އީރާނުން ކުވޭތަށް ދިން ހަމަލާގައި އެމެރިކާގެ އެތައް މިލިއަން ޑޮލަރުގެ މިސައިލު ލޯންޗަރުތައް ނައްތާލައިފި

ކުވޭތަށް އަމާޒުކޮށް އާދިއްތަ ދުވަހު ުއީރާނުން ދިން ހަމަލާތަކުގައި އެމެރިކާގެ "ހައިމާސް" (HIMARS) މިސައިލް ލޯންޗަރުތައް ނައްތާލައިފި ކަމަށް ރިޕޯޓުތައް ބުނެފި އެވެ.

އީރާނުގެ ފާރްސް ނިއުސް އެޖެންސީން ރިޕޯޓްކޮށްފައިވާ ގޮތުގައި، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ޑްރޯން ބޭނުންކޮށްގެން ކުވޭތަށް ދިން މި ހަމަލާތަކުގެ މައިގަނޑު އަމާޒަކީ އެ ގައުމުގައި ހުރި އެމެރިކާގެ "ހައި މޮބިލިޓީ އާޓިލަރީ ރޮކެޓް ސިސްޓަމް" (HIMARS) މިސައިލް ލޯންޗަރުތަކާއި، އެ ތަކެތީގެ ގޮވާއެއްޗެހި ރައްކާކޮށްފައި ހުރި ގުދަންތަކެވެ.

ހަމަލާތަކާ ގުޅިގެން ކުވޭތުގެ ޑިފެންސް ސްޕޯކްސްޕާސަން ވިދާޅުވި ގޮތުގައި، ދެވުނު މި "ޖިނާއީ ހަމަލާ" ގައި ބޯޑަރު ސަރަހައްދުގައި ހުރި ތިން މަރުކަޒަކަށާއި، ކަނޑުގެ ސަރަހައްދުގައި ތެޔޮ ނެގުމަށް ބޭނުންކުރާ ޕްލެޓްފޯމަކަށް ވަނީ ބޮޑެތި ގެއްލުންތަކެއް ލިބިފަ އެވެ. އަދި މި ހާދިސާގައި އެތަނުގައި މަސައްކަތް ކުރަމުންދިޔަ މީހަކަށް އަނިޔާވެފައިވާ ކަމަށްވެސް އޭނާ ވިދާޅުވި އެވެ.

ރަޝިޔާ ޓީވީން ރިޕޯޓުކޮށްފައިވާ ގޮތުގައި އީރާނުން ދިން މި ހަމަލާތަކުގައި ކުވޭތުގައި ހުރި އެމެރިކާގެ 5 މިލިއަން ޑޮލަރުގެ "ހައިމާސް" ރޮކެޓް ސިސްޓަމް ވަނީ އެއްކޮށް ސުންނާފަތިކޮށްލާފަ އެވެ.

މީގެ އިތުރުން، އީރާނަށް ހަމަލާދިނުމަށް ތައްޔާރުކޮށްފައި ހުރި މިސައިލްތައްވެސް މި ހަމަލާގައި ވަނީ ނައްތާލާފަ އެވެ.

ކަށަވަރުނުވާ ރިޕޯޓްތައް ބުނާގޮތުގައި، މި ހަމަލާތަކުގައި އެމެރިކާގެ ސިފައިންގެ ތިން މީހަކު މަރުވެ، އިތުރު ބަޔަކަށް ވަނީ އެކިވަރުގެ އަނިޔާތައް ލިބިފައެވެ.