އެމެރިކާއިން ދިން ހަމަލާތަކާ ގުޅިގެން ބަދަލުހިފުމުގެ ގޮތުން، ކުވެއިތާއި ބަހްރޭން އަދި އޮމާންގައި ހުރި އެމެރިކާގެ އަސްކަރީ މުހިންމު އަމާޒުތަކަކަށް ބޮޑެތި ގެއްލުންތަކެއް ދީފައިވާ ކަމަށް އައިއާރްޖީސީ އިން ބުނެފި

އީރާނުގެ އައްސޭރިފަށުގެ ސަރަހައްދުތަކަށް އެމެރިކާއިން ދިން ހަމަލާތަކާ ގުޅިގެން ބަދަލުހިފުމުގެ ގޮތުން، ކުވެއިތާއި ބަހްރައިން އަދި އޮމާންގައި ހުރި އެމެރިކާގެ އަސްކަރީ މުހިންމު އަމާޒުތަކަކަށް ބޮޑެތި ގެއްލުންތަކެއް ދީފައިވާ ކަމަށް އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން އިއުލާންކޮށްފި އެވެ.

ހޯމަ ދުވަހުގެ ފަތިހުގެ ވަގުތެއްގައި އައިއާރްޖީސީ އިން ވަނީ އެމެރިކާގެ އުދުވާނަށް ރައްދު ދިނުމުގެ ގޮތުން ކުރިއަށްގެންދިޔަ ހަތަރު އޮޕަރޭޝަނެއްގެ ތަފްސީލު ހާމަކޮށް، ފުލުފުލުން ބަޔާންތަކެއް ނެރެފަ އެވެ.

އައިއާރްޖީސީ އިން ބުނި ގޮތުގައި ބަދަލުހިފުމުގެ ދެވަނަ މަރުހަލާގައި، އެ ފައުޖުގެ އެއަރޯސްޕޭސް ފޯސްއިން ވަނީ ބަހްރައިންގައި ހުންނަ ޝެއިޚް އީސާ އެއާބޭސްގައި ހުރި ހެލިކޮޕްޓަރު މަރާމާތުކުރާ މުހިންމު މަރުކަޒުތަކާއި، ޕީ-8 މަރުކާގެ އިލެކްޓްރޯނިކް ވޯފެއާ މަތިންދާބޯޓު ބާއްވާ ހޭންގަރާއި، އެމެރިކާ އަސްކަރިއްޔާގެ ޑްރޯން ކޮމާންޑް އެންޑް ކޮންޓްރޯލް ސެންޓަރު ހަލާކުކޮށްލާފަ އެވެ.

މީގެ އިތުރުން، އެމެރިކާގެ ނުބައިވެގެންވާ އަދި ހަނގުރާމައަށް ފެންބޮވައިގެންފައިވާ ސަރުކާރަކީ އުފެދުނީއްސުރެ ހަނގުރާމައާއި އަސްކަރީ އުދުވާންތަކުން އެއްކިބާވެ އޮތީ ވަރަށް މަދު ދުވަސްކޮޅަކު ކަމަށާއި، އީރާނުގެ ސަލާމަތީ ބާރުތަކުގެ އަތުން ދާދިފަހުން ލިބުނު ނާކާމިޔާބީތަކުން އެ ގައުމުން އެއްވެސް ފިލާވަޅެއް ލިބިގަނެފައި ނުވާ ކަމަށް އެ ބަޔާނުގައި ފާހަގަކޮށްފައިވެ އެވެ.

އައިއާރްޖީސީ އިން އޭގެ ފަހުން ނެރުނު ބަޔާނެއްގައި ބުނެފައިވަނީ، ކުވެއިތުގައި ހުންނަ އަލީ އަލް-ސާލިމް އެއާބޭސްގައި ހުރި ތެޔޮ ރައްކާކުރާ ތަންތަނާއި ޕެޓްރިއަޓް އެއާ ޑިފެންސް ސިސްޓަމެއްގެ އިތުރުން، އެ ގައުމުގެ އަހުމަދު އަލް-ޖާބިރު އެއާބޭސްގައި ހުރި ސްޓްރެޓީޖިކް ރާޑަރު ސިސްޓަމެއް "މުޅިން ސުންނާފަތިކޮށްލާފައިވާ" ކަމަށެވެ.

