ސައުދީން އީރާނުގެ ހަމަލާތައް ކުށްވެރިކޮށްފި

އީރާނުން އަވަށްޓެރި ގައުމުތަކަށާއި ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް ދެމުންދާ ހަމަލާތައް ކުށްވެރިކޮށް، އެއީ ސަރަހައްދީ ހަމަޖެހުން ނަގާލުމުގެ އަމަލުތަކެއްގެ ގޮތުގައި ސައުދީ އަރަބިއްޔާއިން އާދިއްތަ ދުވަހު ސިފަކޮށްފި އެވެ.

ސައުދީގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ، ސަރަހައްދުގެ ސަލާމަތާއި ހަމަޖެހުން ގެއްލޭ ގޮތަށް އީރާނުން ކުރިއަށްގެންދާ އަމަލުތައް އެންމެ ހަރުކަށި އިބާރާތުން ކުށްވެރިކުރާ ކަމަށާއި، އެކަން އެ ގައުމުން ބަލައިނުގަންނާނެ ކަމަށެވެ.

އީރާނުގެ މި ހަމަލާތަކަކީ ބައިނަލްއަގުވާމީ ގާނޫނުތަކާއި، އދ. ގެ ޗާޓަރާއި، އިސްލާމީ އެއްބާރުލުންދޭ ޖަމިއްޔާ (އޯ.އައި.ސީ) ގެ މެމްބަރުންނާއި، އަވަށްޓެރި ގައުމުތަކާއެކު ބާއްވަންޖެހޭ ރަނގަޅު ގުޅުމުގެ އަސާސްތަކާ ޚިލާފު އަމަލުތަކެއް ކަމަށްވެސް އެ ބަޔާނުގައި ސިފަކޮށްފައިވެ އެވެ.

މީގެއިތުރުން، ވިޔަފާރި އުޅަނދުފަހަރަށް ތަކުރާރުކޮށް ދެމުންދާ ހަމަލާތަކަކީ ކަނޑުދަތުރުފަތުރުގެ މިނިވަންކަމާއި ސަލާމަތަށް އޮތް ނުރައްކަލެއް ކަމަށް ބުނެ ސައުދީން ވަނީ އެކަން ކުށްވެރިކޮށްފަ އެވެ. އަދި ބަހްރައިން، އުރުދުން، ކުވެއިތު، އޮމާން، ގަތަރު އަދި އެކުވެރި އަރަބި އިމާރާތް ފަދަ އަވަށްޓެރި ގައުމުތަކަށް އަމާޒުކޮށް ދޭ ހަމަލާތަކާ ގުޅިގެން، އަޚުވަންތަ ގައުމުތަކުގެ އިސްތިގްލާލަށް އީރާނުން އަރައިގަތުމާއި، ސަރަހައްދީ ސަލާމަތަށް ދެމުންދާ އިންޒާރުތައް ގަބޫލުނުކުރާނެކަން ސައުދީ އަރަބިއްޔާއިން ވަނީ އަލުން ތަކުރާރުކޮށްފަ އެވެ.