ރައީސް އަބްދުﷲ ޔާމިން އަބްދުލް ގައްޔޫމަކީ ގއ.ވިލިނގިލީ ރައްޔިތުންނަށް އިހްލާސްތެރި ބޭފުޅެއް ނޫން ކަމަށް ވިދާޅުވެ އެ ވިލިނގިލީ ދާއިރާގެ މެމްބަރު ސައުދު ހުސެއިން އެމަނިކުފާނަށް ބަހުގެ ހޫނު ހަމަލާތަކެއް ދެއްވައިފި އެވެ.
ރާއްޖެ ޓީވީގެ "މި ރައީސް" ޕްރޮގުރާމްގައި ވާހަކަ ދައްކަވަމުން ސައުދު ވިދާޅުވީ ވިލިނގިލީގެ ރައްޔިތުންގެ ބޭނުންވާ ކަންތައް ދެންނެވުމުން އެކަން ކޮށްދެއްވުމުގައި ރައީސް ޔާމިންގެ އިހްލާސްތެރިކަމެއް ނެތް ކަމަށެވެ. އަދި ތަރައްގީގެ ވާހަކަ ރައްޔިތުންގެ ދެއްކުމުން ރައީސް ޔާމިން ހިތްޕުޅު ނުތަނަވަސްވެ އެ ވާހަކަ ދައްކަވާ ކަމަށްވެސް އޭނާ ވިދާޅުވި އެވެ.
ވިލިނގިލީގައި މިހާރުގެ ސަރުކާރުން އަލަށް ފައްޓަވައިގެން ހިންގި މަޝްރޫއެއް އަދި ނިމިފަ ނެތް ކަމަށްވެސް އޭނާ ވިދާޅުވި އެވެ. މި ސަރުކާރުން ފެށި ބަނދަރުގެ މަޝްރޫއު ވެސް އެ ވަނީ ހުއްޓިފައި ކަމަށް ވެސް އޭނާ ފާހަގަ ކުރެއްވި އެވެ.
ވިލިނގިލީ ރައްޔިތުންގެ ފަރާތުން ވެސް އެންމެ ގިނައިން އެމަނިކުފާނަށް އަންނަ ޝަކުވާއަކީ ދާއިރާގެ "ބަފަޔަކު" ( ދާއިރާގެ މެމްބަރަކު) ނެތުން ކަމަށް ރައީސް ޔާމިން ވިދާޅުވެފައިވާ ވާހަކަފުޅަށް ވެސް ސައުދު ވަނީ ރައްދު ދެއްވާފަ އެވެ.
ސައުދު ވިދާޅުވީ ރައީސް ޔާމިން ދާދިފަހުން ގއ.އަތޮޅަށް ކުރެއްވި ދަތުރުފުޅުގައި ރައީސުލް ޖުމްހޫރިއްޔާގެ ހައިސިއްޔަތުން ވަޑައިގެންނެވީ ކޫއްޑޫއަށް އެކަނި ކަމަށެވެ. އަދި ރައީސް ޔާމިން އެ އަތޮޅު ވިލިނގިއްޔަށާއި ކޮލަމާފުއްޓަށް ކުރެއްވި ދަތުރުފުޅަކީ ޕީޕީއެމްގެ މުސްތަޝާރުގެ ހައިސިއްޔަތުން ކުރެއްވި ދަތުރުފުޅެއްކަން އެމަނިކުފާނުގެ އިއުތިރާފުން އެނގޭ ކަމަށް ވިދާޅުވި އެވެ. ނަމަވެސް އެމަނިކުފާނުގެ ދަތުރުފުޅުގައި އޮޅުވާލުންތަކެއް ހުރި ކަމަށާއި އަދި އެ ދަތުރުފުޅާ ގުޅުވައިގެން ދައުލަތުގެ އެކު އޮފީސްތަކާއި ކުންފުނިތަކުން ކޮށްފައިވާ ޚަރަދުތަކުގެ މައްސަލަ އޭސީސީން ބަލަން ޖެހޭނެ ކަމަށް އޭނާ ވިދާޅުވި އެވެ.