އަދި އޭގެ ފަހުން ނެރުނު ބަޔާނެއްގައި، ބަދަލުހިފުމުގެ ހަތަރުވަނަ މަރުހަލާގެ ދަށުން ކުވެއިތުގައި ހުރި އެމެރިކާ ސިފައިންގެ ބިމުން ބިމަށް ހަމަލާދޭ މިސައިލް ބޭހަކަށް އައިއާރްޖީސީގެ ގްރައުންޑް ފޯސްއިން ހަމަލާދީފައިވާ ކަމަށް ބުނެފައިވެ އެވެ. އެ ބަޔާނުގައިވާ ގޮތުން، ހައިމާސް (HIMARS) މަރުކާގެ ދެ މިސައިލް ލޯންޗަރާއި މިސައިލް އަޅާފައި ހުރި ގުދަންތަކުގައި ވަނީ އަލިފާން ރޯކޮށްލައި، އެ ތަންތަން މުޅިން ހަލާކުކޮށްލާފަ އެވެ.

އައިއާރްޖީސީ އިން ދެން ނެރުނު ބަޔާނެއްގައި ބުނެފައިވަނީ، ބަހްރައިންގައި ހުންނަ އެމެރިކާގެ ކަނޑުގެ ސިފައިންގެ މަރުކަޒެއް ކަމަށްވާ "ނޭވަލް ސަޕޯޓް އެކްޓިވިޓީ" އަށް އަމާޒުކޮށް ހަމަލާދީފައިވާ ކަމަށާއި، އެ ތަނުން މިހާރުވެސް ބޮޑެތި އަލިފާންގަނޑުތައް އަރަމުންދާ ކަމަށެވެ. އަދި ބަދަލުހިފުމުގެ ފަސްވަނަ މަރުހަލާގައި، އޮމާންގައި ހުރި އެފް.ޕީ.އެސް މަރުކާގެ ދުރު ރާސްތާގެ އެއާ ސަވައިލަންސް ރާޑަރަކަށާއި ކަނޑުގެ ސަރަހައްދު ބަލަހައްޓާ ރާޑަރަކަށް ވަރުގަދަ މިސައިލާއި ޑްރޯން ހަމަލާތަކެއްދީ އެ ތަންތަން ހަލާކުކޮށްލާފައިވާ ކަމަށްވެސް ބުނެފައިވެ އެވެ.

އީރާނުގެ ދެކުނުގެ ސަރަހައްދެއްގައި ހުރި ދަނޑުވެރިކަމަށް ފެން ފޯރުކޮށްދޭ ޕަމްޕަކަށް އެމެރިކާ ސިފައިން ދާދިފަހުން ހަމަލާދީފައިވަނީ، އައިއާރްޖީސީގެ ބަދަލުހިފުމުގެ ހަމަލާތަކުގެ ސަބަބުން "ކުޑަކުދިން މަރާ އެމެރިކާ އަސްކަރިއްޔާ" މާޔޫސްވެފައިވާ މިންވަރު ހާމަވާ ކަމެއް ކަމަށްވެސް އެ ބަޔާނުގައި ފާހަގަކޮށްފައިވެ އެވެ.

ހޯމަ ދުވަހުގެ ކުރީކޮޅު އައިއާރުޖީސީ އިން ވަނީ އުރުދުންގައި ހުންނަ ޕްރިންސް ހަސަން އެއާބޭސްގެ ތެޔޮ ގުދަންތަކާއި ހަތިޔާރު ރައްކާކުރާ ތަންތަނަށް ކާމިޔާބު ހަމަލާތަކެއްދީ، އެ ތަންތަނުގައި އަލިފާން ރޯކޮށްލާފައިވާ ކަމަށް ރިޕޯޓްކޮށްފަ އެވެ.

