އުރުދުންގައި ހުންނަ ޕްރިންސް ހަސަން އެއާ ބޭސްގައި ހުރި ތެޔޮ ގުދަންތަކާއި ހަތިޔާރު ރައްކާކުރާ ތަންތަނަށް ހަމަލާދީ، އެ ތަންތަނުގައި ރޯކޮށްލާފައިވާ ކަމަށް އިރާނުން ބުނެފި

އުރުދުންގައި ހުންނަ ޕްރިންސް ހަސަން އެއާ ބޭސްގައި ހުރި ތެޔޮ ގުދަންތަކާއި ހަތިޔާރު ރައްކާކުރާ ތަންތަނަށް ހަމަލާދީ، އެ ތަންތަނުގައި ރޯކޮށްލާފައިވާ ކަމަށް އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން އިއުލާންކޮށްފިއެވެ. މިއީ އެ ސަރަހައްދުގައި ހުރި އެމެރިކާގެ އަސްކަރީ އިންފްރާސްޓްރަކްޗާއާ ދެކޮޅަށް، ބަދަލުހިފުމުގެ ގޮތުން ދިން ސީދާ ހަމަލާތަކެކެވެ.

އައި.އާރު.ޖީ.ސީގެ ޕަބްލިކް ރިލޭޝަންސް ޑިޕާޓްމަންޓުން ހޯމަ ދުވަހުގެ ހެނދުނު ނެރުނު ބަޔާނެއްގައި ބުނެފައިވަނީ، އެ ޖަމާއަތުގެ އެއަރޯސްޕޭސް ފޯސްއިން އެމެރިކާ ސިފައިންގެ މުހިންމު މަރުކަޒެއްގެ ގޮތުގައި ބޭނުންކުރާ އެއާ ބޭސްގެ މުހިންމު އަމާޒުތަކަށް ހަމަލާދީފައިވާ ކަމަށެވެ. މި ހަމަލާތަކުގެ ސަބަބުން ތެޔޮ ރައްކާކުރާ ސަރަހައްދުތަކާއި ހަތިޔާރު ގުދަންތަކުގައި ބޮޑެތި އަލިފާންގަނޑުތަކެއް އުފެދިފައިވާ ކަމަށާއި، މީގެ ސަބަބުން ހުޅަނގު އޭޝިއާގައި އެމެރިކާގެ ލޮޖިސްޓިކް ގާބިލުކަމަށާއި އަސްކަރީ ތައްޔާރީތަކަށް ބޮޑު ލޮޅުމެއް އަރާފައިވާ ކަމަށްވެސް އެ ބަޔާނުގައިވެއެވެ.

އެ ބަޔާނުގައި އިތުރަށް ބުނެފައިވަނީ، މި އޮޕަރޭޝަނަކީ އިރާނުގެ އައްސޭރިފަށުގެ ބޭސްތަކަށް އެމެރިކާއިން ދިން ހަމަލާތަކަށް ރައްދު ދިނުމުގެ ގޮތުން ހިންގި އޮޕަރޭޝަނެއް ކަމަށެވެ.

މި ހަރަކާތަކީ އިރާނުގެ އައްސޭރިފަށުގެ ބޭސްތަކަށާއި ދެކުނުގެ މުވާސަލާތީ ވަސީލަތްތަކަށް އެމެރިކާއިން ދިން ވައިގެ ހަމަލާތަކާ ގުޅިގެން، އެމެރިކާގެ އުދުވާނުތަކަށް ރައްދު ދިނުމަށް އިރާނުން ރާވާފައިވާ ފުރަތަމަ މަރުހަލާގެ ބައެކެވެ.

