންޓީގައި ހުރި ފެން ފޯރުކޮށްދޭ ވަސީލަތްތަކަށް އެމެރިކާއިން ދިން ހަމަލާތަކަށް ފަހުގަ އެވެ. އެ ހަމަލާތަކުގެ ސަބަބުން ހޫނު މޫސުމުގެ ގަދަ ހޫނުގައި 20،000 އަށްވުރެ ގިނަ ރައްޔިތުން ބޯފެނުން މަހްރޫމްވި ކަމަށް އީރާނުގެ ދައުލަތުގެ މީޑިއާ އިން ބުނެފައިވެ އެވެ.

މި މަސްރަހު އިތުރަށް ގޯސްވެފައިވަނީ، ތެހެރާނާއި ވޮޝިންގޓަނާ ދެމެދު ކުރިން ސޮއިކޮށްފައިވާ އެއްބަސްވުމާ ޚިލާފަށް، ހުރްމުޒް ކަނޑުއޮޅީގައި އުޅަނދުފަހަރު ގަވާއިދާ ޚިލާފަށް ހަރަކާތްތެރިވާން އުޅުމުން އީރާނުގެ ކަނޑުގެ ސިފައިން އެކަން ހުއްޓުވުމާ ގުޅިގެންނެވެ. މީގެ އިތުރުން، އެ ސަރަހައްދުގައި އެމެރިކާގެ އަސްކަރީ ހަރަކާތްތައް އިތުރުވުމާ ގުޅިގެން، ހޯރްމުޒް ކަނޑުއޮޅި ހުރިހާ ދަތުރުފަތުރަކަށް ބަންދުކުރިކަން އީރާނުގެ ކަމާބެހޭ ފަރާތްތަކުން ވަނީ އިއުލާންކޮށްފަ އެވެ.