ބައްޕާފުޅުގެ ހަނދާނުގައި ތައުޒިޔާގެ ޚާއްސަ ރަސްމިއްޔާތެއް އީރާނުގެ ލީޑަރު މުޖުތަބާ ޚާމަނާއީ ބާއްވަވަނީ

އެމެރިކާއާއި އިސްރާއީލުން އީރާނަށް ދިން ވައިގެ ހަމަލާތަކުގައި ޝަހީދުކޮށްލާފައިވާ އީރާނުގެ ކުރީގެ ލީޑަރު އާޔަތުﷲ ސައްޔިދު އަލީ ޚާމަނާއީގެ ހަނދާނުގައި މިހާރުގެ ލީޑަރު އާޔަތުﷲ ސައްޔިދު މުޖުތަބާ ޚާމަނާއީ ތައުޒިޔާގެ ޚާއްސަ ރަސްމިއްޔާތެއް ބާއްވަވާ ގޮތަށް ހަމަޖެހިއްޖެ އެވެ.

ލީޑަރުގެ އޮފީހުން އާދީއްތަ ދުވަހު ނެރުނު ބަޔާނަކާ ހަވާލާދީ އީރާނުގެ ރަސްމީ ޓީވީ އިން ބުނެފައިވަނީ، އާޔަތުﷲ ސައްޔިދު މުޖުތަބާ ޚާމަނާއީގެ ފަރާތްޕުޅުން ބާއްވާ މި ތައުޒިޔާގެ ރަސްމިއްޔާތު އޮންނާނީ އަންގާރަ ދުވަހުގެ ހަވީރު އީރާނު ގަޑިން 5:00 އިން 7:00 އަށް، ތެހެރާންގެ އިމާމް ޚުމައިނީ މުސައްލާގައި ކަމަށެވެ.

އާޔަތުﷲ ސައްޔިދު އަލީ ޚާމަނާއީ އަވަހާރަކޮށްލާފައިވަނީ، އެމެރިކާއާއި އިސްރާއީލުން އީރާނާ ދެކޮޅަށް ފެށި 40 ދުވަހުގެ ޣައިރު ގާނޫނީ ހަނގުރާމައިގެ ފުރަތަމަ ދުވަސް ކަމަށްވާ ފެބްރުއަރީ މަހުގެ 28 ވަނަ ދުވަހު، އޭނާގެ އާއިލާގެ ބައެއް މެންބަރުންނާވެސް އެކުގަ އެވެ.

އީރާނުގެ އެސެމްބްލީ އޮފް އެކްސްޕާޓްސްއިން ވަނީ މާޗް މަހުގެ 8 ވަނަ ދުވަހު، އިސްލާމީ އިންގިލާބުގެ އާ ލީޑަރުގެ މަގާމަށް އާޔަތުﷲ ސައްޔިދު މުޖުތަބާ ޚާމަނާއީ ރަސްމީކޮށް އައްޔަންކުރައްވާފަ އެވެ.

އަވަހާރަވި ލީޑަރުގެ ޖަނާޒާގެ ހަރަކާތްތަކާއި އަލްވަދާއު ކިޔުމުގެ ރަސްމިއްޔާތުތައް ޖުލައި މަހުގެ 3 އިން 10 އަށް އީރާނާއި އިރާގުގައި ވަނީ ކުރިއަށް ގެންގޮސްފަ އެވެ.

އާޔަތުﷲ ސައްޔިދު އަލީ ޚާމަނާއީގެ ހަށިކޮޅު ފަސްދާނުލާފައިވަނީ ހުކުރު ދުވަހުގެ ފަތިހުގެ ވަގުތެއްގައި، އީރާނުގެ މަޝްހަދުގައި ހުންނަ އިމާމު ރިޒާގެ މަގްބަރާގަ އެވެ.

ލަފާކުރެވޭ ގޮތުގައި އީރާނާއި އިރާގުގައި ބޭއްވި ޖަނާޒާގެ ހަރަކާތްތަކުގައި 41 މިލިއަނާއި 43 މިލިއަނާ ދެމެދުގެ އަދަދަކަށް މީހުން ބައިވެރިވެފައިވާއިރު، މިއީ ދުނިޔޭގައި މިހާތަނަށް ބޭއްވުނު އެންމެ ބޮޑު ޖަނާޒާ އެވެ.

މަގާމާ ހަވާލުވެ ވަޑައިގަތް ފަހުން އާންމުންގެ ތެރެއިން މުޖްތަބާ ޚާމަނާއީ އަދި މިހާތަނަށް ފެނިފަ އެއް ނުވެ އެވެ.