އީސީގައި ޝަކީލް ހުންނެވުމެކޭ ރައީސް މުއިއްޒު ހުންނެވުމެކޭ ތަފާތެއް ނެތް: އައިކް
11 ޖުލައި 2026 | ހޮނިހިރު 18:19ރާއްޖޭގެ މިނިވަން މުއައްސަސާތަކުގެ ގާނޫނީ ޒިންމާ އަދާނުކުރެވޭތީ އެމްޑީޕީގެ ވަކީލުންގެ ކޮމިޓީގެ މެންބަރު އައިކް އަހުމަދު އީސާ ކަންބޮޑުވުން ފާޅުކުރައްވައިފި. މުއައްސަސާތަކުގެ މިނިވަންކަން ގެއްލި، ހުރިހާ ނިންމުންތަކެއް ރައީސް އޮފީހުން ކޮންޓްރޯލް ކުރަމުންދާ ކަމަށް އޭނާ ތުހުމަތު ކުރެއްވި. މީގެ ސަބަބުން ރައްޔިތުންގެ ހައްގުތައް ހިމާޔަތްކޮށް، ސަރުކާރުގެ އަމަލުތައް ޖަވާބުދާރީ ކުރުވުމަށް އޮތް ފުރުސަތު ބަންދުވެފައިވާ ކަމަށްވެސް އައިކް ވިދާޅުވި.
އެމްޑީޕީގެ ވަކީލުންގެ ކޮމިޓީގެ މެންބަރު އައިކް އަހުމަދު އީސާ | ރާއްޖެ އެމްވީ
އިލެކްޝަންސް ކޮމިޝަން (އީސީ) ގައި މުހައްމަދު ޝަކީލް ހުންނެވުމެކޭ ރައީސް ޑރ. މުހައްމަދު މުއިއްޒު ހުންނެވުމެކޭ އެއްވެސް ތަފާތެއް ނެތް ކަމަށް އެމްޑީޕީގެ ވަކީލުންގެ ކޮމިޓީގެ މެންބަރު އައިކް އަހުމަދު އީސާ ވިދާޅުވެއްޖެ އެވެ.
ރާއްޖެޓީވީ ގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އައިކް ވިދާޅުވީ މި ގައުމުގައި މިހާރު މިނިވަން މުއައްސަސާތަކެއް ނެތް ކަމަށެވެ. އަދި މުއައްސަސާ އެއް ވެސް ހަގީގަތުގައި ނެތް ކަމަށެވެ.
މުއައްސަސާ ކިޔާވަރު ވެސް ނުވާ ކަން ފާހަގަ ކުރައްވާ އައިކް ވިދާޅުވީ މުއައްސަސާއެއް ވެއްޖެޔާ އެބޭފުޅުންނަށް ގާނޫނީ ގޮތުން ހަވާލުކުރެވިފަ އޮންނަ މެންޑޭޓު ފުރިހަމަ ކުރުމަށްޓަކައި މަސައްކަތްތަކެއް ކުރާތަން އަޅުގަނޑުމެންނަށް ފެންނަން ޖެހޭނެ ކަމަށެވެ. ނަމަވެސް މިއަދު މި އޮތް ކޮމިޝަން ތަކަކީ މިގޮތަކަށް މަސައްކަތް ކުރާ ތަންތަން ނޫން ކަމަށް އޭނާ ވިދާޅުވި އެވެ.
މީގެ ކުރިން އިލެކްޝަންސް ކޮމިޝަނާމެދު އުއްމީދުތަކެއް ހުރި ކަން ފާހަގަ ކުރައްވާ އައިކް ވިދާޅުވީ ރެފަރެންޑަމްއާ ހިސާބުން އެ ބޭފުޅުން އެ ނެންގެވި ޓަރން، އެ ދެން ގޯސް ވަމުން ދިޔަ ކަމަށެވެ.
ގޯސް ވަމުން ވަމުން ވަމުން އައިސް މިއަދު މިއޮތީ ކުރިން ދެން ދުވަހަކު ވެސް ގޯސް ނުވާ ވަރަށް ގޯސް ވެފަ. ޝަކީލް އެތަނަށް ލުމަށް ވުރެ މާ ރަނގަޅު ވާނެ ޑރ. މުއިއްޒު އެތަނަށް ވަޑައިގެންނެވިއްޔާ. އެ ހަމަޖެހޭނީ އެއްތާކު. ހަމަ އެއް ބޭފުޅަކު ހުރިހާ ޑިޒިޝަނެއް ނަންގަވަނީ މިހާރު. އެއީ ރައީސް އޮފީހުގަ ވެސް، އިލެކްޝަންސް ކޮމިޝަންގަ ވެސް. އެއީ ޑރ. މުއިއްޒު.އެމްޑީޕީގެ ވަކީލުންގެ ކޮމިޓީގެ މެންބަރު އައިކް އަހުމަދު އީސާ
އައިކް ވިދާޅުވީ މިނިވަން މުއައްސަސާތައް މަސައްކަތް ނުކުރީމަ ދައުލަތުގެ ތެރެއިން ގެއްލުމެއް ލިބޭ އެންމެ ބޮޑު ބަޔަކީ ރައްޔިތުން ކަމަށެވެ. އަދި ދައުލަތުގެ އިދާރާތަކާތަކަށްވާ ގެއެްލުމަކީ އެ އިދާރާތައް ހިންގަން ނުކުޅެދުން ކަމަށެވެ.
ސަބަބަކީ ގޯސްކޮށް ކަންކަން ހިނގަންޏާ އެކަމެއް ބަލައި، ތަހުގީގު ކޮށް ފިޔަވަޅު އަޅަން ތިބޭ މުއައްސަސާތަތަކީ އެއީ ކަމަށް ވުން ކަމަށާ މުއައްސަސާތައް މަސައްކަތް ނުކުރާނަމަ އެކަމަށް ހުރަސްއެޅޭ ކަމަށެވެ.
އައިކް ވިދާޅުވީ ސަރުކާރަކުން ރައްޔިތަކާ މެދު ނުހައްގުން އަމަލު ކުރާ ހާލަތްތަކުގައި ދާން އޮންނަ ހަމައެކަނި ތަނަކީ އެ މުއައްސަސާތައް ކަމަށެވެ. ނަމަވެސް މިއަދު މިގައުމުގައި މުއައްސަސާއެއް ނެތް ކަމަށް އޭނާ ވިދާޅުވި އެވެ.
