މި ސަރުކާރުގެ އަމިއްލަ އިގްތިސާދީ އިސްލާހީ އެޖެންޑާ ނުވަތަ ރިފޯމް އެޖެންޑާ ވަނީ ފްލޮޕްވެފައި: އީވާ

މި ސަރުކާރުން އިއުލާންކުރި އަމިއްލަ އިގްތިސާދީ އިސްލާހީ އެޖެންޑާ ނުވަތަ ރިފޯމް އެޖެންޑާ މުޅިން ފްލޮޕް ވެފައިވާ ކަމަށް ގަލޮޅު އުތުރު ދާއިރާގެ ކުރީގެ މެންބަރު އީވާ އަބްދުﷲ ވިދާޅުވެއްޖެ އެވެ. 

އާދީއްތަ ދުވަހުގެ ރޭ، އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ކުރިއަށް ގެންދިޔަ "ޑޮލަރެއް ނެތް" ޕެނަލް ޑިސްކަޝަންގައި ވާހަކަ ދައްކަވަމުން އީވާ ވިދާޅުވީ ސަރުކާރުން އައިއެމްއެފް ފަދަ ބައިނަލްއަގުވާމީ މާލީ އިދާރާތަކާ ގުޅިގެން މަސައްކަތް ކުރުމުގެ ބަދަލުގައި އަމިއްލަ އެޖެންޑާ އެއް އިއުލާންކުރީ ސްޓްރަކްޗަރަލް ރިފޯމްތަކެއް ގެންނާނެ ކަމަށް ބުނުމަށްފަހު ކަމަށެވެ. 

ސަރުކާރުން އިއުލާންކުރި ރިފޯމް އެޖެންޑާގެ ދަށުން ސަރުކާރު ހިންގާ ކުންފުނިތައް އިސްލާހު ކުރުމާއި، ޚަރަދު ކުޑަކުރުމުގެ ފިޔަވަޅުތައް އަޅާނެ ކަމަށް ބުނި ނަމަވެސް، އޭގެ ތެރެއިން އެއްވެސް ކަމެއް ތަންފީޒުކޮށްފައި ނުވާ ކަމަށް އޭނާ ވިދާޅުވި އެވެ. އޭގެ ބަދަލުގައި ސަރުކާރަށް އެންމެ ފަސޭހައިން ކުރެވެން އޮތް ކަމަކީ ރައްޔިތުންގެ އަތުން ނަގާ ޓެކްސްތައް ބޮޑުކުރުން ކަމަށްވާތީ، ހަމައެކަނި އެކަން ތަންފީޒުކޮށްފައިވާ ކަމަށް އީވާ ވިދާޅުވި އެވެ.

އެގޮތުން ގްރީން ޓެކްސް އާއި ޓީޖީއެސްޓީގެ އިތުރުން އެއަރޕޯޓް ޓެކްސް ބޮޑުކޮށްފައިވާކަން އީވާ ފާހަގަކުރެއްވި އެވެ.

ސަރުކާރުގެ ސިޔާސަތުތަކަށް ފާޑުވިދާޅުވަމުން އީވާ ވިދާޅުވީ، ސަރުކާރުން މަސައްކަތް ކުރަމުންދަނީ ހަމައެކަނި ޓެކްސް ކަލެކްޓަރެއްގެ ގޮތުގައި ދައުލަތަށް އާމްދަނީ އިތުރުކުރަން ކަމަށެވެ. ނަމަވެސް އޭގެ ބަދަލުގައި ރާއްޖޭގެ އިގްތިސާދަށް ޑޮލަރާއި އާމްދަނީ ވަންނާނެ އައު އަދި އީޖާދީ ގޮތްތަކެއް ހޯދަންޖެހޭ ކަމަށް އޭނާ ވިދާޅުވި އެވެ.

އީވާ ވިދާޅުވީ ގެސްޓްހައުސް ވިޔަފާރި ފުޅާވުމުން ދައުލަތަށް ޓެކްސްގެ ގޮތުގައި ލިބޭ އާމްދަނީ ވެސް އެތައް ގުނައެއް އިތުރުވެގެން ދިޔަ ކަމަށެވެ.  

ސަރުކާރަށް އާމްދަނީ އިތުރުވާނެ ގޮތެއްގެ ބަދަލުގައި ރައްޔިތުންގެ ވިޔަފާރިއާއި ދިވެހިރާއްޖޭގެ މުޅި ގައުމުގެ މުޅި އިގްތިސާދަށް އިތުރަށް ޑޮލަރާއި އާމްދަނީ ވަންނާނެ އިނޮވޭޓިވް ގޮތްތަކެއް ހުންނަން ޖެހޭނެ. އިތުރު ވިސްނުންތަކެއް ހުންނަންޖެހޭނެ. އަޅުގަނޑުމެން އަޅުގަނޑަށް ދެން އެންމެ ފަސޭހަކޮށް މިހާރު ދަންނަވާލަން އެނގޭނެ، މިސާލަކީ، ގެސްޓްހައުސް ސިޔާސަތު. ރިސޯޓްތަކެއް ހިނގަހިނގާ ހުއްޓާ، ގެސްޓްހައުސް ވިޔަފާރި ރާއްޖެއަށް ފުޅާކުރީމާ ރަށެއްގެ އާމްދަނީއަށާއި، ރަށެއްގެ ގޭބީސީގެ އާމްދަނީއަށް އައި ބަދަލުތައް އަޅުގަނޑުމެން އެންމެނަށް އެބަ އެނގޭ. އަދި މުޅި ޓުއަރިޒަމް ސެކްޓަރގެ ލިބޭ ކަލެކްޝަނަށް އައި ބަދަލުތައްވެސް އަޅުގަނޑުމެންނަށް އެނގޭ. އޭގެން ދައުލަތަށް ޓެކްސްގެ ގޮތުގައި އާމްދަނީ އެތައް ގުނައެއް އިތުރުވެގެންދިޔަ. 

ގަލޮޅު އުތުރު ދާއިރާގެ ކުރީގެ މެންބަރު އީވާ އަބްދުﷲ 

މީގެ އިތުރުން، ޓްރާންސްޝިޕްމަންޓް ހަބާއި ސަރުކާރުން ގެންނަން އުޅުނު އެހެނިހެން އިންވެސްޓްމަންޓްތަކުން އެއްވެސް ނަތީޖާއެއް ނުފެނުމުން، ސަރުކާރުން އަމިއްލަ ރިފޯމް އެޖެންޑާއެއް އިއުލާންކުރީ ކަމަށް އީވާ ވިދާޅުވި އެވެ. ނަމަވެސް އެ އެޖެންޑާގައި ހިމެނޭ ޚަރަދު ކުޑަކުރުމުގެ އެއްވެސް ފިޔަވަޅެއް ނާޅައި، ހަމައެކަނި ރައްޔިތުންނަށް ބުރަވާ ގޮތަށް ޓެކްސްތައް ބޮޑުކުރުމަކީ ސަރުކާރުގެ ނާގާބިލުކަން ހާމަވާ ކަމެއްގެ ގޮތުގައި އީވާ ސިފަކުރެއްވި އެވެ.