އެމެރިކާއިން އީރާނުގެ މިސައިލް ނިޒާމުތަކަށް ވަރުގަދަ ހަމަލާދީފި: އެކްސިއޯސް

އީރާނުގެ މިސައިލް އަދި ވައިގެ ދިފާއީ ނިޒާމުތަކަށް އަމާޒުކޮށް އެމެރިކާ ސިފައިން ވަރުގަދަ ހަމަލާތަކެއް ދީފި ކަމަށް އެމެރިކާގެ އިސް އޮފިޝަލަކާ ހަވާލާދީ "އެކްސިއޯސް" ނޫހުން އާދިއްތަ ދުވަހު ރިޕޯޓްކޮށްފި އެވެ.

ހުރްމުޒް ކަނޑުއޮޅި ސަރަހައްދުގެ އެކި ތަންތަނަށް ދިން މި ހަމަލާތަކުގައި، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ބޭނުންކުރާ ކުދި ހައި-ސްޕީޑް ބޯޓުތަކަށް ވެސް އަމާޒުކޮށްފައިވާ ކަމަށް އެ ނޫހުން ބުނެފައިވެ އެވެ.

ތެހެރާނާއި ވޮޝިންޓަނާ ދެމެދު އަލުން ކުރިމަތިލުންތައް ފެށިފައިވާއިރު، ހުރްމުޒް ކަނޑުއޮޅީގައި އޮންނަ އީރާނުގެ ގިޝްމް އައިލެންޑަށް އާދިއްތަ ދުވަހު 10 އަށްވުރެ ގިނަ ހަމަލާ އަމާޒުވެފައިވާ ކަމަށް އީރާނުގެ ދައުލަތުގެ މީޑިއާއިން ވަނީ ރިޕޯޓްކޮށްފަ އެވެ.

ގިޝްމް ޓައުންޝިޕްގެ ގަވަރުނަރު ހުސައިން އަމީރު ތައިމޫރީ، އީރާނުގެ ރަސްމީ ނިއުސް އެޖެންސީ "އިރްނާ" އަށް މައުލޫމާތު ދެއްވަމުން ވިދާޅުވީ، އާދިއްތަ ދުވަހުގެ މެންދުރު ފަހުން ފެށިގެން ދުޝްމަނުންގެ 10 ނުވަތަ 11 ހަމަލާއެއް ގިޝްމް އައިލެންޑަށް އަމާޒުވެފައިވާ ކަމަށެވެ. އަދި މި ހުރިހާ ހަމަލާތަކެއް ވެސް އަމާޒުކޮށްފައިވަނީ އަސްކަރީ މަރުކަޒުތަކަށް ކަމަށާއި، މި ހާދިސާގައި އެއްވެސް މީހަކު މަރުވެ ނުވަތަ އަނިޔާވެފައި ނުވާ ކަމަށް އޭނާ ވިދާޅުވި އެވެ.

މީގެ އިތުރުން، ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް އީރާނުން ދާދިފަހުން ދިން ހަމަލާތަކުގެ ބަދަލުހިފުމުގެ ގޮތުން، ރޭގަނޑުގެ ވަގުތެއްގައި އެމެރިކާއިން އީރާނަށް ވަރުގަދަ ހަމަލާތަކެއް ދީފައިވާ ކަމަށް ރައީސް ޑޮނަލްޑް ޓްރަމްޕް އާދިއްތަ ދުވަހުގެ ކުރީކޮޅު ވަނީ ވިދާޅުވެފަ އެވެ.

ސީ.އެން.އެން އަށް ފޯނުން ދެއްވި އިންޓަވިއުއެއްގައި ރައީސް ޓްރަމްޕް ވިދާޅުވީ، "އަޅުގަނޑުމެން ރޭގައި އެމީހުންނަށް ވަރަށް ވަރުގަދަ ހަމަލާތަކެއް ދީފިން" ކަމަށެވެ.