ރައީސް މުއިއްޒުގެ ސަރުކާރުން ފައިސާ ޗާޕުކޮށް، ރަސްމީ ރިޒަރވްގެ ހިސާބުތައް ވަނީ ގަޑުބަޑުކޮށްފައި: އަމީރު

ރައީސް ޑރ.މުހައްމަދު މުއިއްޒުގެ ސަރުކާރުން ފައިސާ ޗާޕުކޮށް، ރަސްމީ ރިޒަރވްގެ ހިސާބުތައް ގަޑުބަޑުކޮށްފައިވާ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

އާދީއްތަ ދުވަހުގެ ރޭ، އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ކުރިއަށް ގެންދިޔަ "ޑޮލަރެއް ނެތް" ޕެނަލް ޑިސްކަޝަންގައި ވާހަކަ ދައްކަވަމުން އަމީރު ވިދާޅުވީ، ސަރުކާރަށް ފައިސާ ދެނީ އެމްއެމްއޭއިން ކަމަށާއި، މިސަރުކާރުން ފައިސާ ޗާޕު ނުކުރާ ކަމަށް ތަކުރާރުކޮށް ބުނަމުން ދިޔަ ނަމަވެސް އެއީ ކަނޑައެޅިގެން މިސަރުކާރުން ހަދާ ދޮގެއް ކަމަށެވެ. އަދި އެކަން ވަރަށް ސާފުކޮށް އެމްއެމްއޭގެ ހިސާބުތަކުން ފެންނަމުންދާ ކަމަށް އޭނާ ވިދާޅުވި އެވެ.

މީގެ އިތުރުން އަމީރު ވިދާޅުވީ، ފައިސާ ޗާޕު ކުރުމުގެ އިތުރުން ރަސްމީ ރިޒަރވްގެ ހިސާބުތައް ގަޑުބަޑުކޮށްފައިވާ ކަމަށެވެ. 

އެމްއެމްއޭއިން ބޭންކުތަކުގައި އެމްއެމްއޭގެ ޕްލޭސްމަންޓް މި ވަނީ ގާތްގަނޑަކަށް 3.8 ބިލިއަން ރުފިޔާއައް އަރާފައި. ބޭންކުތަކުން މި ފައިސާ މި އިންވެސްޓްކުރަނީ ސަރުކާރުގެ ޓްރެޜަރީ ސެކިއުރިޓީސްތައް. އެގޮތުން، ސަރުކާރަށް މި ފައިސާ އެބަލިބޭ. އެމްއެމްއޭ އިން ކޮމާޝަލް ބޭންކުތަކުގެ ޚާއްސަކޮށް ބޭންކް އޮފް މޯލްޑިވްސްގައި ފައިސާ ޑިޕޮސިޓްކޮށްގެން، އެ ފައިސާ އަނެއްކާ އެ ބޭންކުތަކުން ސަރުކާރުގެ ސެކިއުރިޓީޒް ތަކުގައި އިންވެސްޓްކޮށްގެން ސަރުކާރަށް ފައިސާ އެބަލިބޭ. އޭގެ މާނައަކީ އެމްއެމްއޭއިން މިގޮތަށް ފައިސާ ދިނުމަކީ އެއީ، ކުއެންޓިޓޭޓިވް އީޒިންގ ގެ ތެރެއިން ހަމަ މަނީ ކްރިއޭޝަން ފައިސާ ޗާޕްކުރުމުގެ މަސައްކަތެއް. އެހެންވީމާ، މި ސަރުކާރުން ތިމަންނަމެން ފައިސާ ޗާޕްނުކުރަމޭ އެ ވާހަކަ ވިދާޅުވިޔަސް، އަޅުގަނޑުމެންނަށް މިހާރު ހިސާބުތަކުން، އެމްއެމްއޭގެ ހިސާބުތަކުންވެސް އަޅުގަނޑުމެންނަށް އެބަފެނޭ މިހާރު ހަމަ ރަނގަޅަށް ސަރުކާރުންވެސް ފައިސާ ޗާޕްކުރަމުންދާ ކަން.

ކުރީގެ ފިނޭންސް މިނިސްޓަރު އިބްރާހިމް އަމީރު

މިދިޔަ އަހަރުގެ ތެރޭގައި އެމްއެމްއޭގެ ނެޓް ރިޒަރވް ނެގެޓިވް ވެގެންދިއުމުން އެކަން ފާހަގަކުރައްވައި އަމީރު ވިދާޅުވީ، އެމްއެމްއޭއިން ވަގުތުން އިންޑިއާގެ ކަރަންސީ ސްވޮޕްގެ ފައިސާ ރިޒަރވްގައި ހިމެނުމަށްފަހު، ވަގުތުން ރިޒަރވް ކަލްކިއުލޭޓް ކުރާގޮތް ބަދަލުކޮށްފައިވާ ކަމަށެވެ. އަދި އަމީރު ވިދާޅުވީ، މޭ މަހުގެ ނިޔަލަށް ނެޓް ރިޒަރވް ގައި މިހާރު ހުރީ ގާތްގަނޑަކަށް 156 މިލިއަން ޑޮލަރު ކަމަށާއި، މިހާރުވެސް ރާއްޖޭގެ ރިޒަރވްގައި ހިމެނޭ ކަރަންސީ ސްވޮޕްގެ ގާތްގަނޑަކަށް 320 މިލިއަން ޑޮލަރު ހިމެނޭ ކަމަށެވެ. 

އަމީރު ވިދާޅުވީ، ޔޫސަބަލް ރިޒަރވް އަދި ގްރޮސް ރިޒަރވް އިތުރުވި ކަމަށް ސަރުކާރުން ބުނި ނަމަވެސް އެއަދަދު ތަކަކީ އެންމެ ރަނގަޅު އަދަދުތަކެއް ނޫނެވެ. އަދި މަލީ ހުރިހާ ކަމެއްގައި ވެސް އޮޅުވާލުމަށް މިސަރުކާރުން ވަރަށް މަސައްކަތް ކުރާ ކަމަށް އޭނާ ވިދާޅުވި އެވެ.