ކުވެއިތުގައި ހުރި އެމެރިކާގެ އަސްކަރީ އަމާޒު ތަކަށް ހަމަލާ ދެމުން އަންނަ ކަމަށް އީރާން އިން ބުނެފި

ކުވެއިތުގައި ހުރި އެމެރިކާގެ އަސްކަރީ ބޭސް ތަކަށް އަމާޒުކޮށް ޑްރޯން ހަމަލާތައް ދެމުން އަންނަ ކަމަށް އީރާން އިން ހޯމަ ދުވަހު ބުނެފި އެވެ.

އީރާންގެ ރަސްމީ ނޫސް އެޖެންސީ އިރްނާ އިން ރިޕޯޓު ކޮށްފައިވާ ގޮތުގައި އީރާންގެ ސިފައިންގެ ބަޔާނުގައި ބުނެފައި ވަނީ، ސަރަހައްދުގައި އޮންނަ އެމެރިކާގެ ބޭސް ތަކަށް ޑްރޯން ހަމަލާ ތަކެއް ދެމުން އަންނަ ކަމަށާއި، ކުވެއިތުގައި ހުންނަ އެމެިރކާގެ ސިފައިންގެ މަރުކަޒު ތަކަށް ބާރު ގަދަ ޑްރޯން ހަމަލާ ތަކެއް ދީފައިވާ ކަމަށެވެ. އެ ހަމަލާ ތަކުގައި ދިފާއީ އަދި މިސައިލް ނިޒާމު ތަކާއި، ބަންކަރުތައް އަދި ސްޕޯޓް ޝެލްޓަރު ތަކަށް ގެއްލުން ލިބިފައިވާ ކަމަށް ވެސް ބުނެފައިވެ އެވެ. 

އީރާންގެ ސިފައިންގެ ބަޔާނުގައި ބުނެފައި ވަނީ، އެމެރިކާ އިން އީރާންގެ ސިފައިންގެ މަރުކަޒު ތަކަށާއި، އެ ޤައުމުގެ ރައްޔިތުންގެ ބިނާތައް އަދި އާންމު ރައްޔިތުންނަށް ދެމުން އަންނަ ހަމަލާތައް ކުށްވެރި ކުރާ ކަމަށެވެ. އަދި މި ހަމަލާ ތަކަކީ އދ.ގެ ޗާޓަރުގެ އަސާސީ އުސޫލުތަކާ ފާޅުގައި ޚިލާފުވާ ކަންކަން ކަމަށް ވެސް އީރާން އިން ވަނީ ބުނެފައި އެވެ. 

މީގެ އިތުރުން އީރާން އަށް އިތުރު އެއްވެސް ހަމަލާއެއް ދިނުމުން، އީރާންގެގެ ސިފައިން އެ ޤައުމުގެ ސިޔާދަތާއު، ސަރަހައްދީ ސަލާމަތާއި، މިނިވަންކަން އަދި ރައްޔިތުން ދިފާއު ކުރުމަށް ކުރެވެން ހުރި ހުރިހާ މަސައްކަތް ތަކެއް ކުރާނެ ކަމަށް ވެސް އީރާން އިން ވަނީ ބުނެފައި އެވެ. 

މީގެ ކުރިން އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ބުނެފައި ވަނީ ކުވެއިތުގައި ހުންނަ ޢަލީ ސާލިމް އަދި އަހުމަދު އަލް ޖާބިރު ބޭސް ތަކަށް ހަމަލާތައް ދީފައިވާ ކަމަށެވެ.

އީރާންގެ ސިފައިންގެ މި ބަޔާން ނެރުނީ ސަރަހައްދުގައި ހަނގުރާމަވެރި ހަރަކާތްތައް އިތުރުވަމުން އަންނަ ދަނޑިވަޅެއްގައި އެވެ. އީރާން އާއި އެމެރިކާއާ ދެމެދު އުފެދިފައިވާ ނުތަނަވަސްކަމުގެ ސަބަބުން މެދު އިރުމަތީގެ ސަރަހައްދުގައި ހާލަތު އިތުރަށް ގޯސްވެފައިވާއިރު، ބައިނަލްއަގުވާމީ މުޖުތަމައުން މި ހާލަތު ހައްލު ކުރުމަށް މަސައްކަތްތައް ކުރަމުން އަންނަ ކަމަށް ރިޕޯޓު ތަކުގައި ވަނީ ބުނެފައި އެވެ. 

ކުވެއިތުގައި ހުންނަ އެމެރިކާގެ ބޭސް ތަކަށް ދިން ހަމަލާތަކާ ގުޅިގެން އެމެރިކާ އިން މިހާތަނަށް ރަސްމީކޮށް އެއްޗެއް ބުނެފައި ނުވެ އެވެ.