ސްޓްރެޓީޖިކް ގޮތުން މުހިންމު ހުރްމުޒް ކަނޑުއޮޅީގައި ގަވާއިދާ ހިލާފަށް އުޅަނދުތައް ދުއްވައިގެން ހަމަނުޖެހުން އުފެއްދުމަށް އެމެރިކާއިން ކުރި މަސައްކަތްތައް އިރާނުގެ ނޭވީން ނާކާމިޔާބުކޮށްލުމާ ގުޅިގެން، އެމެރިކާއިން ވަނީ މަސްރަހު އިތުރަށް ހޫނުކޮށްފަ އެވެ.

އައި.އާރު.ޖީ.ސީން ބުނި ގޮތުގައި މި ހަމަލާތައް ދީފައިވަނީ ބެލިސްޓިކް މިސައިލާއި ޑްރޯން ބޭނުންކޮށްގެން ވަރަށް ފުރިހަމަ އަމާޒަކަށެވެ. މިއީ ގައުމުގެ އިސްތިގުލާލު ހިމާޔަތްކުރުމަށާއި، "ބޮޑު ޝައިތާނާ" (އެމެރިކާ) ގެ ބިރުދެއްކުންތަކަށް ހުރަސް އެޅުމަށް އިރާނުގެ އަސްކަރިއްޔާއިން އޮތް ސާބިތުކަން ހާމަކޮށްދޭ ކަމެއް ކަމަށްވެސް ބުނެފައިވެ އެވެ.

މީގެ އިތުރުން އިރާނުގެ އަސްކަރިއްޔާއިން ވަނީ އެމެރިކާއާ ގުޅުންހުރި އެހެން އަމާޒުތަކަށްވެސް އެއްވަގުތެއްގައި ޑްރޯން ހަމަލާތަކެއް ދީފަ އެވެ. އޭގެ ތެރޭގައި ކުވެއިތުގައި ހުރި ޕެޓްރިއަޓް އެއާ ޑިފެންސް ސިސްޓަމަކާއި، ހަތިޔާރު ގުދަނަކާއި، ރާޑަރު ސައިޓެއްގެ އިތުރުން ބަހްރޭންގައި ހުރި މުވާސަލާތީ އަދި ރާޑަރު ވަސީލަތްތައް ހިމެނެއެވެ. އެއްފަހަރާ ދެވުނު މި ހަމަލާތަކުން ހާމަވަނީ ބޭރުގެ އުދުވާނުތަކާ ކުރިމަތިލުމުގައި އިރާނުގެ އަސްކަރިއްޔާގެ ބަދަހިކަން ކަމަށް އެ ގައުމުން ބުނެ އެވެ.

އެމެރިކާގެ ދުޝްމަންކަން ހުރި އަމަލުތައް ކުރިއަށްދާނަމަ، މިއަށްވުރެ ވަރުގަދަ އަދި ފުޅާ ދާއިރާއެއްގައި ރައްދު ހަމަލާ ދޭނެ ކަމުގެ އިންޒާރު އައި.އާރު.ޖީ.ސީން ވަނީ ދީފަ އެވެ.

"ހަނގުރާމަވެރިންގެ ބަދަލުހިފުމުގެ އޮޕަރޭޝަންތައް ދަނީ ކުރިއަށް،" އިރާނުގެ ސަލާމަތަށް ނުވަތަ މަސްލަހަތަށް ނުރައްކާވާ ކޮންމެ ކަމަކާ ދެކޮޅަށް ހަރުކަށި ފިޔަވަޅު އަޅާނެކަން ކަށަވަރުކޮށްދެމުން އެ ބަޔާނުގައި ބުނެފައިވެއެވެ.

މި ހަމަލާތަކަށްފަހު އާންމުވެފައިވާ ސެޓެލައިޓް ފޮޓޯތަކުން ފެންނަ ގޮތުގައި، އުރުދުންގެ ޕްރިންސް ހަސަން އެއާ ބޭސްއަށް ބޮޑެތި ގެއްލުންތަކެއް ލިބި، އެ ތަނުގެ މަސައްކަތްތަކަށް ވަނީ ބުރޫއަރާފައި ކަމަށް ވެސް އީރާނުން ބުނެ އެވެ.