އައިއާރުޖީސީ އިން ވަނީ ބަދަލުހިފުމުގެ މި އަމަލުތައް ކުރިއަށްދާނެ ކަމަށް ބުނެ، ސްޓްރެޓީޖިކް ސަރަހައްދެއް ކަމަށްވާ ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް ހުރަސްއެޅުމަށް އެމެރިކާއިން ކުރާ މަސައްކަތްތަކާ މެދު އިންޒާރު ދީފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް، އީރާނާ ދެކޮޅަށް އެމެރިކާއާއި އިސްރާއީލުން ގުޅިގެން ދެމުންދިޔަ ހަމަލާތައް އެއްފަރާތުން ހުއްޓާލިކަން އޭޕްރިލް 7 ވަނަ ދުވަހު އިއުލާންކުރި ފަހުންވެސް، އެމެރިކާއިން ވަނީ އީރާނުގެ ސަރަހައްދީ އިންސައްތައާ ޚިލާފު އެތައް އަމަލެއް ހިންގާފަ އެވެ.

ވޮޝިންގޓަނާއި ތެހެރާނާ ދެމެދު، ޕާކިސްތާނު މެދުވެރިވެގެން ސޮއިކުރި ފަހުމުނާމާގެ ފުރަތަމަ މާއްދާގައި ހުރިހާ ދިމާއަކުން ހަމަލާދިނުން ހުއްޓާލުމަށް ސާފުކޮށް ބަޔާންކޮށްފައިވީ ނަމަވެސް، އެމެރިކާގެ އުދުވާންތައް ހުއްޓިފައެއް ނުވެ އެވެ.

އީރާނުގެ ސަލާމަތީ ބާރުތަކުން ދަނީ އެމެރިކާގެ ކޮންމެ އުދުވާނަކަށް، ޚާއްސަކޮށް ހުރްމުޒް ކަނޑުއޮޅިން ގަވާއިދާ ޚިލާފަށް އުޅަނދުފަހަރު ދަތުރުކުރުވުމަށް އެމެރިކާއިން ކުރާ މަސައްކަތްތަކަށް، އެއްވެސް ދޫދިނުމެއް ނެތް ވަރުގަދަ ރައްދުތަކެއް ދެމުންނެވެ.

ހޯމަ ދުވަހު ނެރުނު ބަޔާންތަކުގެ ތެރޭގައި، ހުރްމުޒް ކަނޑުއޮޅީގެ މައްޗަށް އީރާނަށް އޮތް ސިޔާދަތީ ބާރުގެ މުހިންމުކަން އައިއާރުޖީސީ އިން އަލުން ފާހަގަކޮށްފައިވެ އެވެ. އެގޮތުން "ހުރްމުޒް ކަނޑުއޮޅިއަކީ އީރާނުގެ ސަރަހައްދެއް ކަމަށާއި، ދުނިޔޭގެ އަނެއް ބިތުން އައިސް އުޅޭ ކުޑަކުދިން މަރާ، ގާނޫނާ ޚިލާފު އަސްކަރިއްޔާއަކަށް އެ ސަރަހައްދުގައި ގަވާއިދާ ޚިލާފަށް ނުފޫޒު ފޯރުވުމުގެ ފުރުސަތު ނުދޭނެ" ކަމަށް ބުނެފައިވެ އެވެ.

އަދި އެމެރިކާގެ އުދުވާންތަކާ ގުޅިގެން އެ ކަނޑުއޮޅި ބަންދުކުރި ކުރުން އުވާލާނީ، "އެމެރިކާގެ އަސްކަރިއްޔާއިން އެ ސަރަހައްދަށް ވަދެގަތުން ހުއްޓާލައި، ގައުމުތަކުގެ އައްސޭރިފަށުގެ ސަރަހައްދުތަކުގެ މައްޗަށް އެ ގައުމުތަކަށް އޮންނަ ސިޔާދަތީ ބާރަށް އިހުތިރާމް ކުރަން ފެށުމުން" ކަމަށްވެސް އައިއާރުޖީސީ އިން ބުނެފައިވެ އެވެ.