އީރާން އަށް އަމާޒުކޮށް ވަރުގަދަ ހަމަލާ ތަކެއް ދީފައިވާ ކަމަށް އެމެރިކާ އިން ބުނެފި
13 ޖުލައި 2026 | ހޯމަ 04:20އީރާންގެ ރަސްމީ ނޫސް އެޖެންސީ އިރްނާ އިން ރިޕޯޓު ކޮށްފައިވާ ގޮތުގައި، އީރާންގެ ދެކުނުގައި އޮންނަ ހުރްމުޒްގާން ޕްރޮވިންސްގެ ބަނދަރު އައްބާސް ސަރަހައްދުން ފާއިތުވި ގަޑިއިރެއްހާއިރު ތެރޭގައި ވަރުގަދަ ދެ ގޮވުމެއްގެ އަޑު ވަނީ އިވިފައި. މި ގޮވުން ތަކުގެ އަޑު އިވިފައި ވަނީ އެމެރިކާގެ ސެންޓްކޮމް އިން އީރާން އަށް ދެމުން ދިޔަ ހަމަލާ ތަކުގެ އެންމެ ފަހު ބުރު ނިމިފައިވާ ކަމަށް އިއުލާން ކުރުމުގެ ކުދަ ވަގުތު ކޮޅެއް ކުރިން.
މީގެ ކުރިން އެމެރިކާ އިން އީރާން އަށް އަމާޒުކޮށް ދީފައިވާ ހަމަލާގެ މަންޒަރެއް. | ރޮއިޓާސް
އީރާންގެ އެކި ސަރަހައްދު ތަކަށް އަމާޒުކޮށް އެމެރިކާގެ އަސްކަރިއްޔާ އިން ވަރުގަދަ ހަމަލާ ތަކެއް ދީފި އެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ނެރުނު ބަޔާނެއްގައި ބުނެފައި ވަނީ، އީރާންގެ އެކި ސަރަހައްދު ތަކުގައި ހުރި އެތައް އަމާޒު ތަކަަކށް ޕްރެސިޝަން މިއުނިޝަން ނުވަތަ، އަމާޒަށް ސީދާވާ ގޮތަށް ފަރުމާ ކޮށްފައިވާ ހަތިޔާރު ބޭނުން ކޮށްގެން ހަމަލާ ދީފައިވާ ކަމަށެވެ.
މި ހަމަލާތަކާ ގުޅޭ ގޮތުން ސެންޓްކޮމް އިން ބުނީ، މިއީ ހުރްމުޒް ކަނޑު އޮޅިން ދަތުރު ކުރާ ބައިނަލްއަޤުވާމީ އުޅަނދު ފަހަރަށް އީރާން އިން ދެމުން އަންނަ ހަމަލާތައް ހުއްޓުވުމަށާއި، އެ ޤައުމުގެ އަސްކަރީ ޤާބިލުކަން ކުޑަ ކުރުމަށް ދިން ހަމަލާ ތަކެއް ކަމަށެވެ.
އެމެރިކާގެ ހަމަލާތައް އަމާޒު ކޮށްފައިވާ ތަންތަނުގެ ތެރޭގައި އީރާންގެ އަސްކަރީ ވައިގެ ދިފާއީ ނިޒާމު ތަކާއި، އައްސޭރިފަށުގެ ރާޑަރު ސައިޓު ތަކާއި، މިސައިލް އާއި ޑްރޯން އުފައްދާ މަރުކަޒު ތަކުގެ އިތުރުން ކުދި އަސްކަރީ ބޯޓުތައް ހިމެނެ އެވެ.
އީރާންއާ ދެކޮޅަށް އެމެރިކާ އިން ހަމަލާ ދިން މަންޒަރު.
މި އޮޕަރޭޝަންގައި އެމެރިކާގެ އަސްކަރީ މަތިންދާ ބޯޓު ތަކާއި، ކަނޑުގެ އުޅަނދު ފަހަރުގެ އިތުރުން، އެއް ފަހަރު ބޭނުން ކުރާ "ވަން ވޭ އެޓޭކް" ވައިގެ ޑްރޯންތަކާއި، ކަނޑުގެ ޑްރޯންތައް ފުރަތަމަ ފަހަރަށް ބޭނުން ކޮށްފައިވާ ކަމަށް ސެންޓްކޮމް އިން ވަނީ ހާމަ ކޮށްފައި އެވެ. މިއީ އެމެރިކާގެ އަސްކަރިއްޔާ އިން މިފަދަ އޮޕަރޭޝަނެއްގައި މި ޓެކްނޮލޮޖީ ބޭނުން ކުރި ފުރަތަމަ ފަހަރެވެ.
އީރާންގެ ރަސްމީ ނޫސް އެޖެންސީ އިރްނާ އިން ރިޕޯޓު ކޮށްފައިވާ ގޮތުގައި، އީރާންގެ ދެކުނުގައި އޮންނަ ހުރްމުޒްގާން ޕްރޮވިންސްގެ ބަނދަރު އައްބާސް ސަރަހައްދުން ފާއިތުވި ގަޑިއިރެއްހާއިރު ތެރޭގައި ވަރުގަދަ ދެ ގޮވުމެއްގެ އަޑު ވަނީ އިވިފައި އެވެ. މި ގޮވުން ތަކުގެ އަޑު އިވިފައި ވަނީ އެމެރިކާގެ ސެންޓްކޮމް އިން އީރާން އަށް ދެމުން ދިޔަ ހަމަލާ ތަކުގެ އެންމެ ފަހު ބުރު ނިމިފައިވާ ކަމަށް އިއުލާން ކުރުމުގެ ކުދަ ވަގުތު ކޮޅެއް ކުރިންނެވެ.
އީރާާންގެ ބަނދަރު އައްބާސް ސަރަހައްދަށް އެމެރިކާާ އިން ހަމަލާ ދެމުން ދިޔަ މަންޒަރު.
އެމެރިކާ އިން މި ހަމަލާތައް ދީފައި ވަނީ މެދު އިރުމަތީގެ މަސްރަހު ވަރަށް ބޮޑަށް ނުތަނަވަސްވެފައިވާ ވަގުތެއްގައި އެވެ. ޚާއްސަކޮށް ބައިނަލްއަޤުވާމޫ ކަނޑު ދަތުރު ފަތުރަށް ހުރަސް އެޅޭ ގޮތަށް އީރާން އިން ހިންގާ ހަރަކާތް ތަކަށް އެމެރިކާ އިން ދެމުން އަންނަ ރައްދު މި ފަހަކަށް އައިސް ވަނީ ވަރުގަދަ ކޮށްފައި އެވެ.
މަސްދަރު: އަލް ޖަޒީރާ
